ទីក្រុងម៉ូស្គូ៖ ថ្ងៃនេះ ប្រទេសរុស្ស៊ីមានសារនយោបាយសំខាន់មួយចង់ផ្ដាំត្រឡប់ទៅលោកត្រាំដែលបានដាក់ឱសានវាទរយៈពេល៥០ថ្ងៃត្រូវតែសម្រេចចិត្តថាតើជ្រើសរើសយកបទឈប់បាញ់ ឬបន្តធ្វើសង្គ្រាម។ បើយកបទឈប់បាញ់ជាការល្អ។ ប៉ុន្តែបើបន្តធ្វើសង្គ្រាម ត្រាំព្រមានប្រើធម៌ក្ដៅដាក់រុស្ស៊ី និងដំឡើងពន្ធដ៏ខ្ពស់កប់ពពកទៅលើទំនិញរបស់រុស្ស៊ី។ ប្រហែលជារុស្ស៊ីមិនចង់ឱ្យលោកត្រាំបង្គាប់បញ្ជាស្រេចតែនឹងចិត្ត និងម៉្យាងទៀត រុស្ស៊ីក៏ប្រហែលជាចង់បញ្ជាក់ថាខ្លួនក៏ប្រាថ្នាចង់បានបទឈប់បាញ់ដែរ។
វិមានក្រឹមឡាំងបញ្ជាក់ថាបទឈប់បាញ់សម្រាប់ពេលនេះមិនទាន់ទៅរួចទេ។ ក្រឹមឡាំងថាលោកពូទីនត្រូវការសម្រេចតាមផែនការរបស់គាត់ជាមុនសិន។ នេះមិនមែនជាលើកទី១ទេដែលរុស្ស៊ីនិយាយដូច្នេះ។ កាលពីពេលកន្លងមក លោកប៉េស្កូស និងមន្ត្រីរដ្ឋាភិបាលរុស្ស៊ីនិយាយជាច្រើនដងហើយថារុស្ស៊ីមិនមែនយកជើងរាទឹកនៅក្នុងការចរចាសន្តិភាពទេ។ ប៉ុន្តែទន្ទឹមនឹងការថ្លែងដូច្នេះ រុស្ស៊ីបន្តវាយប្រហារឥតបន្ធូរដៃទៅលើទីក្រុងតូចធំរបស់អ៊ុយក្រែន។
លោកប៉េស្កូសថ្លែងប្រាប់ទូរទស្សន៍រដ្ឋរុស្ស៊ីថាលោកពូទីនធ្លាប់រំលឹកជាច្រើនដងហើយថាលោកពិតជាប្រាថ្នាចង់បានណាស់ការដោះស្រាយបញ្ហាអ៊ុយក្រែនដោយសន្តិវិធីកាន់តែឆាប់តាមដែលអាចធ្វើទៅបាន។ លោកថ្លែងបន្តទៀតថាវាទាមទារពេលវេលាយូរអង្វែង ទាមទារកិច្ចខិតខំប្រឹងប្រែង ហើយវាមិនមែនជារឿងងាយស្រួលដោះស្រាយនោះឡើយ។ បញ្ហាធំនៅត្រង់ថាយើងត្រូវតែសម្រេចគោលដៅរបស់យើងឱ្យបាន។ យើងបានកំណត់គោលដៅច្បាស់លាស់រួចហើយ។
វិមានក្រឹមឡាំងធ្លាប់និយាយរួចហើយថាបើចង់បានកិច្ចព្រមព្រៀងសន្តិភាពលុះត្រាតែអ៊ុយក្រែនយល់ព្រមប្រគល់តំបន់ធំៗចំនួនបួនរបស់ខ្លួនដែលស្មើនឹង២០%នៃទឹកដីសរុបទៅឱ្យរុស្ស៊ី។ អ៊ុយក្រែនត្រូវតែដកកងទ័ពថយចេញពីតំបន់ទាំងនោះ។ តំបន់ទាំងនេះរួមទាំងតំបន់គ្រីម៉េមួយទៀតត្រូវរុស្ស៊ីដាក់បញ្ចូលជាទឹកដីរបស់ខ្លួន និងអនុម័តដោយរដ្ឋសភារួចហើយ។ ប៉ុន្តែសហគមន៍អន្តរជាតិ (ជាពិសេស ក្រុមបស្ចិមប្រទេស) មិនទទួលស្គាល់ទេ។
នៅក្នុងការថ្លែងសុន្ទរកថានាពេលរាត្រី លោកហ្សេឡិនស្គីថ្លែងថាមន្ត្រីរដ្ឋាភិបាលរបស់លោកបានស្នើជួបគ្នាជាមួយរុស្ស៊ីជាថ្មីម្ដងទៀតនៅសប្ដាហ៍នេះ។ សារព័ត៌មានរបស់រដ្ឋរុស្ស៊ីផ្សាយថារុស្ស៊ីមិនទាន់កំណត់ថាត្រូវជួបគ្នានៅពេលណានៅឡើយទេ។ ប៉ុន្តែទីកន្លែងជួបគ្នាប្រហែលជាទីក្រុងអ៊ីស្តាន់ប៊ូល ប្រទេសតួកគី។ ឥឡូវនេះ គេកំពុងរង់ចាំអ៊ុតមើលដើម្បីចង់ដឹងថាតើត្រាំនឹងប្រើប្រាស់វិធានការក្ដៅបែបណាខ្លះទៅលើរុស្ស៊ី។ ខាងលើនេះជាការដកស្រង់ប្រភពពីទីភ្នាក់ងារព័ត៌មានអេភី (AP)៕
ចែករំលែកព័តមាននេះ