រាជធានីភ្នំពេញ ៖ នារីម្នាក់ ត្រូវបានរថយន្តមិនស្គាល់ម៉ាក មួយគ្រឿង បើកបុកពីក្រោយ បណ្ដាលឲ្យបាត់បង់ជីវិត ខណៈពេលដែលភ្ញាក់ពីព្រឹក ឌុបបងប្រុសទៅធ្វើការ រួចត្រឡប់មកផ្ទះវិញ។…
រាជធានីភ្នំពេញ ៖ នារីម្នាក់ ត្រូវបានរថយន្តមិនស្គាល់ម៉ាក មួយគ្រឿង បើកបុកពីក្រោយ បណ្ដាលឲ្យបាត់បង់ជីវិត ខណៈពេលដែលភ្ញាក់ពីព្រឹក ឌុបបងប្រុសទៅធ្វើការ រួចត្រឡប់មកផ្ទះវិញ។ បន្ទាប់ពីគ្រោះថ្នាក់ រថយន្តបង្ក បានបើករត់គេចបាត់ ហើយសមត្ថកិច្ចជំនាញកំពុងតែស្រាវជ្រាវស្វែងរកអ្នកបើកបររថយន្តបង្កមកចាត់ការតាមច្បាប់ ។
គ្រោះថ្នាក់ចរាចរណ៍ដ៏រន្ធត់នេះ បានកើតឡើងកាលពីវេលាម៉ោង០៦និង៤០នាទីព្រឹកថ្ងៃទី១២ ខែកក្កដា ឆ្នាំ២០២៥ លើស្ពានព្រែកព្នៅ នៅមហាវិថីឈ្នះឈ្នះ ភូមិកណ្តាល សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។
នារីរងគ្រោះ ឈ្មោះ ឈិន ស្រីនាង ភេទស្រី អាយុ១៧ឆ្នាំ មុខរបរនៅផ្ទះ ស្នាក់នៅភូមិព្រែករាំង សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ជិះម៉ូតូ០១គ្រឿងម៉ាក HONDA TODAY ពណ៌ផ្កាឈូក ពាក់ផ្លាកលេខ ភ្នំពេញ 1HA-8915 បានស្លា.ប់នៅកន្លែងកើតហេតុ ។
តាមសាក្សីបានឲ្យដឹងថា នៅមុនពេលកើតហេតុ គេបានឃើញនារីម្នាក់ ជិះម៉ូតូម៉ាកហុងដា ធូដេ មួយគ្រឿងខាងលើ ធ្វើដំណើរឡើងស្ពានព្រែកព្នៅ ក្នុងទិសដៅពីលិចទឹកកើត នៅពេលធ្វើដំណើរដ៏កណ្ដាលស្ពានព្រែកព្នៅ ស្រាប់តែមានរថយន្តមិនស្គាល់ម៉ាកមួយគ្រឿង ធ្វើដំណើរស្របទិសពីគ្នាមកបុកម៉ូតូនារីរងគ្រោះពីក្រោយពេញទំហឹងបណ្ដាលអោយជនរងគ្រោះ ដួលបោកក្បាល់ស្លាប់នៅនឹងកន្លែង។ បន្ទាប់ពីបង្កគ្រោះថ្នាក់ រថយន្តបានបើកគេចខ្លួនបាត់ស្រមោល ។
បើតាមបងប្រុសជនរងគ្រោះ បានឲ្យដឹងថា នៅព្រឹកថ្ងៃកើតហេតុ ប្អូនស្រីបានភ្ញាក់ពីព្រលឹម រួចបានជិះម៉ូតូ ជូនគាត់ទៅធ្វើការជាកម្មករសំណង់នៅខណ្ឌព្រែកព្នៅ រួចហើយក៏បានជិះម៉ូតូត្រឡប់ទៅផ្ទះវិញ ស្រាប់តែជួបគ្រោះអកុសល ត្រូវរថយន្តបុកស្លា.ប់តែម្ដង ។
បងប្រុសរូបនោះ បានឱ្យដឹងទៀតថា មុនដំបូង គាត់ពុំដឹងថា ប្អូនស្រីបានជួបគ្រោះថ្នាក់ចរាចរណ៍ឡើយ។ នៅវេលាម៉ោង៧និង៣០នាទី គាត់បានទាក់ទងទៅប្រពន្ធរបស់គាត់ មិនឃើញប្អូនស្រីត្រឡប់ទៅផ្ទះវិញ ក៏ខ្ចីម៉ូតូគេជិះមក ក៏ប្រទះឃើញប្អូន ត្រូវរថយន្តបុកស្លា.ប់នៅលើស្ពានព្រែកព្នៅ ។
ក្រោយពីកើតមានគ្រោះថ្នាក់ នគរបាលមូលដ្ឋាន ក៏បានចុះទៅកន្លែងកើតហេតុ សម្រួលចរាចរណ៍ និងធ្វើការស្រាវជ្រាវតាមកាមេរ៉ាសុវត្ថិភាព ដើម្បីស្វែងរករថយន្ដបង្ក ដើម្បីចាត់ការតាមនិតិវីធីច្បាប់ ៕
ចែករំលែកព័តមាននេះ