ប្រជាជនកម្ពុជាកាន់តែមានមនិ្នការប្រើលុយរៀលជំនួសការប្រើប្រាស់លុយដុល្លារក្នុងជីវភាពរស់នៅប្រចាំថ្ងៃ។ នេះបើតាមការសម្ភាសន៍ជាមួយប្រជាជនផ្ទាល់ និងរបាយការណ៍របស់ធនាគារជាតិកម្ពុជា ។ ធនាគារជាតិនៃកម្ពុជាបានអះអាងថា ប្រាក់រៀលដែលជារូបិយវត្ថុជាតិ នៅឆមាសទី១ ដើមឆ្នាំ២០២៥នេះ បានទទួលកំណើនឡើងប្រមាណជា១,៦ភាគរយធៀបនឹងរយៈពេលដូចគ្នា កាលពីឆ្នាំ២០២៤កន្លងទៅ…
ប្រជាជនកម្ពុជាកាន់តែមានមនិ្នការប្រើលុយរៀលជំនួសការប្រើប្រាស់លុយដុល្លារក្នុងជីវភាពរស់នៅប្រចាំថ្ងៃ។ នេះបើតាមការសម្ភាសន៍ជាមួយប្រជាជនផ្ទាល់ និងរបាយការណ៍របស់ធនាគារជាតិកម្ពុជា ។
ធនាគារជាតិនៃកម្ពុជាបានអះអាងថា ប្រាក់រៀលដែលជារូបិយវត្ថុជាតិ នៅឆមាសទី១ ដើមឆ្នាំ២០២៥នេះ បានទទួលកំណើនឡើងប្រមាណជា១,៦ភាគរយធៀបនឹងរយៈពេលដូចគ្នា កាលពីឆ្នាំ២០២៤កន្លងទៅ ។ ស្ថាប័នអាណាព្យាបាលលើរូបិយវត្ថុជាតិ និងស្ថាប័នហិរញ្ញវត្ថុនានានៅក្នុងប្រទេសកម្ពុជាបានអះអាងនៅក្នុងរបាយការណ៍៦ខែ ដែលខ្លួនបានផ្សព្វផ្សាយកាលពីចុងសប្តាហ៍កន្លងទៅនេះថា ប្រាក់រៀលនៅតែបន្តមានស្ថិតភាពល្អ ប្រសើរ ព្រមទាំងកំពុងតែមាននិន្នាការឡើងថ្លៃបន្ថែមទៀតផង ។
ប្រភពដដែលបានបន្តតៀតថា ដោយសារតែកំណើនតម្រូវការប្រាក់រៀលសម្រាប់ការប្រើប្រាស់នៅក្នុងវិស័យកសិកម្ម ការទូទាត់អេឡិចត្រូនិក និងការបង់ពន្ធ ។ លើសពីនេះ ការប្រែប្រួលរបស់អត្រាប្តូរប្រាក់ទៅតាមកត្តារដូវកាលក៏មានកម្រិតផងដែរដែលកត្តានេះ បានរួមចំណែកថែមទៀតលើការបង្កើនទំនុកចិត្តលើប្រាក់រៀល ។
ប្រភពដដែលបានបន្តថា ជាមធ្យមអត្រាប្តូរប្រាក់នៅឆមាសទី១នេះ មានកម្រិត៤.០១១រៀល ក្នុងមួយដុល្លារ ដែលប្រាក់រៀលបានឡើងថ្លៃ១,៦ភាគរយ ធៀបនឹងគ្រាដូចគ្នាឆ្នាំ២០២៤ ។ ក្រៅពីនោះទីផ្សារប្តូរប្រាក់អន្តរធនាគារលើថ្នាលធនាគារជាតិនៃកម្ពុជានៅឆមាសទី១ គឺមានទំហំ១,៨ ពាន់លានដុល្លារ ស្មើនឹង៨៦៧ ប្រតិបត្តិការដែលបានកើនឡើង៤៣,៤ភាគរយធៀបនឹងរយៈពេលដូចគ្នាឆ្នាំមុន ។
ពាក់ព័ន្ធនឹងប្រាក់រៀលនេះ ប្រជាពលរដ្ឋបានសាទរ ហើយក៏ទទួលស្គាល់ថា ប្រាក់រៀលដែលពីមុនហាក់ថមថយប្រជាប្រិយភាពខ្លាំង នៅក្នុងប្រព័ន្ធដោះដូរនានាពីដើមទស្សវត្សរ៍នៃឆ្នាំ១៩៩០ ដល់ទស្សវត្សរ៍នៃឆ្នាំ២០២០ ប៉ុន្តែនៅពេលនេះ គឺមានការប្រើប្រាស់ទូលំទូលាយវិញហើយ ។
លោក ទុំ បញ្ញា ជាប្រជាពលរដ្ឋវ័យ៤៩ឆ្នាំ មួយរូបបានឲ្យដឹងថា ប្រាក់រៀលពីមុនមកមិនសូវមានអ្នកដាក់នៅក្នុងកាបូបទេ ប៉ុន្តែពេលនេះ គឺត្រូវបានគេដាក់ពេញកាបូប មិនសូវមានដុល្លារទេ ។ លោកបានបញ្ជាក់ថា« ទាំងខ្ញុំទាំងគេឥឡូវនេះបើមិនប្រើ QR កូដទេ គឺប្រើលុយរៀលច្រើន ដោយសារពេលទៅផ្សារទិញឥវ៉ាន់អី បើចាយដុល្លារ គឺពេលគេអាប់ក៏គេអាប់ជាលុយរៀលភាគច្រើនដែរ » ។
ដោយឡែក កញ្ញា ស្រីណេត ដែលជាមន្ត្រីក្រុមហ៊ុនមួយរូបបានលើកឡើងថា ឥឡូវនេះបើទៅដកលុយជាទូទៅគឺដកលុយជាលុយរៀល បើមិនឥចឹងទេ គឺចាយតាម QR ។ កញ្ញាបានឲ្យដឹងថា ឥឡូវនេះតាមការ៉ាសសាំង ហាងទំនើបនានា គឺគេគិត និងទូទាត់លុយរៀលជាចម្បងច្រើន ។
ចលនានៃការប្រើប្រាស់លុយរៀលកាន់តែមានការគាំទ្រច្រើនឡើងៗ ក្រោយពេលដែលធនាគារជាតិបានធ្វើយុទ្ធនាការ និងលើកទឹកចិត្តឲ្យប្រើប្រាស់លុយរៀលជាបន្តបន្ទាប់ នៅក្នុងរយៈពេលប៉ុន្មានឆ្នាំចុងក្រោយមកនេះ ៕
ចែករំលែកព័តមាននេះ