ខេត្តស្ទឹងត្រែង ៖ ជនជាតិចិន ចំនួន៩នាក់ ត្រូវបានកម្លាំងកងរាជអាវុធហត្ថប្រចាំគោលដៅ ចំណុចផ្លូវបំបែកស្ពានមេគង្គ ឃាត់ត្រួតពិនិត្យខណៈធ្វើដំណើរតាមរថយន្តមួយគ្រឿង ឆ្លងកាត់ខេត្តស្ទឹងត្រែង កាលពីព្រឹកថ្ងៃទី១៨ ខែកក្កដា…
ខេត្តស្ទឹងត្រែង ៖ ជនជាតិចិន ចំនួន៩នាក់ ត្រូវបានកម្លាំងកងរាជអាវុធហត្ថប្រចាំគោលដៅ ចំណុចផ្លូវបំបែកស្ពានមេគង្គ ឃាត់ត្រួតពិនិត្យខណៈធ្វើដំណើរតាមរថយន្តមួយគ្រឿង ឆ្លងកាត់ខេត្តស្ទឹងត្រែង កាលពីព្រឹកថ្ងៃទី១៨ ខែកក្កដា ឆ្នាំ២០២៥ ដោយបានដកហូតទូរសព្ទដៃ ចំនួន១០គ្រឿង និងសម្ភារៈមួយចំនួនទៀត ។
ប្រភពព័ត៌មានឲ្យដឹងថា រថយន្តដឹកជនជាតិចិនខាងលើ ត្រូវគេរាយការណ៍ថា បានចេញដំណើរពីចំណុចទឹកធ្លាក់ព្រះនិម្មិត ស្ថិតក្នុងភូមិកំពង់សាមី ឃុំកំពុងស្រឡៅ២ ស្រុកឆែប ខេត្តព្រះវិហារ ដើម្បីឆ្ពោះទៅកាន់ខេត្តព្រះសីហនុ ដោយត្រូវឆ្លងកាត់ខេត្តស្ទឹងត្រែង តែមកដល់ចំណុចគោលដៅត្រួតពិនិត្យ របស់កងរាជអាវុធហត្ថប្រចាំការក្បែស្ពានមេគង្គ ស្ថិតនៅក្នុងភូមិបាចុង សង្កាត់ព្រះបាទ ក្រុងស្ទឹងត្រែង ក៏ត្រូវបានឃាត់ត្រួតពិនិត្យតែម្តង ។
ប្រភពព័ត៌មានបន្តថា ដោយផ្អែកតាមស្រាវជ្រាវរបស់សមត្ថកិច្ច បានដាក់ការសង្ស័យថា ក្រុមជនជាតិចិននេះ មានការពាក់ព័ន្ធនឹងការលបលួចធ្វើសកម្មភាពឆបោកតាមអនឡាញ ដោយពួកគេមានគោលនៅចំណុចទឹកធ្លាក់ព្រះនិម្មិត ជាតំបន់កាស៊ីណូ ។
ក្រោយការឃាត់រថយន្តដឹកជនជាតិចិននោះ កម្លាំងកងរាជអាវុធហត្ថ បានដកហូតទូរសព្ទដៃ ចំនួន១០គ្រឿង រួមនិងសម្ភារៈមួយចំនួនធំ ផងដែរ ។
បច្ចុប្បន្ន ជនជាតិចិនដែលត្រូវបានឃាត់ខ្លួន និងវត្ថុតាងទាំងអស់ត្រូវបានប្រគល់ជូនប៉ូលិសអន្តោប្រវេសន៍ នៃស្នងការដ្ឋាននគរបាលខេត្តស្ទឹងត្រែង បន្តអនុវត្តនីតិវិធីច្បាប់ជាធរមាន ។
សមត្ថកិច្ច នឹងចាត់វិធានការតាមផ្លូវច្បាប់ឱ្យតឹងរឹងបំផុតចំពោះមេខ្លោងទាំងឡាយ ដែលជាប់ពាក់ព័ន្ធនឹងអំពើឆបោកតាមប្រព័ន្ធបច្ចេកវិទ្យានេះ ៕
ចែករំលែកព័តមាននេះ