ខេត្តស្ទឹងត្រែង ៖ ច្រាំងដីកោះជាង១៥០០ម៉ែត្រស្ថិតភូមិអូររុន ឃុំអូរស្វាយ ស្រុកបុរីអូរស្វាយសែនជ័យ បានរងការបាក់ធ្លាក់ចុះទឹកទន្លេ កាលពីថ្ងៃទី២២ កក្កដា ២០២៥ ។…
ខេត្តស្ទឹងត្រែង ៖ ច្រាំងដីកោះជាង១៥០០ម៉ែត្រស្ថិតភូមិអូររុន ឃុំអូរស្វាយ ស្រុកបុរីអូរស្វាយសែនជ័យ បានរងការបាក់ធ្លាក់ចុះទឹកទន្លេ កាលពីថ្ងៃទី២២ កក្កដា ២០២៥ ។ សេចក្តីរាយការណ៍ថា ករណីនេះពុំមានគ្រោះថ្នាក់ដល់អាយុជីវិតប្រជាពលរដ្ឋឡើយ តែបានរងផលប៉ះពាល់តិចតួច
ទេ ។
ទាក់ទិនហេតុការណ៍ខាងលើនេះ លេខាធិការដ្ឋានគណៈកម្មាធិការខេត្តគ្រប់គ្រងមហន្តរាយរដ្ឋបាលស្រុក មន្ទីរធនធានទឹក រដ្ឋបាលឃុំ បានអន្តរាគមន៍ឆ្លើយតបករណីបាក់ច្រាំងទន្លេ។
តាមការពិនិត្យជាក់ស្តែង ចំណុចដីកោះដែលបាក់នោះមានចំនួន០៣កន្លែង បណ្តោយសរុប១៥១០ម៉ែត្រ ក្នុងនោះ រុះរើផ្ទះចេញពីទីតាំង០១ខ្នង មានផលប៉ះពាល់ដល់០៦គ្រួសារ និងដំណាំកសិកម្មសរុប៣៦០ដើម ។ នេះបើការបញ្ជាក់ពីលោកលី មីណា អភិបាលស្រុកបុរីអូរស្វាយសែនជ័យ ។
លោកអភិបាលស្រុកបានបន្ថែមថា កត្តាដែលបណ្ដាលឱ្យបាក់ច្រាំងទន្លេនេះ គឺមកពីទឹកទន្លេហក់ឡើងខ្លាំង នៅពេលដង្ហើមវាស្រកទៅវិញក៏បណ្តាលអោយបាក់ទៅតាមហ្នឹងដែរ និយាយជារួម វាជាដីកោះពុំមានភាពរឹងមាំទេ ហើយវាជាដីល្បាយខ្សាច់កាលណាវាបាក់ វាមានមុខគឺវានិងបាក់បន្តបន្ទាប់ទៀតហើយ កន្លងមក កន្លែងដែលមានត្រែងយើងបានណែនាំប្រជាពលរដ្ឋកុំឱ្យកាប់ បើពួកគាត់ធ្វើដំណាំដាំដុះធ្វើតែលើដីកោះនោះទៅ កន្លែងច្រាំងកោះយើងមិនអោយពួកគាត់ប៉ះពាល់ទេ ប៉ុន្តែនិយាយជារួមពេលណាដែលចរន្តទឹកហូរមកប៉ះកន្លែងដែលមានមុខគឺវាបាក់ទៅហើយ ។
លោកអភិបាលស្រុកបន្ថែមទៀតថា ការបាក់ច្រាំងទន្លេនេះ វាជាកត្តាធម្មជាតិ ដែលបាក់ពីខាងលើទៅដុះនៅខាងក្រោម វាជារឿងធម្មតាទេហើយវាក៏មិនមែនជាភូមិដ្ឋាននោះដែរ ហើយផលប៉ះពាល់ក៏វាតិចតួចដែរ ដោយសារវាជាដីកោះ ហើយនៅលើកោះនោះក៏ពុំមានប្រជាពលរដ្ឋរស់នៅអចិន្ត្រៃយ៍ដែរ ភាគច្រើនជាចំការ ហើយចំការនោះភាគច្រើនជាក្រូចឆ្មា និងក្រូចពោធិ៍សាត់ ដែលដាំនៅលើកោះហ្នឹងហើយផលប៉ះពាល់គឺប៉ះពាល់ទៅលើដំណាំទាំងហ្នឹងឯង ។
ក្រោយការបាក់ច្រាំងដីកោះនោះមកលេខាធិការដ្ឋានគណៈកម្មាធិការខេត្តគ្រប់គ្រងមហន្តរាយ រដ្ឋបាលស្រុក មន្ទីរធនធានទឹក រដ្ឋបាលឃុំបានអន្តរាគមន៍ និងយកអំណោយមួយចំនួនជូនដល់ប្រជាពលរដ្ឋទាំងនោះផងដែរ ៕
ចែករំលែកព័តមាននេះ