ចាប់ពីថ្ងៃទី៩ ខែ៩ សប្តាហ៍ក្រោយនេះទៅ ភ្ញៀវទេសចរបរទេសដែលធ្លាប់ស្គាល់កម្ពុជាតាមរយៈច្រកអាកាសយានដ្ឋានអន្តរជាតិភ្នំពេញ អតីតអាកាសយានដ្ឋានពោធិ៍ចិនតុង នឹងស្គាល់កម្ពុជាតាមច្រកអន្តរជាតិមួយថ្មីនៅអាកាសយានដ្ឋានអន្តរជាតិតេជោ ដែលអាកាសយានដ្ឋានសាងសង់ថ្មីរចនាឡើង ដើម្បីលើកកម្ពស់និងកែប្រែមុខមាត់នៃកម្ពុជាបន្ថែមមួយកម្រិតទៀតនៅលើឆាកអន្តរជាតិ ។ នៅថ្ងៃនោះ…
ចាប់ពីថ្ងៃទី៩ ខែ៩ សប្តាហ៍ក្រោយនេះទៅ ភ្ញៀវទេសចរបរទេសដែលធ្លាប់ស្គាល់កម្ពុជាតាមរយៈច្រកអាកាសយានដ្ឋានអន្តរជាតិភ្នំពេញ អតីតអាកាសយានដ្ឋានពោធិ៍ចិនតុង នឹងស្គាល់កម្ពុជាតាមច្រកអន្តរជាតិមួយថ្មីនៅអាកាសយានដ្ឋានអន្តរជាតិតេជោ ដែលអាកាសយានដ្ឋានសាងសង់ថ្មី
រចនាឡើង ដើម្បីលើកកម្ពស់និងកែប្រែមុខមាត់នៃកម្ពុជាបន្ថែមមួយកម្រិតទៀតនៅលើឆាកអន្តរជាតិ ។ នៅថ្ងៃនោះ វាគឺជាការបើកទំព័រសក្ករាជថ្មីនៃវិស័យអាកាសចរណ៍ស៊ីវិលនៅកម្ពុជា ចាប់តាំងពីវាបានកកើតឡើងហើយលិចអណ្តែតទៅតាមបរិបទនៃប្រវត្តិសាស្ត្រកម្ពុជាចាប់តាំងពីឆ្នាំ ១៩៥៩ មកនោះ ។
ចាប់ពីថ្ងៃនោះតទៅ រាល់ប្រតិបត្តិការដឹកជញ្ជូនតាមផ្លូវអាកាសភ្ជាប់មកកាន់រាជធានីភ្នំពេញ ដែលជាមជ្ឈមណ្ឌលសេដ្ឋកិច្ច នយោបាយ វប្បធម៌ និង ប្រវត្តិសាស្ត្រនៃកម្ពុជា នឹងដំណើរការតាមរយៈអាកាសយានដ្ឋានអន្តរជាតិតេជោ ក្រោយពេលដែលអាកាសយានដ្ឋានអន្តរជាតិភ្នំពេញបានដំណើរការអស់រយៈពេល ៦៦ឆ្នាំកន្លងមក ។
តាមការបញ្ជាក់របស់លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល កាលពីពេលថ្មីៗនេះបានឲ្យដឹងថា អ្វីៗសម្រាប់ដាក់ឲ្យដំណើរការនូវប្រតិបត្តិការអាកាសយានដ្ឋានថ្មីនេះត្រូវបានបញ្ចប់ការសាងសង់និងសាកល្បងសឹងតែអស់ហើយ ។ ក្រៅពីសេវាកម្មនិងប្រតិបត្តិការនានានៅព្រលានដំណើរការហើយនោះ ការដាក់ឲ្យដំណើរការហោះហើរសាកល្បងនូវយន្តហោះពាណិជ្ជកម្ម អ៊ែបឹស ៣២០ កាលពីថ្ងៃទី ១៥ ខែសីហា ឆ្នាំ២០២៥ថ្មីៗនេះក៏ទទួលបានជោគជ័យផងដែរ ។ តាមប្រភព ការដាក់ឲ្យសាកល្បងនោះ គឺអ្នកជំនាញបានសាកល្បងប្រតិបត្តិការជាច្រើនរួមទាំង ប្រព័ន្ធនាំផ្លូវអាកាស, វិទ្យុទាក់ទង, ប្រព័ន្ធបញ្ជាហោះហើរ, ការចល័ត និងសម្ភារចេញចូលសម្រាប់អ្នកដំណើរជាដើម។ល។
អាកាសយានដ្ឋានថ្មីនេះបានចាប់ផ្តើមកសាងនៅឆ្នាំ២០២០ ក្រោមគម្រោងវិនិយោគដោយក្រុមហ៊ុន Cambodia Airport Investment Co., Ltd ហើយសាងសង់ដោយក្រុមហ៊ុនសាជីវកម្មវិស្វកម្មសំណង់រដ្ឋចិន នៅក្រោមកម្លាំងពលកម្មជាកម្មករនិងកម្មការនី ក៏ដូចជាអ្នកជំនាញ និង វិស្វករកម្ពុជាជាច្រើនរូបចូលរួមពាក់ព័ន្ធ។
អាកាសយានដ្ឋានថ្មីនេះ មានតម្លៃសរុបប្រមាណជា ១,៥ពាន់លានដុល្លារ លើផ្ទៃដី ២.៦០០ហិកតានៅភាគខាងត្បូងខេត្តកណ្តាល និងខេត្តតាកែវ ដែលមានចម្ងាយប្រហែល២០គីឡូម៉ែត្រពីរាជធានីភ្នំពេញ។ អាកាសយានដ្ឋានថ្មីនេះ ត្រូវបានចាត់ថ្នាក់ជាអាកាសយានដ្ឋានកម្រិត 4F ដែលជាកម្រិតខ្ពស់បំផុតក្នុងពិភពលោក ដែលអាចទទួលយន្តហោះគ្រប់ប្រភេទ រួមទាំងយន្តហោះ ខ្នាតយក្ស ដូចជា Airbus A380-800 និង យន្តហោះ Boeing 747-800 ជាដើមចុះចតបាន ។ អាកាសយានដ្ឋានថ្មីនេះ អាចនឹង មានសមត្ថភាពបម្រើសេវាកម្មដឹកជញ្ជូន អ្នកដំណើររហូតដល់ ១៣ លាននាក់ក្នុងមួយឆ្នាំក្នុងដំណាក់កាលដំបូង។
តាមការបង្ហើបបន្ទាប់ពី បើកដំណើរការនៅថ្ងៃទី ៩ ខែកញ្ញា វេលាម៉ោង ៧:00 ព្រឹក ម៉ោងក្នុងស្រុក ហើយពិធីសម្ភោធផ្លូវការគ្រោងនឹង ដំណើរការនៅក្នុងអំឡុងថ្ងៃទី២០ ខែតុលា ក្រោមអធិបតីភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។ ជាមួយនឹងសមិទ្ធផលថ្មីនេះ វិស័យអាកាសចរណ៍ស៊ីវិលរបស់កម្ពុជាត្រូវបានគេព្យាករណ៍ថា នឹងបោះជំហានឈានចូលដំណាក់កាលផ្លាស់ប្តូរថ្មីបំផុតមួយ ។ ក្នុងរយៈពេល៥ ឆ្នាំខាងមុខ អាកាសយានដ្ឋានថ្មីនេះនឹងក្លាយទៅជាមជ្ឈមណ្ឌលភស្តុភាកម្ម និង អាកាសចរណ៍ក្នុងតំបន់ជាមួយនឹងការឈានទៅដល់សកលលោក ដែលជំរុញដោយហេដ្ឋារចនាសម្ព័ន្ធទំនើប ភាពជាដៃគូយុទ្ធសាស្ត្រ និងតម្រូវការកើនឡើង។
អាកាសយានដ្ឋានដ៏ថ្មីស្រឡាងនេះ នឹងលើកកម្ពស់សមត្ថភាពនៃការប្រកួតប្រជែងផ្នែកសេវាកម្មអាកាសចរណ៍មួយរបស់កម្ពុជា ហើយវារំពឹងថា នឹងអាចជួយទាក់ទាញក្រុមហ៊ុនអាកាសចរណ៍អន្តរជាតិសំខាន់ៗនានា លើកកម្ពស់វិស័យសេដ្ឋកិច្ចនិងទេសចរណ៍ ពង្រឹងលទ្ធភាពនិងសក្តានុពលនៅក្នុងការធ្វើសមាហរណកម្មទៅក្នុងតំបន់ ហើយជាពិសេសគឺពង្រឹងភាពជាដៃគូជាមួយនឹងប្រទេសនានា ដើម្បីផលប្រយោជន៍ជាតិនិងប្រជាជាតិ ។
មកដល់ពេលនេះ កេរ្តិ៍ឈ្មោះនិងមុខមាត់របស់ប្រទេសនីមួយៗគឺវាបើកឡើងតាមច្រកអាកាសយានដ្ឋាននេះតែម្តង ដូច្នេះអាកាសយានដ្ឋានថ្មីនេះ ធានាថា នឹងលើកកម្ពស់កិត្យានុភាពនិងមុខមាត់កម្ពុជា នៅក្នុងយុគសម័យមួយថ្មីនៅពាក់កណ្តាលនៃទស្សវត្សរ៍ទី២នៃសតវត្សរ៍ទី២១ ហើយយើងសង្ឃឹមថា វានឹងពង្រីកជើងមេឃនៃវិស័យដឹកជញ្ជូនផ្លូវអាកាសកម្ពុជាឲ្យកាន់តែទូលំទូលាយជាងមុន ។
ចែករំលែកព័តមាននេះ