រឿងព្រះសង្ឃមួយក្រុម នៅក្នុងរថយន្តទំនើបមួយគ្រឿង ហើយបើកបរដោយព្រះសង្ឃផ្ទាល់ថែមទៀតបានកំពុងតែចែករំលែកនៅលើបណ្តាញសង្គមហ្វេសប៊ុករហូតដល់កើតមានជាសំនួរថា តើសកម្មភាព និងទង្វើរបែបនេះខុសឬត្រូវ ? រឿងនេះត្រូវបានគេដឹងថា បានកើតឡើងតាំងពីថ្ងៃទី២៤ ខែសីហា ឆ្នាំ២០២៥…
រឿងព្រះសង្ឃមួយក្រុម នៅក្នុងរថយន្តទំនើបមួយគ្រឿង ហើយបើកបរដោយព្រះសង្ឃផ្ទាល់ថែមទៀតបានកំពុងតែចែករំលែកនៅលើបណ្តាញសង្គមហ្វេសប៊ុករហូតដល់កើតមានជាសំនួរថា តើសកម្មភាព និងទង្វើរបែបនេះខុសឬត្រូវ ?
រឿងនេះត្រូវបានគេដឹងថា បានកើតឡើងតាំងពីថ្ងៃទី២៤ ខែសីហា ឆ្នាំ២០២៥ នៅក្រោយពេលដែលកើតហេតុមានការជជែកគ្នាជាមួយនឹងប្រជាពលរដ្ឋតាមដងផ្លូវ លេខ២៧១ ក្នុងភូមិសាស្ត្រខណ្ឌទួលគោក រាជធានីភ្នំពេញ ។
នៅក្នុងរថយន្តនោះ ត្រូវបានគេដឹងថា គឺជារថយន្តឡិចស៊ីសទំនើបមួយគ្រឿងពណ៌ស ។ តាមអ្វីដែលប្រជាពលរដ្ឋថតហើយបង្ហោះនៅលើបណ្តាញសង្គម គឺឃើញព្រះសង្ឃនៅក្នុងរថយន្តនោះ ហើយអ្វីដែលសំខាន់ទៅទៀតនោះ គឺរថយន្តនោះ គឺបើកបរដោយព្រះសង្ឃផ្ទាល់ថែមទៀតផងដែរ ។
បើតាមការចែករំលែក ប្រភពដដែលបានបន្តទៀតថា ក្រៅពីទិដ្ឋភាពចម្លែកបែបនោះ អ្វីដែលគួរឲ្យកត់សម្គាល់នោះ គឺឃើញមានព្រះសង្ឃមួយអង្គ បានចុះមកសម្របសម្រួលផងដែរជាមួយនឹងប្រជាពលរដ្ឋ ។ សកម្មភាពបែបនោះ គឺត្រូវបានបង្ហាញតាមរយៈកាយវិការ ពាក្យសម្តី និងសកម្មភាពដែលគេបានផ្សព្វផ្សាយ ។
នៅពេលដែលឃើញសកម្មភាពបែបនេះប្រជាពលរដ្ឋក៏បានកើតជាចម្ងល់ ហើយដាក់ជាសំនួរសុំការវែកញែកលើករណីនេះ ។
តាមការផ្សព្វផ្សាយ ការបញ្ចេញយោបល់ និងទស្សនៈ ប្រជាពលរដ្ឋក៏បានសំណូមពរសុំអោយមន្ទីរធម្មការនិងសាសនា ធ្វើការត្រួតពិនិត្យមើលករណីនេះផងដែរ ។
ក្រោយពេលដែលទទួលបានវីដេអូចែករំលែកតៗគ្នាបែបនេះក៏មានប្រជាពលរដ្ឋជាច្រើនចូលមករិះគន់ដោយលើកឡើងថា នេះ គឺជាសកម្មភាពខុសធម៌វិន័យ ឬបរាជិក …។ល។
ពលរដ្ឋខ្លះបានលើកឡើងថា សកម្មភាពដែលព្រះសង្ឃកាន់ចង្កូតបញ្ជារថយន្តដោយ ខ្លួនឯងបែបនេះមិនសមឡើយដោយសារតែ នៅកម្ពុជាកម្រឃើញព្រះសង្ឃបើកបរដោយខ្លួនឯងណាស់ ។
ប្រជាពលរដ្ឋមួយចំនួនទៀតបានបន្តថែមទៀតថា ព្រះសង្ឃមិនគួរបើករថយន្តដោយខ្លួនឯងឡើយ ពីព្រោះនេះជាសកម្មភាពពុំសមរម្យឡើយ ក្នុងប្រទេសកម្ពុជា ដោយសារព្រះសង្ឃជាច្រើនអង្គ គឺមិនដែលឃើញព្រះសង្ឃអង្គណាបញ្ជាចង្កូតយានយន្តដោយខ្លួនឯងឡើយ ។
រីអ្នកខ្លះទៀតក៏បានលើកឡើងថា គ្រហស្ថដែលជាសមញ្ញជនធម្មតាដែលបានលើកឡើងថា សកម្មភាពខាងលើជាសកម្មភាពខុសវិន័យ ហើយសកម្មភាពបែបនេះត្រូវបារាជិក នោះក៏គួរកុំនិយាយ បើមិនដឹង ។ ពួកគេលើកឡើងថា វិន័យព្រះសង្ឃមិនស្ថិតនៅលើមាត់របស់យើងចេះតែថានោះទេ ប៉ុន្តែផ្ទុយទៅវិញព្រះសង្ឃខ្លួនឯងក៏មិនគួរបណ្ដោយខ្លួនប៉ាតណាប៉ាតណីដែរ ។
សរុបទៅនេះ គឺជាកិច្ចការជំនាញរបស់ក្រសួងធម្មការ និងសាសនា ព្រមទាំងគណសង្ឃនាយកនៃព្រះរាជាណាចក្រកម្ពុជា ដែលគួរតែសិក្សាស៊ើបអង្កេត និងសម្រេចទៅតាមច្បាប់ និងធម៌វិន័យត្រឹមត្រូវ ។ ជាការពិតរឿងព្រះសង្ឃបើករថយន្តនេះ ប្រហែលជាមិនមានចែងនៅក្នុងធម៌វិន័យឡើយពីព្រោះថា នៅសម័យព្រះពុទ្ធអង្គ សង្គមមនុស្សមិនទាន់មានយានប្រភេទនេះប្រើប្រាស់នៅឡើយ ។ ប៉ុន្តែប្រសិនបើនិយាយអំពីកាយវិការ សកម្មភាព ឥរិយាបទ ប្រាកដជានឹងមានចំណុចឬខណាមួយកំណត់មិនខាន ៕
ចែករំលែកព័តមាននេះ