ប៉េកាំង ៖ រដ្ឋាភិបាលនៃសាធារណរដ្ឋប្រជាមានិតចិន បានប្រកាសផ្តល់ជំនួយជាង២០លានយ័ន គឺជិត៣លានដុល្លារអាមេរិក ជួយដល់ជនភៀសសឹកនៅប្រទេសកម្ពុជា ដែលរងគ្រោះដោយសារការឈ្លានពានរបស់កងទ័ពថៃ ។ ការផ្តល់ជំនួយនេះ ធ្វើឡើងក្នុងជំនួបរវាងនាយករដ្ឋមន្ត្រីកម្ពុជា…
ប៉េកាំង ៖ រដ្ឋាភិបាលនៃសាធារណរដ្ឋប្រជាមានិតចិន បានប្រកាសផ្តល់ជំនួយជាង២០លានយ័ន គឺជិត៣លានដុល្លារអាមេរិក ជួយដល់ជនភៀសសឹកនៅប្រទេសកម្ពុជា ដែលរងគ្រោះដោយសារការឈ្លានពានរបស់កងទ័ពថៃ ។
ការផ្តល់ជំនួយនេះ ធ្វើឡើងក្នុងជំនួបរវាងនាយករដ្ឋមន្ត្រីកម្ពុជា សម្តេចបវរធិបតី ហ៊ុន ម៉ាណែត និងប្រធានាធិបតីចិន ឯកឧត្តម ស៊ីជីងពីង នៅក្រៅកិច្ចប្រជុំកំពូលអង្គការសហប្រតិបត្តិការសៀងហៃបូក(SCO) ក្នុងទីក្រុងធានជីង សាធារណរដ្ឋប្រជាមានិតចិន ពីថ្ងៃទី៣០ ខែសីហា ដល់ថ្ងៃទី១ ខែកញ្ញា ឆ្នាំ២០២៥ ។
ក្នុងជំនួបពិភាក្សាទ្វេភាគីជាមួយសម្តេចធិបតីហ៊ុន ម៉ាណែត ឯកឧត្តម ស៊ី ជីងពីង បានបញ្ជាក់ពីការផ្តល់ជំនួយមនុស្សធម៌ក្នុងទឹកប្រាក់ជាង២០លានយ័ន គឺជិត៣លានដុល្លារអាមេរិក ដល់ជនភៀសសឹកនៅប្រទេសកម្ពុជា ក្នុងជម្លោះប្រដាប់អាវុធជាមួយទាហានថៃកាលពីខែកក្កដាកន្លងមកនេះ ។
ប្រាក់ជំនួយនេះ នឹងប្រើដើម្បីស្តារឡើងវិញនូវការខូចខាត និងការសម្រាលទុក្ខលំបាករបស់ប្រជាពលរដ្ឋខ្មែររស់នៅជាប់ព្រំដែនកម្ពុជា-ថៃដែលរងផលប៉ះពាល់ពីសង្គ្រាម ។ នេះបើតាមសេចក្តីប្រកាសព័ត៌មានស្តីពីលទ្ធផលនៃកិច្ចប្រជុំ SCO របស់ទីស្តីការគណៈរដ្ឋមន្ត្រី ដែលចេញផ្សាយនៅថ្ងៃទី២ ខែកញ្ញា ឆ្នាំ២០២៥ ។ តាមសេចក្តីប្រកាសព័ត៌មាននេះ ឯកឧត្តមប្រធានាធិបតីចិនបានប្រកាសជំហរជាថ្មីគាំទ្របទឈប់បាញ់ និងគាំទ្រតួនាទីរបស់ម៉ាឡេស៊ីក្នុងការបង្កើតក្រុមអ្នកសង្កេតការណ៍អាស៊ាន។ឯកឧត្តម ស៊ី ជីនពីង ក៏ចង់ឃើញការបង្កើតក្រុមអ្នកសង្កេតការណ៍អាស៊ាន(AOT) ឲ្យបានកាន់តែឆាប់ផងដែរ ។
មិត្តដែកថែបរបស់កម្ពុជា ក៏បានអះអាងពីការបន្តកិច្ចសហប្រតិបត្តិការទ្វេភាគីជាមួយកម្ពុជា ក្នុងនោះរួមមានការរឹតចំណងកិច្ចសហប្រតិបត្តិការត្បូងពេជ្រ ច្រករបៀងមច្ឆា-អង្គរ និងចក្ររបៀងឧស្សាហកម្ម-បច្ចេកវិទ្យា ។ ជាការឆ្លើយតប ប្រមុខរាជរដ្ឋាភិបាលកម្ពុជាសម្តេចបវរធិបតី ហ៊ុន ម៉ាណែត បានប្រកាសគាំទ្រគំនិតផ្តួចផ្តើមរបស់ចិនក្នុងកិច្ចប្រជុំកំពូលអង្គការសហប្រតិបត្តិការសៀងហៃបូក ក្រោម«ស្មារតីសៀងហៃ»ថា ជាការលើកស្ទួយសណ្តាប់ធ្នាប់សាកល ពោលគឺការរក្សាចំណងកិច្ចសហប្រតិបត្តិការ អធិបតេយ្យភាព បូរណភាពទឹកដី ផ្តល់តម្លៃភាពចម្រុះ និងការមិនជ្រៀតជ្រែកកិច្ចការផ្ទៃក្នុងរបស់ប្រទេសដទៃ ។
សម្តេចបវរធិបតី ហ៊ុន ម៉ាណែត អះអាងទៀតថា កម្ពុជានឹងចូលរួមឥតងាករេចំពោះកិច្ចការការពារសន្តិសុខក្នុងតំបន់ ពិសេសការបន្តរឹតចំណងទាក់ទងរវាងប្រទេសទាំង២ ឲ្យកាន់តែរឹងមាំថែមទៀត ៕
ចែករំលែកព័តមាននេះ