ទីក្រុងកៀវ៖ នៅទីបញ្ចប់សំណុំរឿងធ្វើឃាតស័ក្ដិ៥ម្នាក់ផ្នែកចារកម្មរបស់អ៊ុយក្រែនត្រូវអ៊ុយក្រែនតាមសងសឹកបានវិញហើយ។ ឃាតករស្ថិតនៅមិនឆ្ងាយប៉ុន្មាននោះទេ ប៉ុន្តែជាអ្នកភូមិផងរបងជាមួយនឹងអ៊ុយក្រែនតែម្ដង។ អ៊ុយក្រែនអះអាងថាខ្លួនបានតាមកម្ទេចភ្នាក់ងារចារកម្មជាតិរបស់រុស្ស៊ី២នាក់ដែលធ្វើការនៅក្នុងផ្នែកអែហ្វអែសប៊ី (Federal Security Service)។
សូមរំលឹកថាវរសេនីយ៍ឯកអ៊ីវ៉ាន់ រ៉ូរ៉ានិច (Ivan Voronych) ត្រូវជនប្រដាប់អាវុធម្នាក់បាញ់ស្លាប់នៅក្នុងថ្លុកឈាមកាលពីថ្ងៃទី១០ ខែកក្កដា។ គេឃើញគាត់ដើរតែម្នាក់ឯង ស្លៀកខោខោវប៊យពណ៌ទឹកប៊ិចដើរតម្រង់ទៅរកឡានដែលចតនៅក្នុងការ៉ាស់។ រំពេចនោះ, ជនប្រដាប់អាវុធម្នាក់ពាក់ម៉ាស់បិទមុខជិត ឃើញតែប្រឡង់ភ្នែក បានស្ទុះចេញមកបាញ់គាត់ជាច្រើនគ្រាប់។
វរសេនីយ៍រូបនេះធ្លាប់បម្រើការនៅក្នុងកងប្រតិបត្តិការសឹកពិសេសអាល់ហ្វា (Alpha) និងធ្លាប់ដឹកនាំប្រតិបត្តិការវាយប្រហារកម្ទេចទ្រព្យសម្បត្តិរបស់រុស្ស៊ីមិនចេះតិចដងនោះទេ។ ប្រតិបត្តិការធ្វើឃាតមេធំៗនៅក្នុងជួរយោធារុស្ស៊ីកាលពីពេលកន្លងមកក៏ជាស្នាដៃរបស់គាត់ផងដែរ។ ជម្លោះរវាងរុស្ស៊ី និងអ៊ុយក្រែនឈានដល់ដំណាក់ស្រួចស្រាល់កាន់តែខ្លាំងក្រោយការធ្វើឃាតវរសេនីយ៍រូបនេះ។
យោងតាមការបង្ហើបឱ្យដឹងពីប្រធានផ្នែកស៊ើបការណ៍សម្ងាត់អ៊ុយក្រែនអែសប៊ីយូ (SBU) លោកវ៉ាស៊ីល ម៉ាលីយុក (Vasyl Malyuk) ភ្នាក់ងារសម្ងាត់របស់រុស្ស៊ីដែលគេបញ្ជូនឱ្យទៅចាត់ការវរសេនីយ៍វ៉ូរ៉ានិចនោះបានទៅដល់អ៊ុយក្រែនតាំងពីប៉ុន្មានថ្ងៃមុនដើម្បីរង់ចាំឱកាសល្អនឹងអាលចាត់ការគាត់។ តាមរយៈវីឌីអូឃ្លីបដែលគេស្រាវចេញពីកាមេរ៉ាសុវត្ថិភាព គេឃើញជនសង្ស័យទាំង២នាក់តាមពីក្រោយលោកវ៉ូរ៉ានិច (ស្ងាត់ៗ) សំដៅទៅឃ្លាំងស្តុកទុកអាវុធ។ ពួកគេលួចបានកាំភ្លើងខ្លីមួយដើម។
នៅម៉ោង៩ព្រឹកថ្ងៃកើតហេតុនោះ ពួកគេក៏ចេញប្រតិបត្តិការឃ្លាំមើលលោកវ៉ូរ៉ានិចដើរចេញពីអគារ។ រដ្ឋាភិបាលអ៊ុយក្រែនបានធ្វើបច្ចុប្បន្នភាពព័ត៌មាននៅលើតេឡេក្រាមថាភ្នាក់ងារសម្ងាត់អែសប៊ីយូបានកម្ទេចឃាតករទាំង២រូបនោះហើយ។ នៅក្នុងប្រតិបត្តិការពិសេសនេះ ភ្នាក់ងារសន្តិសុខអ៊ុយក្រែនកម្ទេចភ្នាក់ងារពិសេសរុស្ស៊ីដែលបញ្ជូនដោយអែហ្វអែសប៊ី (FSB)។
អ៊ុយក្រែនថ្លែងបន្តទៀតថាប្រតិបត្តិការតាមប្រមាញ់ឃាតករទាំង២រូបនោះត្រូវបានដឹកនាំ និងបញ្ជាផ្ទាល់ដោយប្រធានអែសប៊ីយូ ឧត្ដមសេនីយ៍ឯកវ៉ាស៊ីល ម៉ាលីយុក (Vasyl Malyuk)។ អែសប៊ីយូ និងនគរបាលអ៊ុយក្រែនកំណត់មុខសញ្ញាជនសង្ស័យទាំង២ស្ថិតនៅទីក្រុងកៀវ និងតាមស្វែងរកដល់កន្លែងលាក់ខ្លួនរបស់ពួកគេ។ នៅពេលទៅដល់ ពួកគេមិនព្រមសហការប្រគល់ខ្លួនឱ្យចាប់តាមសម្រួល។ ដូច្នេះ អ៊ុយក្រែនត្រូវតែបង្ខំចិត្តបាញ់កម្ទេចតែម្ដង។ ខាងលើនេះជាការដកស្រង់ប្រភពពីទស្សនាវដ្ដីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ