ចាប់តាំងពីថៃបានបិទច្រកព្រំដែនដោយឯកតោភាគី កាលពីថ្ងៃទី២៣ ខែមិថុនា មកដល់ពេលនេះ មានសេចក្តីរាយការណ៍ថា បណ្តាផ្សារភាគច្រើន នៅតាមព្រំដែននៅក្នុងប្រទេសថៃ មានសភាពស្ងាត់ជ្រងំ តួរយ៉ាងដូចជា ទិដ្ឋភាពផ្សារបានហាត…
ចាប់តាំងពីថៃបានបិទច្រកព្រំដែនដោយឯកតោភាគី កាលពីថ្ងៃទី២៣ ខែមិថុនា មកដល់ពេលនេះ មានសេចក្តីរាយការណ៍ថា បណ្តាផ្សារភាគច្រើន នៅតាមព្រំដែននៅក្នុងប្រទេសថៃ មានសភាពស្ងាត់ជ្រងំ តួរយ៉ាងដូចជា ទិដ្ឋភាពផ្សារបានហាត លើក ដែលមានទីតាំងជាប់នឹងខេត្តកោះកុង នៅក្នុងប្រទេសកម្ពុជា ដែលធ្លាប់តែអ៊ូអរ មានមនុស្សចេញចូលឥឡូវគឺមានសភាពដ៏ស្ងាត់ជ្រងំ ។
សារព័ត៌មាន The Nation របស់ថៃ បានឲ្យដឹងថា ការគ្រប់គ្រងព្រំដែនដ៏តឹងតែង ក្នុងខេត្តត្រាតបានឈានចូលដល់សប្តាហ៍ទីបី ដែលធ្វើឲ្យពាណិជ្ជកម្ម និងទេសចរណ៍ខូចខាតយ៉ាងដំណំ ។ ទិដ្ឋភាពនេះ គេអាចមើលឃើញយ៉ាងច្បាស់ថា ផ្សារបានហាតលើក គឺនៅសល់តែតូបមួយប៉ុណ្ណោះដែលបានបើក ។
សារព័ត៌មាននោះបានសរសេរថា ក្រោមវិធានការត្រួតពិនិត្យព្រំដែន ដ៏តឹងរឹងរបស់ប្រទេសថៃ ជាមួយកម្ពុជា ដែលអនុវត្តដោយបញ្ជាការដ្ឋានការពារព្រំដែនចាន់ថាបុរី-ត្រាត ចាប់តាំងពីថ្ងៃទី២៤ ខែមិថុនា មកជនជាតិថៃ និងកម្ពុជា ភ្ញៀវទេសចរ និងរថយន្តដឹកទំនិញ ត្រូវបានហាមឃាត់មិនឱ្យឆ្លងកាត់ព្រំដែន ហើយការជួញដូរឆ្លងកាត់ព្រំដែនទាំងអស់ ត្រូវបានផ្អាកដែលនាំឲ្យផ្សារស្ងាត់ជ្រងំ ។
លោក ភីរុំ ថុងខាម ( Pirom Thongkham) អាយុ៦៤ឆ្នាំ ដែលជាអាជីវករតែម្នាក់គត់ដែលនៅតែតស៊ូបើកតូបនៅក្នុងផ្សារនេះ បាននិយាយថា មានតែលោកម្នាក់គត់ដែលនៅតែបើកនៅទីនេះ ប៉ុន្តែតាំងពីបើកមកមិនមានអតិថិជនឡើយ ។
លោកបានអះអាងថា កាលពីមុនយ៉ាងហោចណាស់មានមនុស្សមួយចំនួនបានមកទិញទំនិញ ប៉ុន្តែចាប់តាំងពីព្រំដែនបានបិទវាស្ងាត់ទាំងស្រុង ពោល គឺគ្មានសកម្មភាពតែម្តង ។ មូលហេតុដែលលោកនៅតែបន្តបើកហាងរបស់គាត់ ដោយសារតែគាត់ជាម្ចាស់កម្មសិទ្ធិ និងចង់ជៀសវាងកុំឱ្យតំបន់នេះធ្លាក់ចូលទៅក្នុងការបោះបង់ចោលទាំងស្រុង ។
លោកបានបន្ថែមថា យើងត្រូវតែទទួលយកការពិត ហើយលោកចង់ឱ្យស្ថានការណ៍នៅព្រំដែននេះធូរស្រាលឆាប់ៗ ព្រោះវា ប៉ះពាល់ដល់ពួកគាត់ទាំងអស់គ្នាដែលរស់នៅទីនេះ ។ វាពិបាកណាស់ ។ លោកបានបន្តថា សូម្បីតែក្នុងអំឡុងពេលវិបត្តិប្រាសាទព្រះវិហារឆ្នាំ ២០១១ វាមិនធ្ងន់ធ្ងរបែបនេះដែរ ។ លោកបានបន្តថា កាលនោះព្រំដែនមិនទាន់បិទទាំងស្រុងឡើយ ។ ដូច្នេះយ៉ាងហោចណាស់ ការធ្វើពាណិជ្ជកម្មមួយចំនួនបានបន្ត ។
លោកបានលើកឡើងថា លោកសូមអង្វរឲ្យសភាពការវិលមកប្រក្រតីភាពឡើងវិញ ហើយក៏សង្ឃឹមថា ព្រំដែនអាចបើកឡើងវិញក្នុងពេលឆាប់ៗនេះ ។ ដូច្នេះពាណិជ្ជកម្ម និងទេសចរណ៍អាចដំណើរការឡើងវិញបាន ។ សង្ឃឹមថា ស្ថានការណ៍មិនកាន់តែអាក្រក់ទៅៗ ហើយបើវាអូសបន្លាយនោះវាពិតជាពិបាកប្រឈមមុខនឹងវិបត្តិធំជាងនេះ នាពេលអនាគត ។
មុនពេលផ្ទុះការតានតឹងនៅព្រំដែន ពោល គឺនៅខែមេសា ពាណិជ្ជកម្មរវាងកម្ពុជា និងថៃមានតម្លៃដល់ទៅ៤៨០លានដុល្លារ ដោយថៃនាំចូលមកកម្ពុជា មានតម្លៃដល់ទៅ៣៧២ លានដុល្លារ ហើយកម្ពុជានាំចេញទៅវិញត្រឹមតែ៩៨ លានដុល្លារប៉ុណ្ណោះ ។
ពាក់ព័ន្ធនឹងរឿងព្រំដែននេះ សម្តេចធិបតី ហ៊ុន ម៉ាណែត កាលពីថ្ងៃទី១៤ ខែកក្កដា បានលើកឡើងថា ថៃបិទព្រំដែន គឺបិទដោយឯកតោភាគី ។ ដូច្នេះ បើថៃចង់បើក គឺត្រូវតែបើកដោយឯកតោភាគីដែរ ។ កូនសោរ គឺនៅលើថៃ ហើយរឿងនេះមិនបាច់ចរចាទេ ។
ជាការពិត កម្ពុជាមិនមែនជាអ្នកចាប់ផ្តើមមុនឡើយ ។ ថៃចាប់ផ្តើមរឹតត្បិតព្រំដែន នៅថ្ងៃទី ០៧ ខែមិថុនា ហើយបើកវិញដោយសម្រេចធ្វើការកែសម្រួលម៉ោងចេញចូល ។ ក្រោយមកទៀត គឺបិទហើយបើក ឬបិទច្រកនេះបើកច្រកនោះ ។ ក្រោយមកទៀត ពោល គឺថ្ងៃទី២៣ ខែមិថុនា គឺបិទគ្រប់ច្រក ស្រាប់តែមានបើកច្រកខ្លះ ។ ប៉ុន្តែមិនអនុញ្ញាតឲ្យមនុស្ស និងទំនិញចេញចូល លើកលែងតែអ្នកជំងឺធ្ងន់ និងកូនសិស្ស ។
ពាក់ព័ន្ធនឹងបញ្ហានេះ សម្តេចធិបតី បានបញ្ជាក់ជំហារយ៉ាងច្បាស់ ហើយប្រកាសដាក់លក្ខខណ្ឌបី ។ គឺទី១ គឺថៃត្រូវប្រកាសបើកព្រំដែនជាឯកតោភាគីឡើងវិញទៅ ហើយត្រូវប្រកាសកុំបិទ ដោយឯកតោភាគីជាថ្មី ។ ទី២ បើបើក គឺត្រូវបើកទាំងអស់ មិនមែនបើកមួយទុកមួយនោះទេ ។ ហើយទី៣ គឺត្រូវបើកឲ្យដូចមុនថ្ងៃទី៧ ខែមិថុនា ពោល គឺពីម៉ោង៦ព្រឹក ដល់ម៉ោង១០យប់ ហើយចរាចរណ៍ទាំងមនុស្ស និងទំនិញ គឺមិនមានការហាមឃាត់ ។
សម្តេចធិបតី ប្រកាសថា ថៃអនុវត្តតែបែបនេះ មិនបាច់ចរចាទេ យ៉ាងយូរយឺតបំផុត៥ ម៉ោង កម្ពុជានឹងធ្វើតាមទាំងអស់ ។ កម្ពុជាមិនចង់លេងល្បែងបិទពួន ហើយក៏មិនចង់មានស្ថានភាពដូចឆ្មារ និងកណ្តុរឡើយ ៕
ចែករំលែកព័តមាននេះ