ទីផ្សារចិនបានបើកទទួលផលិតផលកសិកម្មពីកម្ពុជាជាបន្តបន្ទាប់ ដែលមកដល់ពេលនេះមានប្រមាណជា១៦មុខហើយ ដូច្នេះប្រសិនបើកម្ពុជាអាចទាក់ទាញ និងលើកទឹកចិត្តឲ្យពលរដ្ឋចិនត្រឹមតែ១០ភាគរយ ទិញផលិតផលមិនបាច់ច្រើនទេ គឺត្រឹមតែ១ដុល្លារក៏មួយឆ្នាំកម្ពុជាអាចរកចំណូលបានជាង២ពាន់លានដុល្លារដែរ ។ លោក វ៉ាង វេនប៊ិន…
ទីផ្សារចិនបានបើកទទួលផលិតផលកសិកម្មពីកម្ពុជាជាបន្តបន្ទាប់ ដែលមកដល់ពេលនេះមានប្រមាណជា១៦មុខហើយ ដូច្នេះប្រសិនបើកម្ពុជាអាចទាក់ទាញ និងលើកទឹកចិត្តឲ្យពលរដ្ឋចិនត្រឹមតែ១០ភាគរយ ទិញផលិតផលមិនបាច់ច្រើនទេ គឺត្រឹមតែ១ដុល្លារក៏មួយឆ្នាំកម្ពុជាអាចរកចំណូលបានជាង២ពាន់លានដុល្លារដែរ ។
លោក វ៉ាង វេនប៊ិន (Wang Wenbin) ឯកអគ្គរដ្ឋទូតចិនប្រចាំនៅកម្ពុជា បានលើកឡើងនៅលើបណ្តាញសង្គមរបស់លោក កាលពីថ្ងៃទី១២ ខែសីហា ឆ្នាំ២០២៥ ដោយអបអរការដែលកម្ពុជាបានដឹកជញ្ជូនទុរេនតាមផ្លូវអាកាសទៅកាន់ទីផ្សារចិន ។
លោកបានលើកឡើងថា ការដឹកជញ្ជូនទុរេនកម្ពុជា តាមផ្លូវអាកាសទៅកាន់ទីផ្សារប្រទេសចិន អាចរក្សាបាននូវគុណភាព និងរសជាតិរបស់វា ដូច្នេះហើយកសិករដែលដាំដំណាំទុរេនចាត់ទុកការដឹកជញ្ជូនតាមអាកាសជាអត្ថប្រយោជន៍ដ៏សំខាន់ ។
បើតាមការលើកឡើងរបស់លោកឯកអគ្គរដ្ឋទូតចិន បច្ចុប្បន្ននេះ ចិនបានផ្តល់ការអនុញ្ញាតឲ្យកម្ពុជាអាចនាំចេញផលិតផលកសិកម្មសរុបប្រមាណ១៦មុខ ។ លោកបានឲ្យដឹងថា កសិផលកម្ពុជាចំនួន១៦មុខ ដែលត្រូវបានអនុញ្ញាតិក្នុងការនាំចេញទៅកាន់ទីផ្សារប្រទេសចិន ក្នុងនោះរួមមានអង្ករ ដំឡូងមីស្ងួត ពោត ចេក ស្វាយ មៀន ដូង ម្រេច គ្រាប់ស្វាយចន្ទី ល្ង គ្រាប់ជី កៅស៊ូ ជលផលធម្មជាតិ ជលផលចិញ្ចឹម មច្ឆា និងទុរេន ។ លោកបានលើកឡើងថា ទាំងនេះបង្ហាញពីសន្ទុះដ៏រឹងមាំ និងសមិទ្ធផលផ្លែផ្កាគួរកត់សម្គាល់នៃកិច្ចសហប្រតិបត្តិការរវាងប្រទេសទាំងពីរ ។
មកដល់ពេលនេះចិន គឺជាទីផ្សារធំបំផុតមួយនៅលើពិភពលោក ហើយប្រទេសជាច្រើន គឺមានបំណងចង់ទទួលបានការអនុញ្ញាតលើការនាំចេញផលិតផលនានាចូលទៅកាន់ប្រទេសចិន ។ មកដល់ពេលបច្ចុប្បន្ននេះ ទោះបីជាប្រជាពលរដ្ឋចិនធ្លាក់នៅលំដាប់ទី២បន្ទាប់ពីឥណ្ឌាក៏ពិតមែន ប៉ុន្តែនៅទូទាំងប្រទេសដែលមានសេដ្ឋកិច្ចធំលំដាប់ទី២ នៅលើពិភពលោកនេះ គឺមានទីផ្សារដល់ទៅ១៤០០លាននាក់ ។
ផ្អែកតាមទីផ្សារនេះ អ្នកវិភាគមួយរូបបានលើកឡើងថា កម្ពុជាគួរតែសិក្សាហើយព្យាយាមកំណត់គោលដៅ នាំចេញផលិតផលដែលទទួលការអនុញ្ញាតទៅចិនឲ្យបានត្រឹមត្រូវ ។ លោកបានបន្តថា នៅក្នុងករណីដែលទីផ្សារត្រូវបានកំណត់គោលដៅច្បាស់លាស់ ហើយនោះ កម្ពុជានឹងអាចទទួលបានឱកាសកាន់តែទូលំទូលាយនៅក្នុងការពង្រឹងវិស័យកសិកម្ម។ លោកបានបន្តថា ត្រឹមតែ១៦មុខនេះ ប្រសិនបើរៀបចំផែនការ និងកំណត់យុទ្ធសាស្ត្រត្រឹមត្រូវ ផលិតផលកសិកម្មកម្ពុជាមិនខ្សត់ទីផ្សារឡើយ ។
លោកបានបន្តថា នៅក្នុងចំណោមផលិតផលទាំងនេះ ប្រសិនបើកម្ពុជាអាចមានសមត្ថភាពទាក់ទាញ និងលើកទឹកចិត្តពលរដ្ឋចិនមិនបាច់ច្រើនទេ គឺត្រឹមតែ១០ភាគរយនៃប្រជាជនសរុបចំណាយលុយពួកគេមួយឆ្នាំទិញផលិតផលកម្ពុជាត្រឹមតែមួយមុខម្នាក់មួយដុល្លារ មួយឆ្នាំ ក៏ផលិតផលកសិកម្មកម្ពុជាទាំងនោះ អាចនាំចេញបានជាង២ពាន់លានដុល្លារផងដែរ ។
អ្នកវិភាគរូបនេះបានលើកទឹកចិត្តឲ្យអ្នកនាំចេញរិះគិត និងរៀបចំយុទ្ធសាស្ត្រទីផ្សារឲ្យច្បាស់លាស់ ដើម្បីច្បាមសក្តានុពលសម្រាប់អភិវឌ្ឍន៍ប្រទេស ។
អ្វីដែលអ្នកវិភាគបានលើកឡើងនេះ គឺគ្រាន់តែជាក្តីរំពឹង និងការប៉ាន់ប្រមាណបែបឧបមាណវិធីតែប៉ុណ្ណោះ ប៉ុន្តែតាមជាក់ស្តែង ៧ខែកន្លងមក អគ្គនាយកដ្ឋានគយ និងរដ្ឋាករកម្ពុជាបានអះអាងថា កម្ពុជាអាចនាំចេញទៅកាន់ប្រទេសនេះ ត្រឹមតែប្រមាណជាត្រឹមតែជាង ៨៨៨ លានដុល្លារប៉ុណ្ណោះ ៕
ចែករំលែកព័តមាននេះ