ទីក្រុងកៀវ៖ ប្រមុខដឹកនាំអ៊ុយក្រែន លោកហ្សេឡិនស្គី ថ្លែងថាកងទ័ពអ៊ុយក្រែនកំពុងប្រឈមនឹងសមរភូមិដ៏ក្ដៅគគុកនៅទីក្រុងផូករ៉ូស (Pokrovsk) នៅអ៊ុយក្រែនខាងកើត។ ទីនេះស្ថិតនៅកៀកនឹងព្រំដែនរុស្ស៊ី និងជាច្រកផ្លូវសំខាន់សម្រាប់ដឹកជញ្ជូនភស្តុភារយកទៅផ្គត់ផ្គង់កងទ័ពនៅសមរភូមិមុខ។ រុស្ស៊ីក៏ឧស្សាហ៍អះអាងថាខ្លួនវាយយកបានភូមិនានានៅទីក្រុងនេះជាបន្តបន្តាប់។
នៅក្នុងសុន្ទរកថាពេលរាត្រីរបស់លោក លោកហ្សេឡិនស្គី ថ្លែងថាអគ្គបញ្ជាការកងទ័ព លោកអូឡិចសាន់ដឺ ស៊ីស្គី (Oleksandr Syrskyi) ថ្លែងនៅក្នុងអង្គប្រជុំមន្ត្រីជាន់ខ្ពស់ថាស្ថានការណ៍សឹកនៅទីក្រុងផូករ៉ូសជាចំណុចដែលត្រូវយកចិត្តទុកដាក់ខ្ពស់។ លោកហ្សេឡិនស្គីថ្លែងថាកងទ័ពនៅតែបន្តអនុវត្តរាល់ប្រតិបត្តិការទាំងអស់។ ជាពិសេស ទីក្រុងផូករ៉ូសកំពុងក្លាយជាសមរភូមិក្ដៅ។
លោកហ្សេឡិនស្គីថ្លែងបន្តទៀតថាកងទ័ពអ៊ុយក្រែនក៏កំពុងតស៊ូនៅតាមតំបន់ព្រំដែនដទៃទៀតដូចជានៅទីក្រុងស៊ូមី (Sumy) ជាដើម។ នៅទីនោះ កងទ័ពរុស្ស៊ីហាក់ដូចជាមានប្រៀបកាលពីប៉ុន្មានសប្ដាហ៍ចុងក្រោយនេះ។ លោកហ្សេឡិនស្គីថ្លែងថារដ្ឋមន្ត្រីការពារជាតិថ្មី លោកដេនីស ស្ម៊ីហាល (Denys Shmyhal) បានរាយការណ៍អំពីជំនួយបរទេសដែលផ្ដល់ជូនជាហូរហែដើម្បីធានាថាអ៊ុយក្រែននៅតែមានអាវុធសម្រាប់តស៊ូនៅក្នុងសង្គ្រាម។
លោកសូមអំពាវនាវឱ្យត្រៀមរៀបចំកិច្ចប្រជុំស្ដីពីបច្ចេកវិទ្យាដោយផ្ដោតសំខាន់ជាពិសេសទៅលើការផលិតដ្រូន។ តាមរយៈផែនការនេះ អ៊ុយក្រែនដាក់ផែនការផលិតឧបករណ៍បាញ់ទម្លាក់ដ្រូនឱ្យបានចន្លោះពី៥០០-១០០០គ្រឿងនៅក្នុងមួយថ្ងៃៗ។ លោកហ្សេឡិនស្គីកត់សម្គាល់ថាកាលពីដើមខែកក្កដា ឧបករណ៍របស់ខ្លួនបង្ហាញប្រសិទ្ធភាពខ្ពស់ក្នុងការបាញ់ទម្លាក់ដ្រូនរបស់រុស្ស៊ីដែលបញ្ជូនមកទាំងផ្ទាំងៗដើម្បីវាយប្រហារទីក្រុងតូច-ធំរបស់អ៊ុយក្រែន។ នេះបើយោងតាមប្រភពពីរ៉យទ័រ៕
ចែករំលែកព័តមាននេះ