រាជធានីភ្នំពេញ ៖ ទីបំផុត ក្រុមបាល់បោះវិទ្យាល័យព្រះយុគន្ធរ បានឈ្នះជើងឯក ការប្រកួតកីឡាបាល់បោះយុវជន ក្រោម១៦ឆ្នាំ ជើងឯករាជធានីភ្នំពេញ ឆ្នាំ២០២៥ បន្ទាប់ពីបានយកឈ្នះក្រុមវិទ្យាល័យព្រះស៊ីសុវត្ថិ…
រាជធានីភ្នំពេញ ៖ ទីបំផុត ក្រុមបាល់បោះវិទ្យាល័យព្រះយុគន្ធរ បានឈ្នះជើងឯក ការប្រកួតកីឡាបាល់បោះយុវជន ក្រោម១៦ឆ្នាំ ជើងឯករាជធានីភ្នំពេញ ឆ្នាំ២០២៥ បន្ទាប់ពីបានយកឈ្នះក្រុមវិទ្យាល័យព្រះស៊ីសុវត្ថិ ក្នុងពិន្ទុ ៤២-៣៧ នៅវគ្គផ្តាច់ព្រ័ត្រ ។
ការប្រកួតនៅវគ្គផ្តាច់ព្រ័ត្រ បានធ្វើឡើងនៅទីលានបាល់ទះវិទ្យាល័យព្រះយុគន្ធរ នៅថ្ងៃទី២២ ខែកក្កដា ឆ្នាំ២០២៥។ ចំពោះចំណាត់ថ្នាក់លេខ៣ និងលេខ៣ស្ទួន បានទៅលើក្រុមយុវជនវិទ្យាល័យជាស៊ីមសន្ធរម៉ុក និងក្រុម AIS ម៉ៅសេទុង ។
ថ្លែងក្នុងឱកាសបិទព្រឹត្តិការណ៍នេះ លោក អ៊ុក ចន្ថា អនុប្រធានមន្ទីរអប់រំ យុវជន និងកីឡារាជធានីភ្នំពេញ តំណាងលោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ គូសបញ្ជាក់ថា ការចូលរួមរបស់ប្រតិភូកីឡាបាល់បោះក្នុងព្រឹត្តិការណ៍នេះ គឺជាកាយវិការ និងការចូលរួមដោយស្មោះក្នុងការកសាង និងអភិវឌ្ឍវិស័យកីឡានៅរាជធានីភ្នំពេញ និងជំរុញដល់យុវជនឱ្យចូលរួមហាត់ និងលេងកីឡាទៅតាមប្រភេទ ដែលពួកគេចូលចិត្ត និងចូលរួមកាត់បន្ថយ នូវអំពើអបាយមុខក្នុងសង្គម។ មួយវិញទៀត ការហាត់ និងលេងកីឡាជាកត្តាចាំបាច់ ដែលនាំមកនូវការស្គាល់គ្នា និងស្រឡាញ់ចូលចិត្តគ្នាទៅវិញទៅមក ធ្វើឱ្យសង្គមជាតិយើង មានការឯកភាព និងសាមគ្គីភាពដ៏រឹងមាំក្នុងការកសាង និងការពារជាតិយើងចាប់ពីយុវជនទៅ ។
លោក អ៊ុក ចន្ថា បន្ថែមថា ការរៀបចំកីឡាបាល់បោះយុវជននេះ ក៏ជាការរួមអភិវឌ្ឍវិស័យកីឡា ស្របតាមមុំមួយ នៃយុទ្ធសាស្ត្របញ្ចកោណរបស់រាជរដ្ឋាភិបាល ដែលកំពុងឈានឆ្ពោះទៅរកកម្រិតមួយឱ្យស្រប និងការវិវត្តរីកចម្រើនរបស់ប្រទេសជាតិផងដែរ ។
លោកអនុប្រធានមន្ទីរអប់រំ ក៏បានលើកទឹកចិត្តដល់ក្រុមនានា ត្រូវយកចិត្តទុកដាក់បន្តបង្កើនសមត្ថភាពហ្វឹកហាត់ ដើម្បីត្រៀមចូលរួមប្រកួតថ្នាក់ជាតិ ក្នុងកម្មវិធីផ្សេងៗរបស់សហព័ន្ធកីឡាជាតិ នាពេលខាងមុខ ក្នុងការអភិវឌ្ឍវិស័យកីឡាបាល់បោះឱ្យរីកចម្រើន ។
បើតាមរបាយការណ៍លោក សេង ស្រេង ប្រធានការិយាល័យកីឡា នៃមន្ទីរអប់រំ រាជធានីភ្នំពេញ បានឱ្យដឹងថា ការប្រកួតកីឡាបាល់បោះយុវជក្រោម១៦ឆ្នាំ ជើងឯករាជធានីភ្នំពេញ ប្រចាំឆ្នាំ២០២៥នេះ មានក្រុមចូលរួមចំនួន១០ក្រុម ដោយមានប្រតិភូ អ្នកដឹកនាំ គ្រូបង្វឹក កីឡាករសរុប ១៥០នាក់ ដោយប្រកួតមានរយៈពេល១សប្តាហ៍។ តំណាងគណៈកម្មការរៀបចំរូបនេះអះអាងថា ឆ្លងកាត់ការប្រកួតនេះបង្ហាញថា ការចូលរួមរបស់ក្រុមយុវជនបាល់បោះទាំងអស់ បានយកចិត្តទុកដាក់ អនុវត្តបានល្អ ស្របតាមបទបញ្ជាបច្ចេកទេសផងដែរ ៕
ចែករំលែកព័តមាននេះ