ការនាំចូលរថយន្តជិះលក្ខណៈគ្រួសារមានកំណើនស្ទុះឡើងខ្លាំង នៅក្នុងឆមាសទីមួយដើមឆ្នាំ២០២៥ ដោយកំណើននេះមួយចំណែក គឺអាចបណ្តាលមកពីកំណើននៃការនាំចូលរថយន្តមកពីចិន ។ មកដល់ពេលនេះ ក្រៅពីរថយន្តដែលដំឡើងនៅក្នុងស្រុកជាច្រើនម៉ូដែលស្រាប់ កម្ពុជានៅបន្តធ្វើការនាំចូលរថយន្តពីក្រៅប្រទេសមកកាន់តែច្រើននៅក្នុងអត្រាកំណើនខ្ពស់ហួសពីការរំពឹងទុក ខណៈស្ថានភាពសេដ្ឋកិច្ចហាក់នៅមន្ទិលក៏ដោយ ។…
ការនាំចូលរថយន្តជិះលក្ខណៈគ្រួសារមានកំណើនស្ទុះឡើងខ្លាំង នៅក្នុងឆមាសទីមួយដើមឆ្នាំ២០២៥ ដោយកំណើននេះមួយចំណែក គឺអាចបណ្តាលមកពីកំណើននៃការនាំចូលរថយន្តមកពីចិន ។
មកដល់ពេលនេះ ក្រៅពីរថយន្តដែលដំឡើងនៅក្នុងស្រុកជាច្រើនម៉ូដែលស្រាប់ កម្ពុជានៅបន្តធ្វើការនាំចូលរថយន្តពីក្រៅប្រទេសមកកាន់តែច្រើននៅក្នុងអត្រាកំណើនខ្ពស់ហួសពីការរំពឹងទុក ខណៈស្ថានភាពសេដ្ឋកិច្ចហាក់នៅមន្ទិលក៏ដោយ ។
ស្ថិតិនៃទំនិញនាំចូលដែលទទួលបានពីក្រសួងពាណិជ្ជកម្មបានឲ្យដឹងថា នៅឆមាសទីមួយដើមឆ្នាំ២០២៥នេះ កម្ពុជាបាននាំចូលរថយន្តលក្ខណៈគ្រួសារមានតម្លៃសរុបរហូតដល់ទៅជាង៤៨៧ លានដុល្លារ ជាមួយនឹងកំណើនកើនឡើងនៅក្នុងអត្រាប្រមាណជាជិត៦៧ភាគរយ ធៀបនឹងរយៈពេលដដែលកាលពីឆ្នាំ២០២៤កន្លងទៅ ។
ក្រៅពីរថយន្តជិះលក្ខណៈគ្រួសារការនាំចូលរថយន្តសម្រាប់អាជីវកម្ម ដូចជារថយន្តដឹកទំនិញ គឺមានតម្លៃជិត៦៤លានដុល្លារ ធ្លាក់ចុះជិត១២ភាគរយ ស្របពេលដែលការនាំចូលរថយន្តបឺស ឬរថយន្តក្រុង និងវេន (ប្រភេទ១២កៅអី) គឺមានប្រមាណជាជាង២៩លានដុល្លារថយចុះជាងកន្លះភាគរយដែរ ។
ដោយឡែក ការនាំចូលម៉ូតូ ក៏មានកំណើនកើនឡើងផងដែរនៅក្នុងរយៈពេលដដែលនេះ ដោយនាំចូលមានតម្លៃសរុបជាង២១៤លានដុល្លារ មានកំណើនកើនឡើងប្រមាណជាជាង២០ភាគរយធៀបនឹងរយៈពេលដដែលកាលពីឆ្នាំ២០២៤ ។
អ្នកនៅក្នុងវិស័យឧស្សាហកម្មរថយន្តមួយរូប ដែលសុំមិនបញ្ចេញឈ្មោះបានឲ្យដឹងថា កំណើននេះអាចពាក់ព័ន្ធនឹងការនាំចូលរថយន្តពីទីផ្សារចិន ។ លោកបានអះអាងថា ចំណែកទីផ្សារថយន្តចិននៅកម្ពុជានាពេលបច្ចុប្បន្នកាន់តែរីក ហើយប្រសិនបើចិននៅតែបន្តរក្សាគុណភាពយន្តយន្ត ហើយចេញម៉ូដែលរថយន្តដែលមានរូបរាងទំនើបទាក់ទាញ រីឯ តម្លៃនៅបន្តធូរដូចសព្វថ្ងៃនោះ ប្រជាប្រិយភាពរថយន្តចិននៅកម្ពុជានឹងកើនថែមទៀត ។
គួរបញ្ជាក់ថា អ្នកប្រើប្រាស់មួយចំនួននៅបន្តមានការមិនទុកចិត្តលើគុណភាពរបស់ផលិតផលចិនដូចជារថយន្តនេះជាដើម។ នៅក្នុងស្ថានភាពដែលពិភពលោកកំពុងតែស្ថិតនៅក្នុងមន្ទិលបែបនេះ កំណើននៃការនាំចូលរថយន្តវាបង្ហាញនូវស្ថានភាពពីរផ្ទុយគ្នា ពោលគឺឱកាស និង ហានិភ័យ ចំពោះបរិយាកាសសេដ្ឋកិច្ចកម្ពុជានៅពេលអនាគតដ៏ខ្លីខាងមុខនេះ ។
នៅពេលដែលយើងឃើញស្ថានភាពនៃកំណើនការនាំចូលរថយន្តលក្ខណៈគ្រួសារបែបនេះ វាបង្ហាញនូវសញ្ញានៃការកើនឡើងនូវចរន្តសាច់ប្រាក់និងអំណាចនៃការទិញនៅកម្ពុជា ។ វាក៏ជាសញ្ញាថា ជីវភាពពលរដ្ឋវណ្ណៈកណ្តាលប្រសើរ ហើយក៏ជាក្តីមោទនៈថា សេដ្ឋកិច្ចកម្ពុជាគឺកំពុងតែអាចទ្រទ្រង់បានបញ្ហា រួចកំពុងតែបន្សាំខ្លួនដោយវិជ្ជមាន ។
ទន្ទឹមនឹងភាពវិជ្ជមានក៏កុំភ្លេចមើលនូវហានិភ័យផងដែរ ពីព្រោះការនាំចូលរថយន្តជាទូទៅវាជាប្រភេទដែលមិនចាំបាច់ ហើយវាអាចពង្រីកឱនភាពពាណិជ្ជកម្ម ដែលយើងគួរគិត ។ ក្រៅពីនោះវាអាចពាក់ព័ន្ធ នឹងបញ្ហាវិបត្តិកនៃបំណុល ពីព្រោះថា ដើម្បីតែចង់បានភាពហ៊ឺហារទំនើបស៊ីវិល័យទាន់សម័យ ប្រជាជនមួយចំនួនអាចប្រឡងប្រណាំងហើយ បបួលគ្នាទៅធ្លាក់នៅក្នុងអន្ទាក់នៃបំណុល និង បណ្តុះចលនានៃ ការចំណាយមិនចាំបាច់ ។
ចែករំលែកព័តមាននេះ