ប្រទេស​ប្រេ​ស៊ី​ល ៖ កីឡាករ​បាល់ទាត់ Neymar Jr. បាន​ចំណាយ​ប្រាក់​ជាង ១,៥​លាន​ដុល្លារ​អា​មេ​រិ​ក​ទិញ​រថយន្ត Batmobile Tumbler ដែល​ជា​រថយន្ត​ចម្លង​តាម​គំរូ​ចេញពី​រូប​សញ្ញា​សិទ្ធិ​ផ្តាច់មុខ​ខ្សែភាពយន្ត​មនុស្ស​ប្រជៀវ «Batman» ហើយ​យោង​តាម​កាសែត Marca បានឱ្យ​ដឹង​ថា របស់​លេង​ថ្មី​របស់​ខ្សែប្រយុទ្ធ​ឆ្នើម​ប្រេ​ស៊ី​លវ័យ​៣៣​ឆ្នាំ​រូប​នេះ គឺជា​រថយន្ត Batmobiles ពិសេស​មួយ​ក្នុង​ចំនោម​រថយន្ត Batmobile ចំនួន​១០​គ្រឿង ដែល​ផលិត​ឡើងជា​ពិសេស​ដើម្បី​ប្រារព្ធ​ខួប​លើក​ទី​៨៥ នៃ​តួអង្គ Batman​។

រថយន្ត​ផលិត​មាន​កំណត់ Batmobile Tumbler មាន​ប្រវែង ៤,៦៥​ម៉ែត្រ និង​ទទឹង ២,៨ ម៉ែត្រ ផលិត​ពិ​ស៊ុម​ដែក​មាន​សរសៃ​កាបូន និង​តួ​ពី​សរសៃ​អា​រ៉ា​មី​ត Kevlar​។ រថយន្ត​ដ៏​ចម្លែក​នេះ ត្រូវ​បាន​បំពាក់​ម៉ាស៊ីន V8 6.2L កម្លាំង​៥២៥​សេះ ជាមួយ​រូបរាង​បែប​ប្រយុទ្ធ​ដ៏​ទាក់ទាញ​បំផុត​។ អ្វី​ដែល​ធ្វើ​ឱ្យ​រថយន្ត Batmobile Tumbler ប្លែក​ដាច់​ពី​គេ​គឺ​លក្ខណៈ​ពិសេស​របស់​វា​ដោយ​ភ្ជាប់​ឧបករណ៍​បាញ់​គ្រាប់​បែកផ្សែង ការ​រចនា​ដូច​ម៉ាស៊ីន​យន្តហោះ កាំភ្លើងយន្ត​ចម្លង ប្រដាប់​បំពង​សំឡេង​អាច​ចល័ត​បានជា​ដើម ព្រមទាំង​មុខងារ​ជា​ច្រើន​ផ្សេង​ទៀត ដែល​ទាំង​អស់នេះ ឆ្លុះ​បញ្ចាំង​ពី​រថយន្ត​ដែល​បង្ហាញ​នៅ​ក្នុង​ខ្សែភាពយន្ត​ដ៏​ល្បី Batman​។

Neymar គឺជា​អ្នកគាំទ្រ​រឿង Batman ជា​យូរ​មក​ហើយ ថែម​ទាំង​មាន​ស្នាម​សាក់​និមិត្តសញ្ញា​កំពូល​វីរបុរស Batman លើ​ខ្នង​របស់​គេ​ទៀត​ផង​។ នៅ​ឆ្នាំ​២០២២ ខ្សែប្រយុទ្ធ​ឆ្នើម​រូប​នេះ​បាន​ចូលរួម​កម្មវិធី​បញ្ចាំង​រឿង The Batman ព្រមទាំង​បាន​អង្គុយ​នៅ​ក្នុង​រថយន្ត Batmobile ដែល​ប្រើ​ដោយ​តារា​សម្តែង Robert Pattinson ថែម​ទៀត​ផង​។

យ៉ាងណាមិញ ទោះបីជា Batmobile Tumbler មាន​តម្លៃ​ថ្លៃ​ខ្លាំង​ក៏​ដោយ ប៉ុន្តែ Neymar នឹង​មិន​អាច​បើកបរ​រថ​ន​យន្ត​ដ៏​ចម្លែក​នេះ​នៅ​លើ​ផ្លូវ​សាធារណៈ​បាន​ទេ ព្រោះ​វា​មិន​បំពេញ​តាម​បទ​ប្បញ្ញត្តិ​នៅ​ក្នុង​ប្រទេស​ប្រេ​ស៊ី​ល​។ ផ្ទុយ​ទៅ​វិញ វា​នឹង​ចត​ក្នុង​កន្លែង​ដាក់​រថយន្ត​ប្រណិត ទំនើប​ៗ តម្លៃ​ថ្លៃ​ជា​ច្រើន​គ្រឿង​ផ្សេង​ទៀត​របស់ Neymar រួម​មាន Audi R8 Spyder V10 Plus, Ferrari Purosangue, Bentley Continental GT, Aston Martin DBX និង Lamborghini Huracan ជាដើម​។

យោង​តាម​គេហទំព័រ Celebrity Net Worth បាន​បង្ហាញ​ថា ទ្រព្យសម្បត្តិ Neymar ត្រូវ​បាន​ប៉ាន់​ស្មានថា​មាន​ចំនួន ៣៥០​លាន​ដុល្លារ​អា​មេ​រិ​ក ដោយ​រកបាន​ពី​អាជីព​បាល់ទាត់​ដ៏​ជោគជ័យ​របស់​ខ្លួន និង​ភាព​ជា​ដៃគូ​ជាមួយ​បណ្តា​ក្រុមហ៊ុន​ជា​ច្រើន​ផង​ដែរ​។ Neymar ក៏​ត្រូវ​បាន​រាយការណ៍​ថា​ជា​ម្ចាស់​កម្មសិទ្ធិ​ខុន​ដូ​ដ៏​ប្រណីត (Penthouse) នៅ​ទីក្រុង​ឌូ​បៃ ប្រទេស​អា​រ៉ាប់​រួម ដែល​មាន​តម្លៃ​ជាង​៥០​លាន​ដុល្លារ ក៏​ដូច​ជា​អចលនទ្រព្យ​នៅ​ទីក្រុង​ម៉ៃ​អា​មី (Miami) សហរដ្ឋអាមេរិក ព្រមទាំង​កោះ​ឯកជន​មួយ​ក្នុង​ប្រទេស​កំណើត​របស់​ខ្លួន​ផង​ដែរ​៕ ដកស្រង់ ៖ VnExpress