ផ្អែកតាមសន្ទុះនៃកំណើនការនាំចេញផលិតផលកសិកម្មកម្ពុជា នៅឆមាសទី១ ដើមឆ្នាំដែលសម្រេចបានកំណើនប្រមាណជា២៧ភាគរយ ក្នុងឆ្នាំ២០២៥នេះ អ្នកវិភាគបានព្យាករណ៍ថា កម្ពុជាអាចឈានទៅនាំចេញផលិតផលកសិកម្ម មានតម្លៃលើសពី៥ពាន់លានដុល្លារ ។ យោងតាមស្ថិតិនៃការនាំចេញដែលបានប្រកាស ដោយក្រសួងកសិកម្ម…
ផ្អែកតាមសន្ទុះនៃកំណើនការនាំចេញផលិតផលកសិកម្មកម្ពុជា នៅឆមាសទី១ ដើមឆ្នាំដែលសម្រេចបានកំណើនប្រមាណជា២៧ភាគរយ ក្នុងឆ្នាំ២០២៥នេះ អ្នកវិភាគបានព្យាករណ៍ថា កម្ពុជាអាចឈានទៅនាំចេញផលិតផលកសិកម្ម មានតម្លៃលើសពី៥ពាន់លានដុល្លារ ។
យោងតាមស្ថិតិនៃការនាំចេញដែលបានប្រកាស ដោយក្រសួងកសិកម្ម រុក្ខាប្រមាញ់ និងនេសាទ ប្រទេសកម្ពុជា បាននាំចេញកសិផលចំនួន៧,៨៣លានតោន នៅក្នុងឆមាសទីមួយ ពោល គឺមានកំណើនកើនឡើងជាង២៧ ភាគរយ ។
របាយការណ៍នោះបានអះអាងថា ជាមួយនឹងការនាំចេញផលិតផលកសិកម្ម នៅក្នុងបរិមាណនេះ កម្ពុជាអាចសម្រេចបានប្រាក់ចំណូលសរុបចំនួន ២,៨៧ ពាន់លានដុល្លារ ។ មុខទំនិញកសិកម្មសំខាន់ៗដែលកម្ពុជាអាចនាំចេញនៅក្នុងអំឡុងពេលនោះ រួមមាន អង្ករ កៅស៊ូ ដំឡូងមី ស្វាយ ចេកលឿង ម្រេច គ្រាប់ស្វាយចន្ទី មៀនប៉ៃលិន ពោត និងដូងប្រេង ជាដើម ។
ផ្អែកតាមសន្ទស្សន៍នៃកំណើនដែលកម្ពុជាអាចសម្រេចបាននៅក្នុងឆមាសទី១នេះ អ្នកវិភាគបានព្យាករណ៍ថា នៅពេញមួយឆ្នាំ២០២៥ កម្ពុជាអាចនឹងសម្រេចបានការនាំចេញសរុបមានតម្លៃលើសពី៥ពាន់លានដុល្លារ ។ អ្នកវិភាគរូបនោះបានឲ្យដឹងថា ប្រភពនៃកំណើនទាំងនេះ អាចមួយចំណែកបានមកពីការនាំចេញផលិតផលថ្មីមួយ គឺទុរេន ដោយកាលពីសប្តាហ៍មុនកម្ពុជាអាចបើកទីផ្សារទុរេននាំចេញបាន១៧លានតោន ។
កាលពីឆ្នាំ២០២៤ កន្លងទៅកម្ពុជា អាចសម្រេចបានការនាំចេញមានទំហំសរុប១១,៦ លានតោន ជាមួយនឹងតម្លៃសរុបប្រមាណជា ៤,៧៩ ពាន់លានដុល្លារ ។ ផ្អែកតាមស្ថិតិនេះអ្នកដែលបានតាមដានស្ថានភាពនៃការនាំចេញផលិតផលកសិកម្មកម្ពុជាបានឲ្យដឹងថា នៅសល់រយៈពេលដល់ទៅ៥ខែទៀតបរិមាណនៃការនាំចេញនៅក្នុងឆ្នាំ២០២៥ពេញមួយឆ្នាំ គឺអាចលើសបរិមាណនៃការនាំចេញនៅក្នុងឆ្នាំ២០២៤ ហើយ ។
រូបភាពតំណាងដោយ AI
ប្រភពដដែលបានបន្តថា ការនាំចេញកសិផលទៅថៃអាចនឹងស្រុតចុះ ប៉ុន្តែទំនងជាមិនប៉ះពាល់ធ្ងន់ធ្ងរទេ ហើយកម្ពុជាអាចរកចំណែកបំពេញការនាំចេញបាន ជាពិសេស គឺការនាំចេញទៅចិន និងវៀតណាម ។
មកដល់ពេលនេះ កសិកម្ម គឺជាសសរស្តម្ភមួយក្នុងចំណោមសសរស្តម្ភទាំងបួន ដែលជួយទ្រទ្រង់ដល់កំណើនសេដ្ឋកិច្ចរបស់ប្រទេសកម្ពុជា បន្ថែមលើការនាំចេញសម្លៀកបំពាក់ ស្បែកជើង និងការនាំចេញទំនិញធ្វើដំណើរ ទេសចរណ៍ និងសំណង់ និងអចលនទ្រព្យ ៕
ចែករំលែកព័តមាននេះ