ខេត្តត្បូងឃ្មុំ ៖ មួយរយៈនេះ ជំងឺផ្ដាសសាយបក្សី(H5N1) ត្រូវបានគេសង្កេតឃើញផ្ទុះឡើងពីតំបន់មួយទៅតំបន់មួយ ដោយបានសម្លាប់មនុស្សជាហូរហែមានក្មេងមានចាស់ ។ ជាក់ស្ដែង នៅភូមិបុសឬស្សី ឃុំដូនតី…
ខេត្តត្បូងឃ្មុំ ៖ មួយរយៈនេះ ជំងឺផ្ដាសសាយបក្សី(H5N1) ត្រូវបានគេសង្កេតឃើញផ្ទុះឡើងពីតំបន់មួយទៅតំបន់មួយ ដោយបានសម្លាប់មនុស្សជាហូរហែមានក្មេងមានចាស់ ។ ជាក់ស្ដែង នៅភូមិបុសឬស្សី ឃុំដូនតី ស្រុកពញាក្រែក មានក្មេងប្រុសតូចម្នាក់អាយុ៦ឆ្នាំ បានទៅប៉ះពាល់មាន់ជំទង់ដែលឈឺ ក្រោយមកក្តៅខ្លួនម្ដាយរកថ្នាំពេទ្យឱ្យលេប តែមិនបាត់សោះ ទីបំផុត ត្រូវបានបញ្ជូនទៅសង្គ្រោះនៅមន្ទីរពេទ្យគន្ធបុប្ផារាជធានីភ្នំពេញ ។
លោកជឿន ចិត្ត ប្រធានការិយាល័យបសុព្យាបាលនៃមន្ទីរកសិកម្មខេត្តត្បូងឃ្មុំបានប្រាប់ឲ្យដឹងថា ក្រោយពីទទួលបានព័ត៌មាននេះ ប្រធានមន្ទីរបានចាត់ឱ្យរូបលោក និងមន្ត្រីចុះធ្វើការស្រាវជ្រាវនិងបាញ់ថ្នាំសម្លាប់មេរោគជាបន្ទាន់ដោយធ្វើឡើងរយៈពេល២ថ្ងៃ គឺថ្ងៃទី២១ និង២២ កក្កដា ឆ្នាំ២០២៥ ។ ជាមួយនោះ កម្លាំងជំនាញពេទ្យសត្វបានចែកខិតប័ណ្ណផ្សព្វផ្សាយជំងឺផ្ដាសាយបក្សី ដល់បងប្អូនប្រជាពលរដ្ឋនៅក្នុងភូមិឲ្យបានយល់ដឹងជ្រួតជ្រាបគ្រប់ៗគ្នាដោយពន្យល់បើឃើញមាន់ឬទាឈឺសូមកុំកាន់ឲ្យសោះ ដើម្បីចៀសវាងកុំឲ្យឆ្លងជំងឺដូចករណីខាងលើនេះ។
កម្លាំងជំនាញពេទ្យសត្វបានបន្តថា ឪពុកម្ដាយរបស់ក្មេងតូចនោះ បានចេញទៅធ្វើការបាត់ដោយទុកឲ្យកូនតូចអាយុ៦ឆ្នាំនៅជាមួយតាយាយមើលការខុសត្រូវ ចៃដន្យមានមាន់ជំទង់អ្នកជិតខាងឈឺតែក្មេងរូបនោះមិនបានចាប់អារម្មណ៍ក៏យកដៃកាន់ហើយក្រោយមកបានក្តៅខ្លួនហើយត្រូវម្ដាយបានទៅជួបគ្រូពេទ្យឲ្យថ្នាំមកលេបពេលលេបត្រជាក់ពេលអស់ជាតិថ្នាំក៏ក្តៅឡើងវិញដដែល។
សូមបញ្ជាក់ថា ក្មេងតូចនោះបានចាប់ផ្ដើមក្តៅខ្លួននៅថ្ងៃទី១១ កក្កដា ដោយសារតែលេបថ្នាំមិនបាត់ ម្ដាយឪពុកក៏បានបញ្ជូនទៅមន្ទីរពេទ្យនៅព្រែកក្របៅ ស្រុកកំចាយមារ ខេត្តព្រៃវែង ស្ថានភាពជំងឺមិនធូរស្រាលក៏បានបញ្ជូនបន្តទៅសង្គ្រោះនៅមន្ទីរពេទ្យគន្ធបុប្ផា រាជធានីភ្នំពេញ បន្ទាប់មកគ្រូពេទ្យបានធ្វើតេស្តលទ្ធផលឃើញក្មេងតូចរូបនេះមានផកទុកជំងឺផ្ដាសាយបក្សី។
ដោយពិបាកដកដង្ហើម តែក្រោមការយកចិត្តទុកដាក់ពីសំណាក់គ្រូពេទ្យ ឃើញថាក្មេងតូចនោះរាងបានធូរបន្តិចហើយ គិតរហូតមកដល់យប់ថ្ងៃទី២២ កក្កដា គឺក្មេងតូចនោះកំពុងតែស្ថិតនៅក្នុងការសង្គ្រោះនៅឡើយ។
ជំនាញពេទ្យសត្វបញ្ជាក់ថា កម្លាំងជាច្រើននាក់បានចុះនៅក្នុងភូមិហៅបងប្អូនប្រជាពលរដ្ឋមកចូលរួមប្រជុំស្ដាប់ការពន្យល់ពីវិធានការការពារកុំឲ្យឆ្លងជំងឺផ្ដាសាយបក្សី ។ ជាមួយនោះ ក៏បានចាប់មាន់ឬទា ដែលស្ថិតនៅក្បែរផ្ទះរបស់ក្មេងតូចនោះយកដុតកម្ទេចចោលហើយមួយផ្នែកទៀតត្រូវបានវេចខ្ចប់តាមលក្ខណៈបច្ចេកទេស ដើម្បីយកទៅពិនិត្យមើលមេរោគបន្តនៅរាជធានី
ភ្នំពេញ ។
ក្នុងរយៈពេលពីរថ្ងៃនេះ គឺជំនាញពេទ្យសត្វបានចុះផ្សព្វផ្សាយឱ្យបងប្អូនយល់ដឹងទូលំទូលាយធ្វើយ៉ាងណាបើឃើញសត្វមាន់ឈឺមិនត្រូវប៉ះពាល់នោះទេ បង្ការកុំឲ្យឆ្លងជំងឺ ។ ដើម្បីសុវត្ថិភាពកម្លាំងជំនាញពេទ្យសត្វ សហការជាមួយអាជ្ញាធរមូលដ្ឋានដោយធ្វើផ្កាផ្សព្វផ្សាយ និងហាមមិនឲ្យមានចរាចរណ៍សត្វនៅក្នុងភូមិ ដែលរកឃើញមានជំងឺដាសាយបក្សី ។ក្នុងបរិវេណដែលសង្ស័យត្រូវបានគ្រប់គ្រងក្នុងរង្វង់ប្រមាណ២០០ទៅ៤០០ម៉ែត្រ ៤ជ្រុង។
សូមបញ្ជាក់ថា ក្រៅពីក្មេងតូចម្នាក់នេះ មិនទាន់ស្រាវជ្រាវឃើញមានអ្នកភូមិផ្សេងទៀតឆ្លងជំងឺនេះនៅឡើយទេ ។ គួររំលឹកថា នាពេលកន្លងទៅ មានបុរសម្នាក់បានចាប់មាន់ដែលមានជំងឺយកមកធ្វើម្ហូបទទួលទាន ហើយក៏បានឆ្លងជំងឺផ្ដាសាយបក្សី ទោះបីក្រុមគ្រូពេទ្យប្រឹងសង្គ្រោះយ៉ាងណាក៏ដោយ ទីបំផុតបុរសនោះក៏បានស្លាប់ហេតុការណ៍នោះកើតឡើងនៅស្រុកចំការលើ ខេត្តកំពង់
ចាម។
ចែករំលែកព័តមាននេះ