រឿងរ៉ាវដែលលើកឡើងខាងក្រោមនេះ វាមិនមែនជារឿងរ៉ាវដែលកើតមានឡើងនៅកម្ពុជាទេ ។ វា គឺជារឿងដែលកើតឡើងនៅប្រទេសថៃ ។ ប៉ុន្តែទោះបីជាយ៉ាងណាក៏ដោយវាក៏ជាបទពិសោធមួយ ដែលស្ថាប័នសាសនានានានៅកម្ពុជាក៏ដូចជា មូលនិធិសង្គមនានាចាំបាច់ត្រូវគិតគូរ ដើម្បីតម្លាភាព…
រឿងរ៉ាវដែលលើកឡើងខាងក្រោមនេះ វាមិនមែនជារឿងរ៉ាវដែលកើតមានឡើងនៅកម្ពុជាទេ ។ វា គឺជារឿងដែលកើតឡើងនៅប្រទេសថៃ ។ ប៉ុន្តែទោះបីជាយ៉ាងណាក៏ដោយវាក៏ជាបទពិសោធមួយ ដែលស្ថាប័នសាសនានានានៅកម្ពុជាក៏ដូចជា មូលនិធិសង្គមនានាចាំបាច់ត្រូវគិតគូរ ដើម្បីតម្លាភាព ហើយជាពិសេស គឺការចាត់ចែងមូលនិធិ ។
យោងតាមការចុះផ្សាយនៅអត្ថបទមួយ នៅលើទំព័រសារព័ត៌មានថៃមួយបានឲ្យដឹងថា កំពូលព្រះសង្ឃថៃដ៏ល្បីល្បាញមួយអង្គ ដែលបានផ្តួចផ្តើម ហើយដំណើរការនូវកម្មវិធីមូលនិធិទ្រទ្រង់ជំងឺអេដស៍នៅក្នុងប្រទេសថៃ ឥឡូវនេះត្រូវបានអាជ្ញាធរថៃរកឃើញរឿងអាស្រូវដែលមានទឹកប្រាក់រាប់សិបពាន់លានបាត ។
ព្រះចៅអធិការ ហ្លួងផូ អាឡុងកុត (Luang Pho Alongkok) នៅវត្តប្រាបាតណាមភូ (Phra Paht Nam Phu) ក្នុងខេត្តលបបុរី (Lopburi) ត្រូវបានអាជ្ញាធរថៃនាំខ្លួនទៅផ្សឹកហើយ ក្រោយពេលដែលដឹកនាំវត្តហើយបន្សល់ទុកនូវរឿងអាស្រូវមានទឹកប្រាក់ដ៏លើសលុបបំផុត ។
អតីតព្រះចៅអធិការរូបនេះ បានសាងកេរ្តិ៍ឈ្មោះរបស់គាត់នៅឆ្នាំ១៩៩២ ដោយយកវត្ត នេះជាជម្រកសម្រាប់អ្នកជំងឺអេដស៍ អំឡុងពេលមានការរាតត្បាតដំបូង នៅក្នុងប្រទេសថៃ ។ នៅពេលដែលការរើសអើងកើតមាន និងការព្យាបាលមានកម្រិត ។ នៅពេលនោះ វត្តនេះបានក្លាយជាទីសក្ការៈដែលទាក់ទាញការចាប់អារម្មណ៍ពីប្រព័ន្ធផ្សព្វផ្សាយទូទាំងប្រទេស និងទទួលបាននូវការបរិច្ចាគយ៉ាងច្រើនលើសលុប ។ ប៉ុន្តែនៅថ្ងៃទី២៦ ខែសីហាឆ្នាំ២០២៥ បេសកម្មរយៈពេល៣២ឆ្នាំត្រូវបានបញ្ចប់។
ព្រះចៅអធិការរូបនេះ ត្រូវបានអាជ្ញាធរនាំខ្លួន និងចោទប្រកាន់ពីបទលាងលុយកខ្វក់ជាមួយនឹងអ្នកដែលពាក់ព័ន្ធមួយចំនួន ។
លោក ចារឿនគៀត ផានឃៀវ (Charoenkiat Pankaew ) មេប៉ូលីស ដែលដឹកនាំការស៊ើបអង្កេត ហៅគម្រោងនេះថា សិល្បៈធម៌នៃការបោកប្រាស់ ដែលជាការសម្តែងដ៏ល្អិតល្អន់ដែលត្រូវបានរៀបចំឡើង ដើម្បីបញ្ឆោតអ្នកឧបត្ថម្ភជាច្រើន ។
លោកបានបន្តថា គម្រោងនេះ មិនមែនជាគម្រោងធម្មតាដំណើរការតាមវត្តនោះទេ ប៉ុន្តែវាមានរចនាសម្ព័ន្ធ ដែលគ្រប់គ្រងតាមបែបបទជាក្រុមហ៊ុនឯកជន ដោយមានមន្ត្រីប្រមូល និងគ្រប់គ្រងមូលនិធិជាប្រព័ន្ធតាមបណ្តាញជាច្រើ ហើយទំហំទឹកប្រាក់អាចឈានដល់រាប់សិបពាន់លានបាត ក្នុងរយៈពេលជាច្រើនឆ្នាំ ។
សមត្ថកិច្ចប៉ូលិសថៃ ក៏បានរកឃើញផងដែរថា ព្រះសង្ឃអង្គនេះ មានឈ្មោះពិតថា គ្រៀនក្រៃ ផាកែវ ( Kriangkrai Phetkaew ) ប៉ុន្តែគាត់បានលួចអត្តសញ្ញាណរបស់មិត្តរួមក្រុមបាល់ទាត់នៅសាលាដែលបានស្លាប់មួយរូបឈ្មោះថា អាឡុងកុត ភូមូក ( Alongkot Polmuk ) ហើយមិនត្រឹមតែប៉ុណ្ណឹងទេ គឺបានប្រើប្រាស់ឈ្មោះឪពុកម្តាយរបស់គាត់ដើម្បីបើកគណនីមូលនិធិផងដែរ។
អតីតព្រះចៅអធិការរូបនេះក៏បានត្រូវអាជ្ញាធររកឃើញថា លោកគ្មានសញ្ញាបត្រដូចដែលបានអួតថា សុទ្ធតែមាន សញ្ញាបត្រពីសាកលវិទ្យាល័យ កាសេតសាត ( Kasetsart) ហើយក៏គ្មានអនុបណ្ឌិតផ្នែកវិស្វកម្មពីប្រទេសអូស្ត្រាលីអ្វីដែរ ។ លោកបានសារភាពថា ខ្លួនមិនបានរៀនចប់វិជ្ជាជីវៈអ្វីជ្រៅជ្រះទេ ហើយមិនតែប៉ុណ្ណោះ គឺធ្លាប់បានរត់គេចពីកាតព្វកិច្ចយោធាទៅប្រទេសម៉ាឡេស៊ីមួយរយៈ មុនពេលត្រឡប់មកបួសវិញ ដោយដើមឡើយមានគម្រោងត្រឹមតែស្នាក់នៅបណ្តោះអាសន្នប៉ុណ្ណោះ ។
ក្រុមការងារមូលនិធិនេះ គ្រប់គ្រងជាប្រព័ន្ធក្រុមហ៊ុន ប៉ុន្តែទោះបីជាយ៉ាងណាក៏ដោយការគ្រប់គ្រង គឺគ្មាន ប៉ុន្តែអាជ្ញាធរបានរកឃើញមានការចាត់ចែងដកមូលនិធិទៅទិញផ្ទះទំនើបៗ ទិញរថយន្ត ហើយសូម្បីតែទិញឧទ្ធម្ភាគចក្រ ។
មកដល់ពេលនេះ ព្រះពុទ្ធសាសនានៅកម្ពុជា គឺប្រហាក់ប្រហែលនឹងថៃ ហើយក៏មានកិច្ចការសង្គម និងមូលនិធិអភិរក្សខ្លះៗកំពុងតែដំណើរការដែរ ។ ប៉ុន្តែអ្វីដែលសង្ឃឹម គឺថាអ្នកដែលពាក់ព័ន្ធនៅក្នុងគម្រោងទាំងនេះ នឹងគ្រប់គ្រងកញ្ចប់មូលនិធិឲ្យបានត្រឹមត្រូវ មានរបាយការណ៍ចំណូលចំណាយ ។ គ្រប់គម្រោង គ្រប់សកម្មភាព សូមលើកកម្ពស់ និងអនុវត្តទៅតាមកម្មវិធី និងមានគោលដៅច្បាស់លាស់ ក្រោមការតម្រង់ទិសកម្មវិធីឲ្យត្រឹមត្រូវ ។
សូមកុំយកសាសនាដែលប្រជាពលរដ្ឋគោរព និងផ្តល់តម្លៃ ដើម្បីកែប្រែជាច្រករកប្រាក់ដើម្បីហ៊ឺហា និងសប្បាយខុសធម៌វិន័យដូចជា អ្វីដែលបានកើតមានឡើងនៅក្នុងសង្គមនៅថៃនាពេលបច្ចុប្បន្ននេះ ៕
ចែករំលែកព័តមាននេះ