រាជធានីភ្នំពេញ ៖ បុរសជាខ្មែរអ៊ិស្លាមម្នាក់ បានលែងលះគ្នាជាមួយប្រពន្ធដើមដែលជានារីខ្មែឥស្លាមដូចគ្នា រួចបានទៅរៀបការប្រពន្ធថ្មីម្នាក់ទៀត ប៉ុន្តែពុំដឹងថាជានារីខ្មែរឥស្លាមដូចគ្នាឬជាជនជាតិខ្មែរនោះទេ ហើយរស់នៅជាមួយគ្នា បានរយៈពេល៤ឆ្នាំក៏បានលែងលះប្រពន្ធក្រោយនោះទៀត ។
បន្ទាប់មកបានត្រលប់មកទាក់ទងសាងស្នេហ៍លួចលាក់ជាមួយអតីតប្រពន្ធដើមវិញ ហើយពេលឃើញមានមនុស្សប្រុសខលរកនាង ក៏កើតភ្លើងប្រច័ណ្ឌចោទថានាងមានប្រុសសហាយក្បត់ខ្លួន ។ ពេលនោះក៏មានការឈ្លោះប្រកែកគ្នាខ្លាំង ហើយបុរសនេះក៏ច្របាច់កសម្លាប់នាងចោល រួចគេចខ្លួនបាត់ ព្រមទាំងប្រាប់ឪពុកម្ដាយបង្កើតរបស់ខ្លួនឲ្យជួយប្រាប់ទៅឪពុកម្ដាយនាងឲ្យទៅយកសពនាងធ្វើបុណ្យផង ។ ប៉ុន្តែអាយុមិនទាន់អស់ នាងជាអតីប្រពន្ធដើមរូបនោះមិនបានស្លាប់ឡើយ និងត្រូវបាននគរបាលបញ្ជូនទៅសង្គ្រោះ បន្ទាប់មកនគរបាលបានប្រើល្បិចខលប្រាប់ជនដៃដល់រូបនេះថារកសពនារីរងគ្រោះអត់ឃើញទេ និងបានហៅឲ្យជននេះទៅជួយរកសពនាងផង ហើយគ្រាន់តែឃើញអតីតប្ដីកំណាចរូបនោះទៅដល់នគរបាលក៏ចាប់ខ្លួនទាំងយប់តែម្ដង ។
ហេតុការណ៍ខាងលើនោះបានកើតឡើង បង្កឲ្យមានការភ្ញាក់ផ្អើល កាលពីវេលាម៉ោង៦និង៣០នាទីល្ងាចថ្ងៃទី២៨ ខែកក្កដា ឆ្នាំ២០២៥នៅចំណុចវាលស្មៅ ខាងកេីតវត្តត្រពាំងឈូក ស្ថិតនៅក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
បុរសជាអតីតប្ដីខាងលើឈ្មោះគ្រីយ៉ា មីហ្សាន អាយុ២៧ឆ្នាំ ជនជាតិខ្មែរ ឥស្លាម មុខរបរជាងសង្ហារឹម ស្នាក់នៅភូមិមេត្រីលើ ឃុំឬស្សីជ្រោយ ស្រុកមុខកំពូល ខេត្តកណ្តាល ។ ចំណែកអតីប្រពន្ធរងគ្រោះឈ្មោះម៉ាត់ ម៉ារី អាយុ២៤ឆ្នាំ ជនជាតិខ្មែរឥស្លាម មុខរបរកម្មការិនីរោងចក្រ មានស្រុកកំណើតភូមិម៉ាសុីនស្រូវ ឃុំបឹងព្រួល ស្រុកត្បូងឃ្មុំ ខេត្តត្បូងឃ្មុំ និងស្នាក់នៅបន្ទប់ជួលក្នុងភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ ។
នគរបាលបានប្រាប់ឲ្យដឹងថា ប្ដីប្រពន្ធ១គូនេះបានរៀបការនិងរស់នៅជាមួយគ្នាបានរយៈពេលប្រមាណ៤ឆ្នាំនិងបង្កើតបានកូនស្រីម្នាក់ហេីយក៏បានលែងលះគ្នាទៅវិញ ក្រោយមកបុរសជាប្តីបានទៅរៀបការប្រពន្ធថ្មីម្នាក់ទៀត ប៉ុន្តែមិនដឹងថាជានារីខ្មែឥស្លាមដែរ ឬជានារីខ្មែរនោះទេ ។ បុរសនេះបានរស់នៅជាមួយប្រពន្ធក្រោយបានរយៈពេលប្រមាណ៤ឆ្នាំប៉ុណ្ណោះ ក៏បានលែងលះប្រពន្ធក្រោយនោះទៀត បន្ទាប់មកក៏បានត្រលប់មកទំនាក់ទំនងជាមួយអតីប្រពន្ធដេីមវិញ ។ ប៉ុន្តែការទាក់ទងស្នេហាគ្នាជាថ្មីឡើងវិញនោះ គឺលួចលាក់មិនហ៊ានចេញមុខឲ្យឪពុកម្ដាយខាងស្រីដឹងនោះទេ ព្រោះបើដឹងក៏ពួកគាត់មិនឲ្យទាក់ទងគ្នាដាច់ខាត ដោយសារតែពួកគាត់បានចាត់ទុកថា អតីតកូនប្រសារប្រុសរូបនេះ(ជនដៃដល់)គឺជាមនុស្សចោលម្សៀតមិនបានការ ។
នគរបាលបានប្រាប់ឲ្យដឹងបន្តទៀតថា ដោយឡែកនៅវេលាល្ងាចកេីតហេតុអ្នកទាំង២បានណាត់ជួបគ្នានៅមុខរោងចក្រមួយយកន្លែងស្ថិតនៅជិតកន្លែងកើតហេតុនោះដែរ បន្ទាប់មក ក៏បាននាំគ្នាទិញអាហារទៅអង្គុយហូបលេងនៅចំណុចដីវាលក្បែរដើមអំពិលទឹក២ដើម ស្ថិតនៅខាងកេីតវត្តត្រពាំងឈូក ។ ខណៈពេលកំពុងអង្គុយសាសងស្នេហាដូចកាលពីគ្រាដំបូងនៅកម្លោះក្រមុំនោះ ក៏ស្រាប់តែមានបុរសម្នាក់ខលទៅរកនាង ពេលនោះអតីតប្ដីនេះបានសួរនាងថា«តើនណាខលមក0x017d7 នាងបានឆ្លើយតបថាបងប្រុសជាអ្នកស្គាល់គ្នាទេ» ប៉ុន្តែបុរសនេះមិនជឿឡើយ ហើយក៏កើតចិត្តប្រច័ណ្ឌនាងយ៉ាងខ្លាំង រហូតក្លាយជាការឈ្លោះប្រកែកគ្នាកើតឡើង ។
នគរបាលប្រាប់ឲ្យដឹងបន្ថែមទៀតថា ខណៈនោះអតីតប្ដីក៏បានច្របាច់ក សម្លាប់ស្ត្រីជាអតីតប្រពន្ធរូបនេះ រួចបានគេចខ្លួនបាត់ ដោយបានទុកនាងចោលនៅលើវាលស្មៅកន្លែងកើតនោះ ក្រោយក៏មានអ្នកអូសរទេះដើររើសអេតចាយពេលយប់ឆ្លងកាត់ទីនោះប្រទះឃើញនាងដេកស្តូកស្តឹង ។ អ្នករើសអេតចាយក៏បានប្រាប់ទៅកាន់សន្តិសុខដែលកំពុងយាមនៅភូមិគ្រឹះមួយជិត នោះ ឲ្យជួយរាយការណ៍ទៅនគរបាលប៉ុស្តិ៍សំរោងក្រោមឲ្យចុះទៅពិនិត្យមើល ហើយនគរបាលក៏បានចុះទៅកាន់ចំណុចកើតហេតុនោះភ្លាមៗ និងបានឃេីញនាងរងគ្រោះនៅមានដង្ហើមនៅឡើយ ។
នគរបាលបានបញ្ជាក់ប្រាប់ទៀតថា បន្ទាប់មកក៏បានបញ្ជូននាងទៅសង្គ្រោះបន្ទាន់នៅមន្ទីរពេទ្យតេជោសន្តិភាព ចំណែកជនសង្ស័យស្មានថាអតីតប្រពន្ធស្លាប់ហើយ ក៏បានខលទៅប្រាប់ឪពុកម្ដាយបង្កើតរបស់ខ្លួនថា«ខ្ញុំបានសម្លាប់អតីតប្រពន្ធរបស់ខ្ញុំហេីយ ម៉ែពុកជួយប្រាប់ក្រុមគ្រួសាររបស់នាង ទៅយកសពធ្វើបុណ្យផង សពស្ថិតនៅខាងកេីតវត្តត្រពាំងឈូកជិតដេីមអំពិលទឹក២ដេីម ។
ក្រោយពេលទទួលបានដំណឹងនោះភ្លាមក្រុមគ្រួសារនារីរងគ្រោះក៏បាននាំគ្នាទៅកាន់ទីនោះភ្លាមដែរនិងបានសហការណ៍ផ្ដល់ការបំភ្លឺជូននគរបាល បន្ទាប់មកនគរបាលក៏បានប្រើល្បិចខលទៅកាន់ជនដៃដល់ប្រាប់ថា រកសាកសពនារីរងគ្រោះអត់ឃើញទេ ហើយសុំឲ្យជននោះទៅជួយរកសព ។ លុះមួយសន្ទុះក្រោយមកស្រាប់តែជននោះទៅមែន ហើយក៏ត្រូវបាននគរបាលឃាត់ខ្លួន នាំយកទៅធ្វើការសាកសួរនិងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ