ព្រោះតែការតភ្ជាប់ផ្លូវរថភ្លើងល្បឿនលឿនប្រមាណជា១.០៣៥ គីឡូម៉ែត្រ បានកំពុងតែប្រែក្លាយមុខមាត់របស់ឡាវ ដោយពេលនេះ ក្រៅពីលើកកម្ពស់ភាពទាក់ទាញនៃសក្តានុពលទីផ្សារចិន សូម្បីតែថៃ វៀតណាម និងកម្ពុជា ក៏បានកំពុងតែចាប់អារម្មណ៍តភ្ជាប់សេដ្ឋកិច្ច និងការដឹកជញ្ជូនជាមួយឡាវផងដែរ…
ព្រោះតែការតភ្ជាប់ផ្លូវរថភ្លើងល្បឿនលឿនប្រមាណជា១.០៣៥ គីឡូម៉ែត្រ បានកំពុងតែប្រែក្លាយមុខមាត់របស់ឡាវ ដោយពេលនេះ ក្រៅពីលើកកម្ពស់ភាពទាក់ទាញនៃសក្តានុពលទីផ្សារចិន សូម្បីតែថៃ វៀតណាម និងកម្ពុជា ក៏បានកំពុងតែចាប់អារម្មណ៍តភ្ជាប់សេដ្ឋកិច្ច និងការដឹកជញ្ជូនជាមួយឡាវផងដែរ ។
កាលពីពេលថ្មីៗនេះ ថៃដែលពីមុខបានដឹកជញ្ជូនទៅកាន់ទីផ្សារចិនដោយផ្លូវខ្លួនឯងតាមផ្លូវសមុទ្រនៅពេលនេះ មានទំនិញជាច្រើនសូម្បីតែទុរេន និងផលិតផលកសិកម្មជាច្រើនទៀត ដែលត្រូវបានដឹកជញ្ជូនតាមរយៈផ្លូវរថភ្លើងភ្ជាប់ពីយូណាន មកទីក្រុងវៀងច័ន្ទប្រទេសឡាវនេះផងដែរ ។ ដោយឡែកពេលនេះ វិនិយោគិនវៀតណាម បានកំពុងតែសម្រុកចូលទីផ្សារវិនិយោគនៅឡាវធ្វើកសិកម្ម និងផលិតកម្មឧស្សាហកម្មផ្សេងៗ ដើម្បីនាំចេញទៅកាន់ប្រទេសចិនពីព្រោះតែផ្លូវរថភ្លើងល្បឿនលឿននេះ ។
គ្រាន់តែទុរេនដែលមានសក្តានុពលតម្លៃប្រមាណជា៧ពាន់លានដុល្លារ នៅទីផ្សារចិន នៅក្នុងមួយឆ្នាំ ហើយដែលសព្វថ្ងៃបានកំពុងតែកាន់កាប់ដោយថៃ និងវៀតណាម ក៏ត្រូវបានឡាវដាក់គោលដៅជំរុញការនាំចេញហើយដោយរំពឹងថា នៅក្នុងឆ្នាំ២០២៦ខាងមុខនេះ ឡាវអាចនាំចេញនូវទុរេនដែលមានគុណភាពខ្ពស់ទៅកាន់ចិន ។
សារព័ត៌មាន Laotian Times បានរាយការណ៌ថា ប្រទេសឡាវ កំពុងរៀបចំផ្គត់ផ្គង់ទុរេនគុណភាពខ្ពស់ប្រមាណ៤០០តោន ទៅកាន់ទីផ្សារទាំងក្នុង និងក្រៅប្រទេស ជាពិសេស គឺចិន។ លោក អេឡាវ៉ាន ឡាតផាឌី (Elavan Ladpakdee)តំណាងក្រុមហ៊ុនធុរកិច្ចទុរេនឡាវបានបានអះអាងថា បច្ចុប្បន្នប្រទេសនេះមានផ្ទៃដីដាំទុរេនចំនួនតែ២៦៩ ហិចតា ប៉ុន្តែគ្រោងនឹងពង្រីករាប់ពាន់ហិកតាបន្ថែមទៀត ។
តាមកាសែតវៀងច័ន្ទថែមវិញ បានរាយការណ៍ថា អាជ្ញាធរខេត្ត អាតាពឺ (Attapeu) ថ្មីៗនេះ បានផ្តល់សម្បទានដល់ក្រុមហ៊ុនឡាវចំនួនបី ដោយអនុញ្ញាតឱ្យពួកគេដាំទុរេនលើផ្ទៃដីរាប់រយហិកតា ដែលជាផ្នែកមួយនៃកិច្ចខិតខំប្រឹងប្រែងទូលំទូលាយរបស់រដ្ឋាភិបាលក្នុងការជំរុញការដាំដុះផ្លែឈើតាមមូលដ្ឋានពាណិជ្ជកម្ម ។
ការផ្លាស់ប្តូរនេះ អាចគាំទ្រដល់មហិច្ឆតារបស់ប្រទេសឡាវ ក្នុងការក្លាយជាអ្នកផ្គត់ផ្គង់ទុរេនដល់ប្រទេសចិនជិតខាងដែលវិនិយោគិនកំពុងស្វែងរកការពង្រីកចម្ការទុរេននៅក្នុងប្រទេសឡាវ ដើម្បីឱ្យផ្លែឈើកាន់តែច្រើនអាចដាំដុះ និងលក់ទៅប្រទេសចិន ដើម្បីជួយបំពេញតម្រូវការកើនឡើង ។
តាមសេចក្តីរាយការណ៏របស់ប្រភពដដែលបានឲ្យដឹងថា នៅពេលនេះ ក្រៅពីក្រុមហ៊ុននៅក្នុងស្រុក នៅមានក្រុមហ៊ុនមកពីចិន និងវៀតណាម ជាដើមបានកំពុងតែចាប់អារម្មណ៍នឹងគម្រោងកសិកម្មនៅក្នុងប្រទេសឡាវ ដោយភាគច្រើន គឺសំឡឹងរកទីផ្សារផ្គត់ផ្គង់ទៅចិន ។
សម្រាប់កម្ពុជា បើទោះបីជាយើងនៅមិនទាន់អាចរកបាននូវតួរលេខនៃការផ្លាស់ប្តូរទំនិញជាមួយនឹងចិនតាមរយៈឡាវក៏ពិតមែន ក៏មានសេចក្តីរាយការណ៍ខ្លះបានលើកឡើងថា មានទំនិញចិនជាច្រើនបានហូរចូលមកកាន់ប្រទេសកម្ពុជា តាមរយៈឡាវបណ្តើៗ ។ ដូច្នេះនៅថ្ងៃមុខកម្ពុជាទំនងជាអាចនឹងបង្កើនការពឹងពាក់លើឡាវបន្ថែមទៀតផងដែរ ដើម្បីនាំចេញទៅកាន់ប្រទេសចិនតាមរយៈឡាវ ជាពិសេស គឺកាន់ខេត្តយូណាន ដែលគេដឹងថា គឺអាចមានចំនួនប្រមាណជា៤៧ លាននាក់ ៕
ចែករំលែកព័តមាននេះ