ក្រោយពីទុកចោលប្រមាណជាជិត២០ឆ្នាំ ក្រោយអនុម័តឡើង នៅខែធ្នូ ឆ្នាំ២០០៦ រាជរដ្ឋាភិបាលកម្ពុជាក្រោមការដឹកនាំដោយនាយករដ្ឋមន្ត្រី បន្តវេនបានប្រកាសរួចហើយថា នឹងយកច្បាប់នេះ មកអនុវត្តនៅក្នុងប្រទេសនៅរង្វង់ឆ្នាំ២០២៦ខាងមុខ ក្រោយធ្វើវិសោធនកម្មច្បាប់នេះ និងច្បាប់ដែលពាក់ព័ន្ធ…
ក្រោយពីទុកចោលប្រមាណជាជិត២០ឆ្នាំ ក្រោយអនុម័តឡើង នៅខែធ្នូ ឆ្នាំ២០០៦ រាជរដ្ឋាភិបាលកម្ពុជាក្រោមការដឹកនាំដោយនាយករដ្ឋមន្ត្រី បន្តវេនបានប្រកាសរួចហើយថា នឹងយកច្បាប់នេះ មកអនុវត្តនៅក្នុងប្រទេសនៅរង្វង់ឆ្នាំ២០២៦ខាងមុខ ក្រោយធ្វើវិសោធនកម្មច្បាប់នេះ និងច្បាប់ដែលពាក់ព័ន្ធ ។
តើឆ្នាំ២០២៦ គឺពិតជាដល់ពេលដែលកម្ពុជា ត្រូវតែអនុវត្តច្បាប់កាតព្វកិច្ចយោធានេះមែន ឬយ៉ាងណា? តាមការប្រកាសរបស់សម្តេចធិបតី ហ៊ុន ម៉ាណែត ក្នុងពិធីសម្ពោធដាក់ឱ្យប្រើប្រាស់សមិទ្ធផលនៃមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ និងអបអរសាទរខួបលើកទី៣២ ទិវាកងរាជអាវុធហត្ថ (១៤ កក្កដា ១៩៩៣-១៤ កក្កដា ២០២៥) កម្ពុជាប្រាកដជានឹងអនុវត្តនូវច្បាប់នេះហើយ ប៉ុន្តែត្រង់ថា អនុវត្តយ៉ាងណានោះទាល់តែពេលវេលាមកដល់បានដឹង ។
នៅមុន ពេលដែលច្បាប់នេះ ត្រូវបានអនុម័ត និងដាក់ឲ្យប្រើប្រាស់ តាំងពីថ្ងៃទី២២ ខែធ្នូ ឆ្នាំ២០០៦ មកដល់ពេលនេះច្បាប់ដែលមាន៦ជំពូក និង១៦មាត្រានេះ បានទុកចោលមិនអនុវត្តមកជាយូរ ប៉ុន្តែត្រូវបានសម្តេចធិបតី ប្រកាសថា នឹងដាក់វាឲ្យអនុវត្តនៅក្រោយពេលដែលធ្វើវិសោធនកម្មច្បាប់នេះ និងច្បាប់មួយទៀត គឺច្បាប់សោធន នៅក្នុងគោលបំណងជួយឱ្យកម្ពុជាងាយស្រួលនៅក្នុងការសម្រេចចិត្តបង្កើនបរិមាណបំពេញសាច់ទ័ព និងបង្កើនប្រសិទ្ធភាពក្នុងការបំពេញសាច់ទ័ព ដែលការបំពេញសាច់ទ័ពនេះ នឹងធ្វើឱ្យកម្ពុជាមិនខ្វះកូនទាហានសម្រាប់បំពេញបេសកម្មការពារបូរណភាពទឹកដី និងដែនអធិបតេយ្យភាពជាតិនោះទេ សម្រាប់ថ្ងៃអនាគត ។
សម្តេចធិបតី ក៏បានបញ្ជាក់ផងដែរថា ច្បាប់ដ៏សំខាន់នេះអាចនឹងត្រូវធ្វើវិសោធនកម្មមាត្រាមួយចំនួនជាពិសេស គឺត្រង់ចំណុចដែលកំណត់រយៈពេលនៃការអនុវត្តកាតព្វកិច្ចយោធា ដែលតាមច្បាប់ដែលមានស្រាប់ គឺយុវជនពី១៨ ដល់៣០ គឺជាប់កាតព្វកិច្ចយោធា ត្រឹមតែ១៨ខែ ប៉ុន្តែសម្តេចចង់ឱ្យវាមានរយៈពេលយូរជាងមុនពោល គឺដល់២ឆ្នាំ ឬ២៤ខែតែម្តង ។
ការធ្វើកាតព្វកិច្ចយោធា នៅក្នុងរយៈពេល២៤ខែបែបនេះ វា គឺជាគោលការណ៍ច្បាប់ដែលបានអនុវត្តដោយប្រទេសជាច្រើន ហើយការអនុវត្តច្បាប់នេះក៏ងាយស្រួលក្នុងការរើសកងទ័ពដែលអាចជ្រើសរើសចេញពីអ្នកដែលចូលទៅបំពេញកាតព្វកិច្ចយោធាផងដែរ ។ អ្នកដែលមិនត្រូវបានជ្រើសរើស ក្រោយពេលបំពេញកាតព្វកិច្ចយោធាហើយ គាត់ក៏អាចចូលទៅក្នុងសង្គមដែលយ៉ាងហោចណាស់ ក៏គាត់ជាមនុស្សដែលបានអប់រំ បណ្តុះបណ្តាល មានវិន័យ ហើយបើសិនជាពលរដ្ឋមិនបានបណ្តុះបណ្តាលតាមរយៈការបំពេញកាតព្វកិច្ចយោធាទេ នោះគាត់អាចជាមនុស្សផ្សេងដែលបង្កបញ្ហាដល់សង្គមជាដើម ។
តើការអនុវត្តច្បាប់កាតព្វកិច្ចយោធាបែបនេះ វាល្អ ឬយ៉ាងណាសម្រាប់កម្ពុជាជាពិសេសយុវជន? ការបកស្រាយថា ល្អ ឬអាក្រក់វាអាចអាស្រ័យលើរបៀបដែលវាត្រូវបានអនុវត្តក៏ដូចជា គោលដៅនៅពីក្រោយវា និងបរិបទជាតិដ៏ទូលំទូលាយ ។ គោលបំណងនៃការដាក់ឲ្យអនុវត្តនូវច្បាប់ នេះ គឺវាមានទាំងគុណសម្បត្តិ និងគុណវិបត្តិសំខាន់ៗ ដែលត្រូវពិចារណា ហើយសង្ឃឹមថា អ្វីដែលយើងលើកឡើងនេះ វាអាចជាធាតុចូលមួយសម្រាប់ជាមូលដ្ឋាននៅក្នុងការពិចារណា នៅក្នុងអំឡុងពេលដែលច្បាប់នេះកំពុងតែរៀបចំធ្វើវិសោធនកម្ម ។
នៅពេលដែលច្បាប់នេះ ត្រូវបានវិសោធនកម្មរួចរាល់ និងដាក់ឲ្យអនុវត្ត គឺវាល្អសម្រាប់គោលគំនិតលើក កម្ពស់ សន្តិសុខ និងការការពារដែនអធិបតេយ្យភាពជាតិ ។ ជាទូទៅដូចដែលសម្តេចធិបតី បានលើកឡើងរួច ហើយការកសាងកម្លាំងបម្រុងដែលត្រូវបានបណ្តុះបណ្តាលក៏ដូចជា ការពង្រឹងសមត្ថភាពរបស់កម្ពុជាក្នុងការការពារខ្លួន គឺវាអាចចាំបាច់នៅពេលដែលប្រទេសមានវិបត្តិ ។ ការដាក់ឲ្យអនុវត្តនូវច្បាប់នេះវាបង្ហាញពីការត្រៀមខ្លួន និងទប់ស្កាត់ការគំរា.មកំហែ.ងផ្នែកសន្តិសុខជាតិ ដូចជា នៅក្នុងអំឡុងពេលបច្ចុប្បន្នដែលកំពុងតែមានទំនាស់ព្រំដែនស្រាប់ ។
ម្យ៉ាងវិញទៀត វាក៏ជាដំណើរការដែលនឹងអាចជួយបណ្តុះ ឬដុសខាត់វិន័យ និងជំនាញសម្រាប់យុវជនផងដែរ ។ ការអនុវត្តនូវច្បាប់នេះ វាអាចជាការបណ្តុះវិន័យ ភាពជាអ្នកដឹកនាំ ការងារជាក្រុម និងក៏ដូចជា ការពង្រឹងការទទួលខុសត្រូវជាក្រុមដល់យុវវ័យនានា ។ នេះ គឺជាឱកាសដែលអាចឲ្យរដ្ឋធ្វើការប្រមូលផ្តុំយុវជនមកពីមជ្ឈដ្ឋានផ្សេងៗគ្នាអាចលើកកម្ពស់ការរួបរួម និងបណ្តុះមនៈសិកាស្នេហាជាតិ ។
មកដល់ពេលនេះ នៅក្នុងចំណោមប្រទេសនៅអាស៊ាន ការអនុវត្តច្បាប់កាតព្វកិច្ចយោធា គឺត្រូវបានអនុវត្តដោយប្រទេសខ្លះរួចហើយ ដូចជា ករណីថៃស្រាប់ សិង្ហបុរី វៀតណាម មីយ៉ាន់ម៉ា ឡាវ ជាដើម ។ ខណៈដែលប្រទេសហ្វីលីពីន ឥណ្ឌូនេស៊ី ម៉ាឡេស៊ី ប្រុយណេ ជាដើម គឺមិនមានច្បាប់នេះទេ ។ នៅក្នុងតំបន់ទាំងមូលច្បាប់កាតព្វកិច្ចយោធានេះគឺ ប្រទេសខ្លះ ថ្វីត្បិតតែមានមែន ប៉ុន្តែ គឺខ្លះមិនអនុវត្តដូចជា កម្ពុជាដែរ ខ្លះអនុវត្តពេលមានតម្រូវការជាដើម ។
ដើម្បីធានាច្បាប់នេះនឹងនាំដល់ផលប្រយោជន៍ជាតិពិតប្រាកដ យើងត្រូវអនុវត្តវាដោយប្រយ័ត្នប្រយ៉ែង ត្រឹមត្រូវ និងតម្លាភាពដើម្បីកុំអោយមានបញ្ហាផ្សេងកើតឡើងដូចជា អំពើពុករលួយ និងបក្ខពួកនិយម ជាដើម។
សរុបសេចក្តីទៅ ផែនការដែលជំរុញឲ្យអនុវត្តនូវច្បាប់កាតព្វកិច្ចយោធារបស់កម្ពុជា នឹងបង្កើតឲ្យមានចំណុចប្រកបដោយសក្តានុពលក្នុងការពង្រឹងឯកភាពជាតិ និងសន្តិសុខ ប៉ុន្តែទោះបីជាយ៉ាងណាក៏ដោយវាក៏ត្រូវតែអនុវត្តដោយយុត្តិធម៌ ទទួលខុសត្រូវ និងផ្តោតលើការអភិវឌ្ឍន៍សង្គមរយៈពេលវែង ៕
ចែករំលែកព័តមាននេះ