រាជធានីភ្នំពេញ ៖ កាលពីល្ងាចថ្ងៃទី១០ កក្កដា ឆ្នាំ២០១១ តំណាងក្រុមហ៊ុនមាសសត្យាគ្រុប និងតំណាងសិល្បករ សិល្បការិនី រួមមានលោកសាម៉ន បណ្ឌិត លោករចនា ដួង លោកសាយ សៀរ៉ា កញ្ញាគង់ ចាន់ស្រីមុំ កញ្ញាសុវណ្ណ លីនដា និងក្រុមសិល្បករ សិល្បការិនីជាច្រើនរូបបាននាំយកអំណោយជាគ្រឿងឧបភោគបរិភោគទៅចែកជូនកុមារកំព្រា និងជនជរាក្រីក្រដែលរស់នៅក្រោមសមាគមសិល្បៈចម្រុះជ័យប្រាជ្ញកុមារ។ អំណោយទាំងនោះរួមមានអង្ករ២៥០គីឡូក្រាម មី១០កេស អំបិល១០គីឡូក្រាម ខ្ទឹមស១០គីឡូក្រាម ទឹកត្រី៥យួរ ទឹកស៊ីអ៊ីវ៥យួរ ចាន១០ ស្ករស១០គីឡូក្រាម ស្ករគ្រាប់៤កញ្ចប់ធំ ប្រេងឆា២០លីត្រ ទឹកដោះគោ២០កំប៉ុង និងត្រីខ ប្រេងខ្យល់ ប្រេងក្រឡា រួមទាំងគ្រឿងឧបភោគបរិភោគមួយចំនួនទៀតសរុបជាទឹកប្រាក់ចំនួន៥០០ដុល្លារសហរដ្ឋអាមេរិក ។
នៅក្នុងពិធីចែកអំណោយនោះដែរ លោកគង់ វុទ្ធី ហៅនាយក្វាន់ទុង ប្រធានសមាគមបានឱ្យដឹងថា សមាគមរបស់លោកបានបើកទ្វារទទួលយកកុមារកំព្រា និងចាស់ជរាក្រីក្រគ្មានទីពឹងពុំនាក់ចាប់ពីឆ្នាំ២០០២ រហូតមកដល់សព្វថ្ងៃមានកុមារជាច្រើនបានសិក្សារៀនសូត្រចំណេះទូទៅនិងសិល្បៈ។ ពេលពួកគេរៀនចេះហើយយកចំណេះនេះទៅចាប់អាជីពជាអ្នកសិល្បៈ និងចាប់អាជីពការងារផ្សេងៗទៀត។ ដោយឡែកបច្ចុប្បន្នសមាគមទទួលបន្ទុកចិញ្ចឹមក្មេងកំព្រា និងចាស់ជរាសរុបចំនួន៣៥នាក់ ក្នុងនោះកុមារអាយុចាប់ពី១០ខែរហូតដល់១២ឆ្នាំ មាន១២នាក់ កុមារអាយុ១៣ឆ្នាំដល់១៨ឆ្នាំ មាន៨នាក់ យុវជនអាយុ២០ឆ្នាំចំនួន៥នាក់ និងចាស់ជរា៥នាក់ដែលសុទ្ធតែកុមារកំព្រាចាស់ជរាក្រីក្រគ្មានទីពឹង ។
លោកប្រធានក្លឹបបានបន្តថា កុមារទាំងអស់ត្រូវបានសិក្សារៀនសូត្រចំណេះទូទៅគ្រប់ៗគ្នាក្រៅពីនេះសមាគមក៏អញ្ជើញគ្រូ ភាសាអង់គ្លេស និងភាសាចិនមកបង្រៀនពួកគេនៅក្នុងសមាគមផងដែរ ។ ជាងនេះទៅទៀតក្រៅពីសិក្សាចំណេះទូទៅ និងភាសាបរទេសសមាគមក៏បានខិតខំប្រឹងប្រែងបង្ហាត់បង្រៀនផ្នែកសិល្បៈតាមរបៀបសម្តែង និងច្រៀងដល់ពួកគេផងដែរ។
ក្នុងពិធីចែកអំណោយនោះដែរ ក្រុមការងារតំណាងក្រុមហ៊ុន និងតំណាងសិល្បករ សិល្បការិនីបានឱ្យដឹងថា អំណោយបន្តិចបន្តួចនេះបានមកពីក្រុមសិល្បករ សិល្បការិនីសម្តេងច្រៀងក្នុងការប្រគំតន្ត្រីមនុស្សធម៌អន្តរជាតិ កាលពីថ្ងៃទី១៨ មិថុនា ដល់ថ្ងៃទី២៣ មិថុនា ឆ្នាំ២០១១ នៅមជ្ឈមណ្ឌលផ្សារឈូកមាសកន្លងទៅ ដែលសប្បុរសជននានាបានផ្តល់ឱ្យដើម្បីចែករំលែកដល់ប្រជាជនខ្មែរដែលជួបប្រទះការខ្វះខាត ជួបប្រទះគ្រោះធម្មជាតិផ្សេងៗ នេះជាទឹកចិត្តរបស់ជាតិខ្មែរដែលសាមគ្គីគ្នា ៕
ចែករំលែកព័តមាននេះ