វិស័យសំណង់កម្ពុជាដែលហាក់ដូចជានៅក្នុងស្ថានភាពធាក់ថយអស់រយៈពេលប្រមាណជាជិត៥ឆ្នាំចុងក្រោយនេះ អាចនឹងមានស្ថានភាពកម្រើកឡើងវិញហើយ នៅក្នុងឆ្នាំ២០២៥នេះ ។ អ្នក វិភាគបានឲ្យដឹងថា ឥឡូវសញ្ញាកម្រើកឡើងវិញបង្ហាញចេញបណ្តើរៗហើយ បន្ទាប់ពី វិស័យសំណង់នៅកម្ពុជាស្ថិតនៅក្នុងស្ថានភាពពិបាកធ្វើការប៉ាន់ស្មានមកតាំងពីឆ្នាំ២០២០ ពោលគឺនៅក្រោយពេលដែលកូវីដ…
វិស័យសំណង់កម្ពុជាដែលហាក់ដូចជានៅក្នុងស្ថានភាពធាក់ថយអស់រយៈពេលប្រមាណជាជិត៥ឆ្នាំចុងក្រោយនេះ អាចនឹងមានស្ថានភាពកម្រើកឡើងវិញហើយ នៅក្នុងឆ្នាំ២០២៥នេះ ។ អ្នក វិភាគបានឲ្យដឹងថា ឥឡូវសញ្ញាកម្រើកឡើងវិញបង្ហាញចេញបណ្តើរៗហើយ បន្ទាប់ពី វិស័យសំណង់នៅកម្ពុជាស្ថិតនៅក្នុងស្ថានភាពពិបាកធ្វើការប៉ាន់ស្មានមកតាំងពីឆ្នាំ២០២០ ពោលគឺនៅក្រោយពេលដែលកូវីដ ១៩ បានរីករាលដាល់ខ្លាំងទាំងនៅកម្ពុជា តំបន់ និង ពិភពលោកទាំង
មូល ។
មូលហេតុដែលគេហ៊ានសន្និដ្ឋានថា វិស័យសំណង់នៅកម្ពុជាវាអាចនឹងមានស្ថានភាពប្រសើរជាងឆ្នាំ២០២៤កន្លងទៅនេះ គឺដោយសារតែឈរនៅលើមូលដ្ឋាននៃកំណើននៃការនាំចូលដ៏សម្បើមគឺសម្ភារៈសំណង់ ដោយរួមទាំងដែក ខណៈដែលស៊ីម៉ង់មិនជាបញ្ហាទេ ដោយសារតែកម្ពុជាសឹងតែអាចទ្រទ្រង់និងរ៉ាប់រងការផ្គត់ផ្គង់ស៊ីម៉ង់នៅក្នុងស្រុកបាន ពេញទំហឹងរួចទៅហើយ ។
តាមរបាយការណ៍ដែលប្រភពបានចែករំលែកបានឲ្យដឹងថា នៅក្នុងរយៈពេលពេញមួយឆមាសទីមួយនៃឆ្នាំ២០២៥នេះ ការនាំចូលគ្រឿងសំណង់គឺមានតម្លៃប្រមាណជា ១.២៤០ លានដុល្លារ កើន ឡើងរហូតដល់ទៅ ៣៥,៦០ ភាគរយ នេះបើធៀបនឹងតម្លៃនៃការនាំចូល នៅក្នុងរយៈពេលដដែលនៃឆ្នាំ២០២៤ កន្លងទៅ គឺត្រឹមតែ ជាង ៩១៥ លានដុល្លារ ។
ដោយឡែកសម្រាប់ការនាំចូលដែកវិញ ត្រូវបានគេកត់ត្រាឃើញថា មានតម្លៃប្រមាណជាជាង ៥៨៧ លានដុល្លារ ជាមួយនឹងកំណើនកើនឡើងប្រមាណជា ៥២,៥៨ ភាគរយ ធៀបនឹងតម្លៃនៃការនាំចូលដែកកាលពីរយៈពេលដដែលកាលពីឆ្នាំ២០២៤ កន្លងទៅ ដែលមានតម្លៃត្រឹមតែជិត៣៨៥ លានដុល្លារ ។
សម្រាប់ស៊ីម៉ង់វិញនោះ អ្នកវិភាគបានអះអាងថា កម្ពុជាសឹងតែអាចម្ចាស់ការទ្រទ្រង់និង ផ្គត់ផ្គង់តម្រូវការបានដោយខ្លួនឯងទៅហើយ ដោយសារតែពេលនេះកម្ពុជាមានរោងចក្រស៊ីម៉ង់ច្រើនដើម្បីបំពេញសេចក្តី ត្រូវការនៅក្នុងស្រុក។
ស្ថិតិបានបង្ហាញថា នៅឆមាសទីមួយដើមឆ្នាំដដដែលកម្ពុជាបាននាំចូលស៊ីម៉ង់មក បម្រើវិស័យសំណង់ផ្សេងៗគឺមានតម្លៃត្រឹមតែ ៨,៣៤ លានដុល្លារ គឺមានការថយចុះប្រមាណជា ជិត ១១ ភាគរយ ធៀបនឹងតម្លៃនៃការនាំចូលដែលមានតម្លៃប្រមាណជា ៩,៣៥ លានដុល្លារ ។
មកដល់ពេលនេះ វិស័យដែលធានាឫជាសរសរស្តម្ភទ្រទ្រង់កំណើនសេដ្ឋកិច្ចនៅកម្ពុជា ត្រូវបានគេដឹងថា គឺមានវិស័យឧស្សាហកម្មកាត់ដេរ ទេសចរណ៍ កសិកម្ម និង សំណង់នេះឯង ។ កាលពីខែមិថុនា កន្លងទៅ នេះ ធនាគារពិភពលោកកម្ពុជា បានអះអាងថា កម្ពជាអាចនឹងទទួលបានកំណើនសេដ្ឋកិច្ចសរុប ប្រមាណជា ៤ ភាគរយ នៅក្នុងឆ្នាំ២០២៥ ហើយអាចនឹងកើនឡើងដល់ ៤,៥ ភាគរយ នៅក្នុងឆ្នាំ២០២៦ ខាងមុខ ។
នៅក្នុងអំឡុងពេលនោះ លោកស្រី តានៀ មេយ័រ (Tania Meyer) អ្នកចាត់ការធនាគារពិភពលោកនៅកម្ពុជា បានឲ្យដឹងថា ការធ្វើពិពិធកម្មសេដ្ឋកិច្ចមានសារៈសំខាន់សម្រាប់កម្ពុជា ដើម្បីរក្សានិរន្តរភាពកំណើន និងការបង្កើតការងារ ចំពេលមានភាពមិនច្បាស់លាស់ ជាពិសេសតាមរយៈការផ្លាស់ប្តូរហួសពីការពឹងផ្អែកលើសំណង់ និងការនាំចេញសម្លៀកបំពាក់ ក៏ដូចជាការលើកកម្ពស់ការផលិត និងសេវាកម្មដែលមានតម្លៃបន្ថែមខ្ពស់។
ក្រៅពីការនាំចូលនូវគ្រឿងនិងសម្ភារៈសំណង់មានកំណើនកើនឡើងនោះ កាលពីពេលថ្មីៗកន្លងទៅ សារព័ត៌មាននៅក្នុងស្រុកមួយចំនួន ក៏បានធ្វើសេចក្តីរាយការណ៍ថា ធនាគារជាតិបានលើកឡើងថា ដើម្បីជំរុញចលនានៃវិស័យសំណង់ រដ្ឋាភិបាលបានបញ្ចេញនូវមូលប័ត្ររដ្ឋាភិបាល ដែលមានតម្លៃប្រមាណជា ១២០ លានដុល្លារ ដើម្បីជំរុញកំណើននៃការតភ្ជាប់ឧស្សាហកម្ម ។ ប្រភពខ្លះបានបង្ហើបថា ប្រាក់ឥណទានលើលើសំណង់មកដល់ពេលនេះ គឺមានតម្លៃសរុប ប្រមាណជា ៥,៤ ពាន់លានដុល្លារ ។
ចែករំលែកព័តមាននេះ