បន្ទាប់ពីកត់ត្រានូវកំណើននៃទុនវិនិយោគសម្រេចបាន កាលពីរយៈពេល៧ខែនៃឆ្នាំ២០២៥ រហូតដល់ដាច់ខែសីហា កម្ពុជាអាចនឹងបន្តបំបែកកំណត់ត្រាលើការទាក់ទាញវិនិយោគបន្ថែមមួយកម្រិតឡើងបន្ថែមទៀត ។ អំឡុងរយៈពេលពីខែមករា ដល់ ខែកក្កដា ឆ្នាំ២០២៥ កម្ពុជាបានទាក់ទាញគម្រោងវិនិយោគសរុប៤៤០…
បន្ទាប់ពីកត់ត្រានូវកំណើននៃទុនវិនិយោគសម្រេចបាន កាលពីរយៈពេល៧ខែនៃឆ្នាំ២០២៥ រហូតដល់ដាច់ខែសីហា កម្ពុជាអាចនឹងបន្តបំបែកកំណត់ត្រាលើការទាក់ទាញវិនិយោគបន្ថែមមួយកម្រិតឡើងបន្ថែមទៀត ។
អំឡុងរយៈពេលពីខែមករា ដល់ ខែកក្កដា ឆ្នាំ២០២៥ កម្ពុជាបានទាក់ទាញគម្រោងវិនិយោគសរុប៤៤០ គម្រោងក្រោមទុនវិនិយោគជាង៦,៧ ពាន់លានដុល្លារ ដោយនៅក្នុងនោះទុនវិនិយោគ៤,៧ពាន់លានដុល្លារ គឺនៅលើវិស័យឧស្សាហកម្ម ១,៥ពាន់លានដុល្លារលើវិស័យហេដ្ឋារចនាសម្ព័ន្ធ, ៣៥៦លានដុល្លារលើវិស័យកសិកម្ម និងកសិឧស្សាហកម្ម, ហើយ១៦៧លានដុល្លារទៀត គឺលើវិស័យទេសចរណ៍ ។ គម្រោងទាំងនេះនឹងបង្កើតការងារធ្វើបានរហូតដល់ទៅជាង៣១ម៉ឺននាក់ ។
ក្រោយពីស្ថានភាពមានភាពអំណោយផលខ្លាំង៧ ខែមកដល់ចុងខែសីហានេះ អ្វីដែលក្រុមប្រឹក្សាអភិវឌ្ឍន៍កម្ពុជាបានបង្ហើបនោះ គឺថា កម្ពុជាអាចនឹងផ្តល់ភ្លើងខៀវដល់គម្រោងដែលមានលក្ខណៈគ្រប់គ្រាន់សរុប១៣គម្រោងបន្ថែម ។ បើតាមអ្វីដែលក្រុមប្រឹក្សាវិនិយោគកម្ពុជា បានបង្ហើបនោះគឺថា គម្រោងវិនិយោគដែលមាន លក្ខណៈសម្បត្តិទាំងនេះ គឺមានទុនវិនិយោគសរុបប្រមាណ៩៩លានដុល្លារ ហើយអាចបង្កើតការងារបានប្រមាណជាជាង៥ពាន់កន្លែងបន្ថែមទៀត ។
គម្រោងវិនិយោគទាំងនេះ មានមុខសញ្ញាវិនិយោគក្នុងវិស័យឧស្សាហកម្មចំនួន១១គម្រោង រួមមាន គម្រោងបង្គំដំទ្បើងរថយន្ត, ផលិតសម្ភារៈបរិក្ខាសម្រាប់កន្ទុយសណ្តោងរថយន្ត និងគ្រឿងបន្ទាប់បន្សំ,ផលិតសម្ភារៈបំពាក់ និងតុបតែងរថយន្ត, ផលិតបរិក្ខារអគ្គិសនីបំភ្លឺ បរិក្ខារអគ្គិសនីលម្អ និងគ្រឿងបន្ទាប់បន្សំអគ្គិសនីគ្រប់ប្រភេទ, ផលិតដើមណូអែល គ្រឿងលម្អ និងគ្រឿងបន្លាស់ដើមណូអែលគ្រប់ប្រភេទ, ផលិតគ្រឿងសង្ហារឹមគ្រប់ប្រភេទ, ផលិតក្រដាសកាតុង, ផលិតអេប៉ុង, ផលិតថង់ប្លាស្ទិក បង់ស្អិត និងក្រដាសម៉ាកឃឺ ។ ក្រៅពីនោះ គឺមានវិស័យកសិ-ឧស្សាហកម្មចំនួន២គម្រោង គឺគម្រោងរោងចក្រកែច្នៃជ័រកៅស៊ូ ។
គម្រោងវិនិយោគទាំង១៣ដូចបានរៀបរាប់ខាងលើនេះ គឺគេបានដាក់ស្នើបោះទីតាំងនៅរាជធានីភ្នំពេញ ខេត្តកណ្តាល តាកែវ កំពង់ស្ពឺ កំពង់ឆ្នាំង និងត្បូងឃ្មុំ ។
រូបតំណាងដោយAI
ពាក់ព័ន្ធនឹងស្ថានភាពនេះ អ្នកវិភាគបានលើកឡើងថា ជាមួយនឹងគម្រោងនានាដែលបានអនុម័ត និងគម្រោងដែលគ្រោងនឹងអនុម័ត គឺអាចនឹងគ្រប់គ្រាន់ ដើម្បីដោះស្រាយការងារជូនពលករខ្មែរដែលបានធ្វើមាតុភូមិនិវត្តន៍ពីប្រទេសថៃ ក្រោយពេលដែលមានអរិភាពព្រំដែនមក ប្រមាណជា៣០ម៉ឺនទៅ៥០ម៉ឺននាក់ ។
ជាមួយគ្នានោះ អ្នកវិភាគក៏បានសុំចិត្តបងប្អូនពលករថា សូមស៊ូទ្រាំ និងបន្សាំនឹងបរិកាសការងារពីព្រោះជាទូទៅស្ថានភាពការងារនៅក្នុងរោងចក្រអាចនឹងមានក្រិត្យក្រមក៏ដូចជាបែបផែន និងការទទួលខុសត្រូវប្លែកពីការងារមួយចំនួន ដែលបងប្អូនពលករធ្លាប់ធ្វើនៅក្នុងប្រទេសថៃ ។
លោកបានបន្តថា ជាទូទៅបងប្អូនពលករដែលធ្វើមាតុភូមិនិវត្តន៍មកវិញ ប្រសិនបើគាត់ធ្លាប់មានការងារតាមរោងចក្រឧស្សាហកម្ម គឺមិនជាអ្វីទេ ដោយសារតែស្ថានភាពការងារ គឺប្រហាក់ប្រហែលគ្នា ។ ប៉ុន្តែបញ្ហាគឺថា ពលករដែលវិលមកវិញភាគច្រើន គឺជាកម្មករសំណង់ កម្មករបម្រើការងារកសិកម្ម នេសាទ និងសេវាកម្មលក់រាយ ដូច្នេះនៅពេលដែលគាត់ត្រូវមកបម្រើការនៅរោងចក្រឧស្សាហ៍កម្ម គឺវាមិនទម្លាប់ ។ វាអាចមានបញ្ហាខ្លះៗ ប៉ុន្តែប្រសិនបើមានការអំណត់តស៊ូព្យាយាម បន្សាំនឹងការងារនោះវានឹងថ្នឹកឡើង ៕
ចែករំលែកព័តមាននេះ