តុលាការធម្មនុញ្ញបានប្រកាស កាលពីថ្ងៃពុធថា ខ្លួននឹងប្រកាសសាលក្រមលើករណីជោគវាសនាលោកស្រី នាយករដ្ឋមន្ត្រី ផៃថងថាន ស៊ីណាវ៉ាត្រា នៅថ្ងៃទី២៩ ខែសីហាខាងមុខ ពាក់ព័ន្ធនឹងសំណុំរឿងស្តង់ដារសីលធម៌ ដោយសារការសន្ទនាតាមទូរស័ព្ទជាមួយសម្តេចតេជោ…
តុលាការធម្មនុញ្ញបានប្រកាស កាលពីថ្ងៃពុធថា ខ្លួននឹងប្រកាសសាលក្រមលើករណីជោគវាសនាលោកស្រី នាយករដ្ឋមន្ត្រី ផៃថងថាន ស៊ីណាវ៉ាត្រា នៅថ្ងៃទី២៩ ខែសីហាខាងមុខ ពាក់ព័ន្ធនឹងសំណុំរឿងស្តង់ដារសីលធម៌ ដោយសារការសន្ទនាតាមទូរស័ព្ទជាមួយសម្តេចតេជោ ប្រធានព្រឹទ្ធសភាកម្ពុជា ។
កាលពីម្សិលមិញ មានសេចក្តីរាយការណ៍ថា តំណាងរាស្ត្រនៃគណបក្សភឿថៃសុំឲ្យតុលាការធម្មនុញ្ញរបស់ប្រទេសនេះ ពន្យារពេលប្រកាសសាលក្រមលើលោកស្រីនាយករដ្ឋមន្ត្រីថៃរូបនេះ ។
គ្មាននរណាដឹងថា តើតុលាការធម្មនុញ្ញថៃនឹងសម្រេចយ៉ាងណានោះទេ ។ ប៉ុន្តែអ្វីដែលគេដឹង គឺថាកន្លងមកគណបក្សភឿថៃបានបាត់បង់អំណាចជាច្រើនដងរួចមកហើយ គឺក្រោមស្នាដៃរបស់តុលាការធម្មនុញ្ញនេះ ពោល គឺតាំងពីក្រោយពេលដែលលោក ថាក់ស៊ីន ស៊ីណាវ៉ាត្រា ត្រូវធ្វើរដ្ឋប្រហារទម្លាក់ កាលពីឆ្នាំ២០០៦ មកនោះ ។
នាយករដ្ឋមន្ត្រីថៃ ដែលឡើងកាន់អំណាចក្រោមស្រមោលលោក ថាក់ស៊ីន ៥រូបបានបាត់បង់អំណាចជាបន្តបន្ទាប់ក្រោមដៃរបស់តុលាការធម្មនុញ្ញថៃ ដែលរួមមាន លោក សាម៉ាក់ ស៊ុនដារ៉ាវេ (Samak Sundaravej)ដែលកាន់តំណែងពីខែមករា ដល់ខែកញ្ញា ឆ្នាំ២០០៨ ។ ក្រោយមកគឺលោក ស៊ុមឆៃ វង្សសាវ៉ាត (Somchai Wongsawat) ពីខែកញ្ញាដល់ខែធ្នូ ឆ្នាំ២០០៨ ។ លោកស្រី យីងឡាក់ ស៊ីណាវ៉ាត្រា (Yingluck Shinawatra) ពីខែសីហា ឆ្នាំ២០១១ ដល់ ខែឧសភា ឆ្នាំ២០១៤ ។ ហើយបន្ទាប់មក គឺ លោក ស្រ៊ីថា ថាវេស៊ីន (Srettha Thavisin) ពីខែសីហា ឆ្នាំ២០២៣ ដល់ខែសីហា ឆ្នាំ២០២៤ ។
នៅក្នុងករណីដែលលោកស្រី ផៃថងថាន អាចមានលទ្ធភាពកាន់បានត្រឹមតែពីខែសីហា ឆ្នាំ២០២៤ ដល់ត្រឹមខែកក្កដា ឆ្នាំ២០២៥ តើនរណាអាចនឹងក្លាយជានាយករដ្ឋមន្ត្រីថៃបន្ទាប់ ? តើនាយករដ្ឋមន្ត្រីស្តីទី ភូមថាំ វិឆាយ៉ាឆែ (Phumtham Wechayachai) អាចឡើងបានទេ ?
សម្រាប់លោក ភូមថាំ គឺអាចបានត្រឹមនាយករដ្ឋមន្ត្រីស្តីទី ដោយសារតែនៅក្នុងបក្សភឿថៃ បេក្ខជនដែលលោក ថាក់ស៊ីន សំឡឹង មើលពិតប្រាកដ នៅពេលកូនស្រីអស់អំណាច គឺលោក ឆៃកាសេម នីធីស៊ីរី (Chaikasem Nitisiri) ដែលជាអ្នកច្បាប់ថៃវ័យ៧៦ឆ្នាំ ហើយជាអតីតរដ្ឋមន្ត្រីក្រសួងយុត្តិធម៌ សម័យលោកស្រី យីងឡាក់ ។ លោក ភូមថាំ នៅពេលនេះកំពុងតែមានរឿងអាស្រូវ ផ្នែកតុលាការដែលពាក់ព័ន្ធរឿងបញ្ហាដីធ្លី ហើយរឿងនោះក៏មិនតូចដែរ ។
បេក្ខជនបន្ទាប់អាចជាលោក អានុទិន ឆានវីរគុល (Anutin Charnvirakul) ប្រធានគណបក្សភូមិចៃថៃ ដែលធ្លាប់ជាឧបនាយករដ្ឋមន្ត្រីនិងជារដ្ឋមន្ត្រីមហាផ្ទៃក្នុងរដ្ឋាភិបាលចម្រុះកន្លងមក ប៉ុន្តែលោកបានលាលែងពីតំណែង ។ លទ្ធភាព គឺលោកអាចនឹងចាប់ដៃជាមួយនឹងគណបក្ស ប្រជាជនថៃ ដែលជាគណបក្សប្រឆាំង ដើម្បីកាន់កាប់រដ្ឋាភិបាលបណ្តោះអាសន្តឫក៏រដ្ឋាភិបាលចាំផ្ទះថៃ ។
ដោយឡែកបេក្ខជនដែលមិនអាចមើលស្រាលដែរនោះ គឺអតីតមេយោធាថៃ ដែលធ្វើរដ្ឋប្រហារហើយក្លាយជានាយករដ្ឋមន្ត្រីថៃជិត៩ឆ្នាំ ពោល គឺពីថ្ងៃទី២៤ ខែសីហា ឆ្នាំ២០១៤ ដល់ ថ្ងៃទី២២ ខែសីហា ឆ្នាំ២០២៣ គឺលោក ប្រាយុទ្ធ ចាន់អ៊ូចា (Prayut Chan-0-cha)។
លោក ប្រាយុទ្ធ មិនមែនជាមេដឹកនាំដែលមានប្រជាប្រិយភាពទេនៅថៃ ប៉ុន្តែទោះបីជាយ៉ាងណាក៏ដោយ លោកជាមេដឹកនាំដែលកាន់អំណាចយូរជាងគេចាប់តាំងពីឆ្នាំ២០០៦មក ។ មកដល់ពេលនេះថ្វីត្បិតតែ លោកមិនទទួលការគាំទ្រពីពលរដ្ឋថៃដែលជាម្ចាស់សន្លឹកឆ្នោតច្រើនក៏ដោយ ប៉ុន្តែឥទ្ធិពលនយោបាយនៅក្នុងប្រទេសនៅតែមាន។
អ្វីដែលគួរឲ្យកត់សម្គាល់ នៅក្នុងរយៈពេលដែលលោកដឹកនាំ ទំនាក់ទំនង និងកិច្ចសហប្រតិបត្តិការជាមួយនឹងប្រទេសនៅក្នុងតំបន់ គឺហាក់មានភាពប្រសើរ ហើយចលនាជាតិនិយមនៅក្នុងប្រទេសថៃក៏ស្ងប់ស្ងាត់ គ្មានការចាក់រុក គ្មានការឆ្កឹះរំខាន ដែលនាំឲ្យទំនាក់ទំនាក់ជាមួយនឹងប្រទេសជិតខាង គឺមានតែកិច្ចសហប្រតិបត្តិការ និងការអភិវឌ្ឍច្រើន ៕
ចែករំលែកព័តមាននេះ