ការសាងសង់ផ្ទះកំពុងតែមានសន្ទុះឡើងវិញគួរកត់សម្គាល់ ខណៈការទិញគ្រឿងសំណង់ពីបរទេសបានកើនខ្លាំងដល់ជិត៥០ភាគរយ បើប្រៀបធៀបរយៈពេលដូចគ្នា កាលពីឆ្នាំមុន ។ ការនាំចូលសម្ភារៈសំណង់ នៅឆមាសទី១ គឺមានការកើនឡើង៤៦,២ភាគរយ ហើយបរិមាណស៊ីម៉ង់ត៍ផលិតនៅក្នុងស្រុក ដើម្បីបំពេញបម្រើដល់តម្រូវការសាងសង់ក្នុងស្រុក…
ការសាងសង់ផ្ទះកំពុងតែមានសន្ទុះឡើងវិញគួរកត់សម្គាល់ ខណៈការទិញគ្រឿងសំណង់ពីបរទេសបានកើនខ្លាំងដល់ជិត៥០ភាគរយ បើប្រៀបធៀបរយៈពេលដូចគ្នា កាលពីឆ្នាំមុន ។
ការនាំចូលសម្ភារៈសំណង់ នៅឆមាសទី១ គឺមានការកើនឡើង៤៦,២ភាគរយ ហើយបរិមាណស៊ីម៉ង់ត៍ផលិតនៅក្នុងស្រុក ដើម្បីបំពេញបម្រើដល់តម្រូវការសាងសង់ក្នុងស្រុក នៅ៥ខែដើមឆ្នាំ២០២៥ ក៏មានកំណើនកើនឡើងរង្វង់១៦ភាគរយផងដែរ ។ នេះបើយោងតាម របាយការណ៍ថ្មីមួយ ដែលចេញដោយក្រសួងសេដ្ឋកិច្ច និងហិរញ្ញវត្ថុ ។
ចំណែកវិស័យសំណង់ និងអចលនទ្រព្យ ដែលជាចរន្តចលករទ្រទ្រង់កំណើនសេដ្ឋកិច្ចមួយដ៏សំខាន់របស់ក0ម្ពុជាត្រូវបានព្យាករណ៍ថា នឹងទទួលបានកំណើនប្រសើរឡើងបន្តិច គឺ២,៤ភាគរយដូចគ្នា ។
របាយការណ៍ថ្មីមួយ ដែលចេញដោយក្រសួងសេដ្ឋកិច្ច និងហិរញ្ញវត្ថុបានឲ្យដឹងថា កំណើននេះវាកម្រើកឡើងត្រឹមកម្រិតនេះ គឺដោយសារតែការមិនទាន់ងើបឡើងវិញនៃសំណង់ធំៗ តួរយ៉ាងដូចជា អគារពាណិជ្ជកម្ម ប៉ុន្តែទោះបីជាយ៉ាងណាក៏ដោយសកម្មភាពនៃសំណង់ថ្លៃមធ្យម ជាពិសេស គឺផ្នែកលំនៅស្ថាន និងសំណង់បម្រើឲ្យវិស័យឧស្សាហកម្ម ដូចជារោងចក្រ និងឃ្លាំងគឺ កម្រើក ។ ក្រៅពីនោះ សកម្មភាពសំណង់តូចៗដែលមានតម្លៃទាប ជាពិសេស គឺលំនៅស្ថានតាមមូលដ្ឋាននៅទូទាំងប្រទេសបានងើបឡើងវិញសន្សឹមៗមកវិញ ។
ក្រៅពីវិស័យសំណង់ចេញវិស័យអចលនទ្រព្យក៏ត្រូវបានប៉ាន់ប្រមាណថា នឹងកម្រើកឡើងនៅក្នុងរង្វង់២,៤ភាគរយផងដែរ ដែលគាំទ្រដោយចរន្តទិញ និងលក់លំនៅស្ថាន ជាពិសេសផ្នែកខុនដូដែលជំរុញដោយតម្រូវការក្នុងស្រុក ស្របពេលដែលសកម្មភាពអចលនទ្រព្យតបម្រើឲ្យវិស័យឧស្សាហកម្ម ដូចជា ជួលរោងចក្រ និងដីធ្លី ជាពិសេស គឺនៅក្នុងតំបន់សេដ្ឋកិច្ចពិសេស គឺនៅតែបន្តរក្សាបាននូវចលនារឹងមាំ ។
ផ្អែកទៅតាមស្ថានភាពដែលបានពិពណ៌នាខាងលើ យើងអាចដឹងថា វិស័យសំណង់ និងអចលនទ្រព្យនៅកម្ពុជា កំពុងបន្តឆ្ពោះទៅកាន់ ការងើបឡើងវិញសន្សឹមៗ ក្រោយពេលដែលវាដាំក្បាលចុះជាបន្តបន្ទាប់ តាំងពីឆ្នាំ២០២០ ដោយសារតែការរីករាលដាលនៃមេរោគកូវីដ ១៩មកនោះ ។
មកដល់ពេលនេះ ដោយសារតែតម្រូវការវិនិយោគគិនបរទេស និងទីផ្សារអន្តរជាតិ នៅមិនទាន់ប្រសើរបែបនេះ នោះវិស័យសំណង់ធំៗនឹងបន្តនៅទ្រឹង ប៉ុន្តែទោះបីជាយ៉ាងណាក៏ដោយឲ្យតែកម្ពុជាអាចបន្តទទួលបានកំណើនភ្ញៀវទេសចរបរទេស និងលំហូរនៃវិនិយោគទុនពីក្រៅជាបន្តបន្ទាប់ទៅទៀតនោះ គេជឿជាក់ថា ការវិនិយោគលើសំណង់អគារធំៗដែលមានតម្លៃថ្លៃៗក៏នឹងអាចទទួលកំណើនឡើងវិញ ។
សរុបទៅ វិស័យអចលនទ្រព្យ និងសំណង់នៅកម្ពុជា វាទទួលបានកំណើនត្រឹមកម្រិតបច្ចុប្បន្ននេះ គឺវាផ្អែកតែលើតម្រូវការក្នុងស្រុក មិនមែនដោយវិនិយោគិនបរទេសដូចមុន ប៉ុន្តែទោះបីជាយ៉ាងណាក៏ដោយកំណើននៃលំនៅស្ថានតម្លៃសមរម្យ និងអចលនទ្រព្យសម្រាប់ឧស្សាហកម្ម វានឹងក្លាយជាចំណុចចម្បងនាំឲ្យមានកំណើនឡើងវិញនៅពេលខាងមុខ ៕
ចែករំលែកព័តមាននេះ