ប្រសិនបើកម្ពុជាអាចបន្តទាក់ទាញគម្រោងវិនិយោគលើវិស័យកសិកម្មធំៗបន្តមកក្នុងប្រទេសមិនថា ទីកន្លែងណានោះទេ ដឹងថា វិស័យកសិកម្មកម្ពុជា កាន់តែរីកចម្រើនខ្លាំង ហើយបន្តដើរតួនាទីជាចលករកាន់តែធំសម្រាប់ទ្រទ្រង់កំណើនសេដ្ឋកិច្ច ។ នៅខែកក្កដា ក្រុមប្រឹក្សាអភិវឌ្ឍន៍កម្ពុជាបានឲ្យដឹងថា កម្ពុជាបានទាក់ទាញគម្រោងវិនិយោគលើកសិកម្មដ៏ធំមួយដែលមានតម្លៃដល់ទៅ…
ប្រសិនបើកម្ពុជាអាចបន្តទាក់ទាញគម្រោងវិនិយោគលើវិស័យកសិកម្មធំៗបន្តមកក្នុងប្រទេសមិនថា ទីកន្លែងណានោះទេ ដឹងថា វិស័យកសិកម្មកម្ពុជា កាន់តែរីកចម្រើនខ្លាំង ហើយបន្តដើរតួនាទីជាចលករកាន់តែធំសម្រាប់ទ្រទ្រង់កំណើនសេដ្ឋកិច្ច ។
នៅខែកក្កដា ក្រុមប្រឹក្សាអភិវឌ្ឍន៍កម្ពុជាបានឲ្យដឹងថា កម្ពុជាបានទាក់ទាញគម្រោងវិនិយោគលើកសិកម្មដ៏ធំមួយដែលមានតម្លៃដល់ទៅ ២២៦លានដុល្លារ ។ គម្រោងនេះ ត្រូវបានគេដឹងថា គឺជាគម្រោងពង្រីកផលិតកម្មកសិដ្ឋានដាំដំណាំហូបផ្លែ និងរោងចក្រកៃច្នៃ ។ គម្រោងទាំងនេះ គឺមានទីតាំងស្ថិតនៅស្រុកលំផាត់ ខេត្តរតនគីរី ហើយគេរំពឹងថា នឹងអាចបង្កើតការងារធ្វើបានរហូតដល់ទៅ៨.៥៥០ កន្លែងឯណោះ ។
ពាក់ព័ន្ធនឹងដំណើរការអភិវឌ្ឍវិស័យកសិកម្មនេះ មន្ត្រីនៅក្រុមប្រឹក្សាអភិវឌ្ឍកម្ពុជាមួយរូប បានលើកឡើងដោយមិនបញ្ចេញអត្តសញ្ញាណថា វិនិយោគិនទាំងបរទេស និងនៅក្នុងស្រុក គឺកំពុងមានទំនោរបង្ហូរទុនវិនិយោគមកក្នុងវិស័យកសិកម្មគួរសម ។
លោកបានបញ្ជាក់ថា «ទោះបីជាទំហំវិនិយោគវាមិនច្រើនដល់ឧស្សាហកម្មក៏ដោយ ប៉ុន្តែជាទូទៅវិស័យកសិកម្ម៧ខែកន្លងមកនេះ បានទាក់ទាញវិនិយោគសរុប៣៥៦លានដុល្លារដែរ » ។
លោកបានបន្តទៀតថា ប្រសិនបើវិនិយោគិនបន្តបង្ហូរសាច់ប្រាក់របស់គេចូលទៅក្នុងវិស័យកសិកម្ម ជាពិសេស គឺកសិដ្ឋាន និងកែច្នៃដូចជា នៅខេត្តរតនៈគីរីនោះវិស័យកសិកម្មកម្ពុជានឹងកាន់តែប្រសើរហើយនឹងឈានទៅរកភាពរីកចម្រើននៅពេលអនាគត ។ លោកបានបន្តថា នៅពេលដែលមានការកែច្នៃកម្ពុជាអាចរំដោះបាននូវការហូរចេញផលិតផលមិនទាន់សម្រេចចេញពីប្រទេសដូចជា បច្ចុប្បន្ន ហើយបញ្ចេញតែផលិតផលសម្រេច ។
នៅក្នុងរយៈពេល៧ខែកន្លងមកនេះ ក្រៅពីវិស័យកសិកម្ម កម្ពុជាបានទាក់ទាញគម្រោងវិនិយោគលើវិស័យឧស្សាហកម្មដែលមានតម្លៃ ៤,៧ ពាន់លានដុល្លារ, វិស័យហេដ្ឋារចនាសម្ព័ន្ធ គឺរង្វង់ប្រមាណជា១,៥ ពាន់លានដុល្លារ ក្រៅពីនោះ គឺទេសចរណ៍ដែលមានតម្លៃប្រមាណជា ១៦៧ លានដុល្លារ ។
ប្រសិនបើ រដ្ឋាភិបាល និងឯកជនបន្តគាំទ្រ និងទាក់ទាញវិនិយោគប្រកបដោយយុទ្ធសាស្ត្រ ក៏ដូចជាការពង្រឹងសេវាសាធារណៈ និងសមត្ថភាពប្រើប្រាស់បច្ចេកវិទ្យា ជាពិសេស គឺវិស័យកសិកម្មតាមបែបទំនើប ពោល គឺជាកសិកម្មបម្រើឲ្យឧស្សាហកម្ម និងការកែច្នៃកម្ពុជានឹងបន្តពូនជ្រុំកសិកម្មដែលជាមូលដ្ឋានសេដ្ឋកិច្ចជាប្រពៃណីរបស់ខ្លួនឲ្យក្លាយទៅជាមូលដ្ឋាននៃការរំដោះខ្លួនឈានទៅវិស័យឧស្សហកម្មកែច្នៃ ដែលគេហៅថា កសិឧស្សាហកម្មបាន ។
ទៅថ្ងៃមុខ ប្រសិនបើកម្ពុជាអាចប្រែក្លាយកសិកម្មឲ្យទៅជាកសិឧស្សាហកម្មបានកាន់តែច្រើននោះ វិស័យនេះអាចក្លាយជាចលករមួយសំខាន់បំផុត ដើម្បីរុញប្រជាពលរដ្ឋកម្ពុជាឲ្យឈានដល់គោលដៅមានប្រាក់ចំណូលខ្ពស់ដូចដែលកម្ពុជាចង់បាននៅក្នុងឆ្នាំ២០៥០។
កសិកម្មមិនគួរនៅតែជាកសិកម្ម ដើម្បីចិញ្ចឹមពលរដ្ឋនៅក្នុងស្រុកទេ ហើយក៏មិនមែនជាកសិកម្មដើម្បីនាំចេញវត្ថុធាតុដើមទៅក្រៅប្រទេសដែរ ។ ប៉ុន្តែគួរតែជាកសិកម្មដែលប្រមូលយកផលកសិកម្មទៅផលិត ឬកែច្នៃឲ្យចេញជាផលិតផលសម្រេចដើម្បីនាំចេញ ៕
ចែករំលែកព័តមាននេះ