ផ្លែទុរេនស្រស់កម្ពុជាជើងដំបូងជាង១៧តោន ត្រូវបាននាំចេញជាផ្លូវការទៅកាន់ទីផ្សារប្រទេសចិន បន្ទាប់ពីបានឆ្លងកាត់ការត្រួតពិនិត្យ និងការបញ្ជាក់គុណភាពពីក្រសួងកសិកម្ម ស្របតាមពិធីសារនៃការនាំចេញរួចមក ។ ដូច្នេះ កម្ពុជាពិតជាអាចធ្វើបាននៅក្នុងការនាំចេញស្តេចផ្លែឈើទៅកាន់ទីផ្សារទុរេនដែលធំបំផុតនៅលើពិភពលោក នាពេលបច្ចុប្បន្ននេះ ខណៈដែលទីផ្សារនេះបានកំពុងតែកាន់កា.ប់ដោយប្រទេសក្បែរខាងកម្ពុជា…
ផ្លែទុរេនស្រស់កម្ពុជាជើងដំបូងជាង១៧តោន ត្រូវបាននាំចេញជាផ្លូវការទៅកាន់ទីផ្សារប្រទេសចិន បន្ទាប់ពីបានឆ្លងកាត់ការត្រួតពិនិត្យ និងការបញ្ជាក់គុណភាពពីក្រសួងកសិកម្ម ស្របតាមពិធីសារនៃការនាំចេញរួចមក ។
ដូច្នេះ កម្ពុជាពិតជាអាចធ្វើបាននៅក្នុងការនាំចេញស្តេចផ្លែឈើទៅកាន់ទីផ្សារទុរេនដែលធំបំផុតនៅលើពិភពលោក នាពេលបច្ចុប្បន្ននេះ ខណៈដែលទីផ្សារនេះបានកំពុងតែកាន់កា.ប់ដោយប្រទេសក្បែរខាងកម្ពុជា ដែលមានកសិកម្មរីកចម្រើន ហើយផ្ទៃដីក៏ធំបទពិសោធន៍គេក៏ក្រាស់ក្រែល ។ ផលិតផលទុរេនរបស់កម្ពុជាទាំងនេះ បានដឹកចេញតាមច្រកសមុទ្រ ហើយគ្រោងនឹងទៅដល់ប្រទេសចិនក្នុងរយៈពេល៩ថ្ងៃទៀត ។
តាមការបញ្ជាក់របស់លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានបង្ហើបថា បន្ទាប់ពីនាំចេញទុរេន១៧តោននេះរួចបើមិនមានអ្វីប្រែប្រួលទេ កម្ពុជានឹងមានទុរេន៣កុងតឺន័រទៀត ត្រៀមដឹកជញ្ជូននាំចេញបន្ថែមនៅសប្តាហ៍ក្រោយ ។ លោកបានបញ្ជាក់ថា «នេះ គឺជាជោគជ័យថ្មីមួយទៀតសម្រាប់ការនាំចេញផ្លែឈើស្រស់របស់កម្ពុជា ទៅកាន់ទីផ្សារដ៏មានសក្តានុពលមួយនេះ ។ សូមចូលរួមអបអរសាទរដល់កសិករ និងម្ចាស់ចម្ការទាំងអស់គ្នាផង» ។
តើចេញពីការចាប់ផ្តើមនៅក្នុងពេលនេះ ទុរេនកម្ពុជា អាចដណ្តើមបាននូវជ័យជំនៈលើទីផ្សារទុរេនចិនដែលកំពុងតែកាន់កាប់ដោយទុរេនថៃ វៀតណាម និងម៉ាឡេស៊ី ឬហ្វីលីពីនបានដែរឬទេ?
ជាការពិតកម្ពុជា មានផ្ទៃដីដាំទុរេនប្រមាណត្រឹមតែ៥.០០០ហិកតា ហើយមកដល់ពេលនេះ គឺទើបតែអាចមានលទ្ធភាពប្រមូលផល លើផ្ទៃដីត្រឹមតែ៣.០០០ហិកតា ក្នុងមួយឆ្នាំជាមួយនឹងបរិមាណបានប្រមាណ ៣៧.០០០តោនក្នុងមួយឆ្នាំ ។ ទិន្នផលនេះ ពិតជាមិនអាចយកទៅប្រកួតប្រជែងនឹងក្រុមប្រទេសទាំងនោះបានទេ នៅក្នុងពេលបច្ចុប្បន្ននេះ ដោយសារតែផលនៃទុរេនដែលប្រមូល គឺតិចណាស់ ហើយមិនតែប៉ុណ្ណោះមួយចំណែកធំ ត្រូវផ្គត់ផ្គង់ទីផ្សារនៅក្នុងស្រុកថែមទៀត ។
បរិមាណទុរេន ដែលកម្ពុជានាំចេញទៅចិន នៅក្នុងពេលនេះ និងពេលអនាគត គឺតិចតួច ប៉ុន្តែចង់ ឬមិនចង់ កម្ពុជាពិតជាអាចដណ្តើមបាននូវទីតាំងមួយ នៅក្នុងចំណែកទីផ្សារនៃទុរេននៅចិនដែលមួយឆ្នាំទីផ្សារនេះត្រូវការទុរេនមានតម្លៃដល់ទៅប្រមាណជា៧ពាន់លានដុល្លារឯណោះ ។
ការដែលប្រែក្លាយកម្ពុជាទៅជាប្រទេសនាំចេញទុរេនទៅកាន់ទីផ្សារចិន ដែលកម្ពុជាសម្រេចបាននៅពេលនេះបានធ្វើឲ្យមហាអំណាចនៃទីផ្សារទុរេនចាស់វង្សាទទួលស្គាល់កម្ពុជារួចហើយ ។ នេះ គឺជាជោគជ័យមួយរបស់កម្ពុជា បើទោះបីជាកម្ពុជាមិនទាន់មានលទ្ធភាពដណ្តើមបានទីផ្សារធំឈ្នះក្រុមប្រទេសទាំងនោះក៏ដោយ ។
កាលពីឆ្នាំ២០២៤កន្លងទៅ ប្រទេសចិន បាននាំចូលទុរេនក្នុងទំហំទឹកប្រាក់សរុបប្រមាណជា៧ ពាន់លានដុល្លារ ដោយប្រទេសថៃកាន់កាប់ ចំណែកទីផ្សារសរុប៥៧ភាគរយ វៀតណាម៤១,៥ភាគរយ ក្រៅពីនោះ គឺគ្រប់គ្រងដោយទុរេននាំចូលពីប្រទេសហ្វីលីពីន និងម៉ាឡេស៊ី ។ ឥឡូវនេះ គឺកម្ពុជាបានចូលក្នុងទីផ្សារនេះដែរ ប៉ុន្តែនៅពេលខាងមុខ គឺអាចមានមកពីប្រទេសឥណ្ឌូនេស៊ី និងឡាវបន្ថែមទៀត ។
មកដល់ពេលនេះ ទីផ្សារទុរេនចិន នៅតែបន្តកាន់កាប់ដោយទុរេនថៃ និងវៀតណាមដដែល ។ ប៉ុន្តែបរិមាណ នៃការនាំចេញរបស់ប្រទេសទាំងពីរហាក់ធ្លាក់ចុះ ដោយសារតែការរឹតត្បិតការនាំចូលបណ្តាលមកពីការរកឃើញថា ផលិតផលទុរេនមកពីប្រភពទាំងពីរមានប្រឡាក់ប្រលូកសំណល់គីមី ដែលអាចនឹងមានបញ្ហាសុខភាព ជាពិសេស គឺពាក់ព័ន្ធនឹងការរវិវត្តន៍ទៅមុខនៃជំងឺមហាវីក ។ នេះ គឺជាឱកាសសម្រាប់កម្ពុជា នៅក្នុងការច្បាមយកនូវចំណែកទីផ្សារមួយហើយឈរជើងឲ្យជាប់ ។
ពាក់ព័ន្ធនឹងទីផ្សារទុរេនកម្ពុជានេះ លោក វ៉ាង វេនប៊ិន (Wang Wenbin) ឯកអគ្គរដ្ឋទូតចិនប្រចាំកម្ពុជា ក៏បានបង្ហាញការគាំទ្រយ៉ាងមុតមាំចំពោះទុរេនកម្ពុជា នៅក្នុងអំឡុងពេលទស្សនកិច្ចចម្ការ ទុរេននាពេលថ្មីៗនេះ ។ លោកបាននិយាយ ក្នុងអំឡុងពេលធ្វើដំណើរកាលពីដើមខែនេះថា លោកពិតជារីករាយដែលបានទៅទស្សនាចម្ការទុរេនកម្ពុជា ហើយបានភ្លក្សរស់ជាតិផ្លែទុរេនដែលល្អបំផុតក្នុងពិភពលោក ។
តើកម្ពុជាគួរតែធ្វើយ៉ាងណា ដើម្បីអភិវឌ្ឍន៍ទីផ្សារទុរេននៅចិន?
សូមកុំលោភលន់ ហើយកំណត់គោលដៅផ្តួលគេផ្តួលឯង ពីព្រោះដូចដែលយើងដឹងហើយ ទុរេនយើងជាផលិតផលថ្មី ។ ដូច្នេះ វាទាមទារឲ្យគេស្គាល់ឲ្យគេដឹង ។ ដើម្បីឲ្យគេស្គាល់គេដឹងវាចាំបាច់ណាស់ យើងត្រូវតែធ្វើទីផ្សារ និងការឃោសនាពីផលិតផលទុរេនរបស់យើង ។ ក្រៅពីនោះ យើងក៏ត្រូវតែធានាឲ្យបានថា គុណភាពទុរេនរបស់យើង គឺជាផលិតផលដែលចេញមកពីកសិកម្មបែបធម្មជាតិ មិនប្រឡាក់ប្រលូកសារធាតុគីមីគ្រោះថ្នាក់ដល់សុខភាព ។ យើងចាំបាច់ណាស់ ត្រូវឲ្យពលរដ្ឋចិនដែលនិយមទទួលទានទុរេនដឹង និងស្គាល់ពីគុណភាពនៃទុរេនដែលដាំដោយការទទួលខុសត្រូវ និងគោរពស្តង់ដាមាត្រដ្ឋាន នៃជីវិតអ្នកដែលទទួលទាន ។
រាល់ជំហាននៃការពង្រីកទីផ្សាររបស់យើង គួរតែធ្វើដោយហ្មត់ចត់ ដោយសិក្សាអំពីលទ្ធភាព និងសមត្ថភាពក៏ដូចជា មូលដ្ឋាននៃផលិតកម្មទុរេនរបស់កសិករ ហើយត្រូវតែចៀសវាងឲ្យបាននូវផលិតកម្ម កសិកម្មដែលអាចសម្លា.ប់ទីផ្សាររបស់យើង គឺកសិកម្មជំរុញទិន្នផលដោយសារធាតុគីមីកសិកម្ម ។ ក្រៅពីនោះក៏ត្រូវតែពិនិត្យ និងធានាការផ្គត់ផ្គង់ និងរក្សាស្ថេរភាព និងតម្រូវការនៃការផ្គត់ផ្គង់នៅក្នុងស្រុកផងដែរ ។ ឧទាហរណ៍បើអ្នកនាំចេញទុរេន យើងកំណត់គោលដៅនាំចេញ៥ឆ្នាំ ត្រូវដណ្តើមចំណែកទីផ្សារចិនបាន៥ភាគរយ ភាគនោះយើងក៏អាចនាំចេញបាន៣៥០ លានដុល្លារដែរ ហើយបើ១០ភាគរយវិញក៏បាន៧០០ លានដុល្លារមកចូលក្នុងចរន្តសេដ្ឋកិច្ចយើងបន្ថែមទៀតដែរ ៕
ចែករំលែកព័តមាននេះ