ទីផ្សារគ្រាប់ស្វាយចន្ទីកម្ពុជានៅប្រទេសវៀតណាម អាចឆ្អែតហើយដែលចាំបាច់ កម្ពុជាគួរតែសម្លឹងមើលច្រកឬប្រភពទីផ្សារថ្មីផ្សេង ឬក៏ពង្រឹងសមត្ថភាពកែច្នៃនៅក្នុងស្រុក ដើម្បីបង្កើនតម្លៃបន្ថែម ហើយពង្រឹង ឯករាជ្យភាពទីផ្សារ ។ តាមសេចក្តីរាយការណ៍របស់សារព័ត៌មានវៀតណាម បានឲ្យដឹងថា…
ទីផ្សារគ្រាប់ស្វាយចន្ទីកម្ពុជានៅប្រទេសវៀតណាម អាចឆ្អែតហើយដែលចាំបាច់ កម្ពុជាគួរតែសម្លឹងមើលច្រកឬប្រភពទីផ្សារថ្មីផ្សេង ឬក៏ពង្រឹងសមត្ថភាពកែច្នៃនៅក្នុងស្រុក ដើម្បីបង្កើនតម្លៃបន្ថែម ហើយពង្រឹង ឯករាជ្យភាពទីផ្សារ ។
តាមសេចក្តីរាយការណ៍របស់សារព័ត៌មានវៀតណាម បានឲ្យដឹងថា គិតត្រឹមតែរយៈពេល៥ ខែនៃឆ្នាំ២០២៥នេះទេ ក្រុមហ៊ុនវៀតណាម បាននាំចូលគ្រាប់ស្វាយចន្ទីពីកម្ពុជាប្រមាណជា៨៧៣.២០០តោន ដែលមានតម្លៃប្រមាណ១,៣២ពាន់លានដុល្លារ ។ បរិមាណនៃការនាំចូលនេះ មានកំណើនកើនឡើង១៥ភាគរយ រីឯតម្លៃវិញគឺកើនឡើង ជាង ៣៦ភាគរយ បើធៀបនឹងរយៈពេលដដែលកាលពីឆ្នាំ២០២៤កន្លងទៅ ។
បរិមាណនៃគ្រាប់ស្វាយចន្ទីមិនទាន់កែច្នៃរបស់កម្ពុជា ដែលនាំចូលទៅវៀតណាមនេះ គឺមានប្រមាណជាជិត៦៣ភាគរយនៃតម្រូវការគ្រាប់ស្វាយចន្ទី ដើម្បីកែច្នៃនាំចេញបន្ត ប៉ុន្តែទោះបីជាយ៉ាងណាក៏ដោយ បើគិតពីការនាំចេញវិញបរិមាណនៃការនាំចេញរបស់វៀតណាម នៅឆមាសទី១ គឺធ្លាក់ចុះ ទោះបីជាតម្លៃវាកើនឡើងក៏ដោយ ។
សារព័ត៌មាន Vietnam Plus បានឲ្យដឹងថា នៅឆមាសទី១ដើមឆ្នាំវៀតណាមនាំចេញគ្រាប់ស្វាយចន្ទីបាន ត្រឹម ៣៤៦.៨០០០ តោន ធ្លាក់ចុះ២,៧ភាគរយ ខណៈដែលតម្លៃនៃការនាំចេញវិញគឺបាន ២,៣៦ ពាន់លានដុល្លារ គឺកើនឡើង២០ភាគរយឯណោះ ។
ការដែលបរិមាណនៃការនាំចេញធ្លាក់ចុះនេះហើយ ដែលវាជាបច្ច័យមួយដែលវៀតណាមអាចនឹងបន្ថយល្បឿននៃការនាំចូលគ្រាប់ស្វាយចន្ទីពីកម្ពុជាបន្ថែមទៀត បើទោះបីជាវៀតណាមនៅតែកំណត់គោលដៅ បង្កើនការនាំចេញផលិតផលនេះទៅទីផ្សាររបស់ខ្លួនក៏ដោយចុះ ។
នៅក្នុងមួយឆ្នាំ កម្ពុជាអាចមានសមត្ថភាពប្រមូលផលគ្រាប់ស្វាយចន្ទីប្រមាណជា១,២លានតោន ប៉ុន្តែទោះបីជាយ៉ាងណាក៏ដោយ វាអាចឡើង ឬថយចុះ អាស្រ័យនៅលើកត្តាអាកាសធាតុ ហើយនៅក្នុងនោះ មួយចំណែកតូច គឺកម្ពុជាអាចកែច្នៃនៅក្នុងស្រុក ខណៈដែលចំណែកភាគច្រើន គឺខ្ទង់៩០ភាគរយ ហើយដែលនាំចេញទៅវៀតណាម ។
មកដល់ពេលនេះ គ្រាប់ស្វាយចន្ទីមានទីផ្សារទូលំទូលាយ ពីព្រោះវាត្រូវបានគេដឹងថា គឺជាប្រភេទអាហារ ដែលមានជំនួយផ្នែកសុខភាព ហើយក៏គេអាចយកទៅទទួលទានធម្មតា ឬទៅធ្វើជាគ្រឿងផ្សំលើមុខម្ហូប មួយចំនួន ។
ទីផ្សាររបស់វារួមមានចិន ជប៉ុន កូរ៉េខាងត្បូង ឥណ្ឌា នៅអឺរ៉ុប អាមេរិក ហើយសូម្បីតែនៅតំបន់មជ្ឈិមបូព៌ាក៏មានការពេញនិយមដែរ ដែលទីនោះ គឺគួរតែជាគោលដៅដែលកម្ពុជាគិតគូរ ពង្រឹងផលិតកម្មនៅក្នុងស្រុក ហើយនាំចេញដោយផ្ទាល់ ដើម្បីបង្កើនតម្លៃបន្ថែមសម្រាប់ពលរដ្ឋ និងបង្កើតការងារធ្វើ ៕
ចែករំលែកព័តមាននេះ