រាជធានីភ្នំពេញ ៖ កម្លាំងនគរបាលផ្នែកព្រហ្មទណ្ឌខណ្ឌដង្កោ សហការជាមួយកម្លាំងនគរបាលការិយាល័យព្រហ្មទណ្ឌកម្រិតស្រាល នៃស្នងការដ្ឋានរាជធានីភ្នំពេញ និងនគរបាលផ្នែកព្រហ្មទណ្ឌខណ្ឌមានជ័យ បានបើកធ្វើការស្រាវជ្រាវលើករណីក្រុមចោរធាក់ប្លន់យកម៉ូតូពីយុវជនម្នាក់កាលពីជាង១០ថ្ងៃមុន ដោយឃាត់ខ្លួនជនសង្ស័យបាន៤នាក់ក្នុងចំណោមគ្នាប្រមាណ៣០នាក់ ។ ហេតុការណ៍នោះ…
រាជធានីភ្នំពេញ ៖ កម្លាំងនគរបាលផ្នែកព្រហ្មទណ្ឌខណ្ឌដង្កោ សហការជាមួយកម្លាំងនគរបាលការិយាល័យព្រហ្មទណ្ឌកម្រិតស្រាល នៃស្នងការដ្ឋានរាជធានីភ្នំពេញ និងនគរបាលផ្នែកព្រហ្មទណ្ឌខណ្ឌមានជ័យ បានបើកធ្វើការស្រាវជ្រាវលើករណីក្រុមចោរធាក់ប្លន់យកម៉ូតូពីយុវជនម្នាក់កាលពីជាង១០ថ្ងៃមុន ដោយឃាត់ខ្លួនជនសង្ស័យបាន៤នាក់ក្នុងចំណោមគ្នាប្រមាណ៣០នាក់ ។
ហេតុការណ៍នោះ បានកើតឡើងកាលពីវេលាម៉ោង០២ និង៤០នាទីរសៀលថ្ងៃទី២០ ខែកក្កដា ឆ្នាំ២០២៥ នៅត្រង់ចំណុចមុខបុរីVK ស្ថិតនៅតាមផ្លូវបេតុងភូមិទ័ពបោះ សង្កាត់ព្រៃវែង ខណ្ឌដង្កោ រាជធានីភ្នំពេញ ។
ជនសង្ស័យទាំង០៤នាក់ខាងលើនោះរួមមាន១,ឈ្មោះ ណោត សីហា ហៅ ហា អាយុ១៨ឆ្នាំ ២,ឈ្មោះ វ៉ា សារ៉ាយ ហៅអូ អាយុ១៨ឆ្នាំ ៣,ឈ្មោះ ចក់ ស៊ីម៉ី អាយុ១៨ឆ្នាំ ៤,ឈ្មោះ គង់ សម្បត្តិ ហៅជ្រូក អាយុ១៨ឆ្នាំ ។ ជនសង្ស័យទាំង៤នាក់នេះស្នាក់នៅបន្ទប់ជួល ស្ថិតនៅផ្លូវបេតុង ភូមិដំណាក់ធំ២ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ ។ ពួកនេះត្រូវបាននគរបាលឃាត់ខ្លួនបាននៅចំណុចផ្ទះជួលខាងលើកាលពីវេលាម៉ោង៣រសៀលថ្ងៃទី៣១ ខែកក្កដា ឆ្នាំ២០២៥ ។
ដោយឡែកយុវជនរងគ្រោះឈ្មោះ ណិល ពិសិដ្ឋសុវណ្ណ អាយុ១៨ឆ្នាំ ជនជាតិខ្មែរ មុខរបរកម្មករ ទីលំនៅភូមិត្រពាំងចក សង្កាត់ព្រៃវែង ខណ្ឌដង្កោ ។ បាត់បង់ម៉ូតូ១គ្រឿង ម៉ាកហុងដាឌ្រីមសេ១២៥ ស៊េរីឆ្នាំ២០១៩ ពណ៌ខ្មៅ ពាក់ស្លាកលេខភ្នំពេញ1HI-8718។
នគរបាលបានប្រាប់ថា ក្រោយពេលចាប់ខ្លួនជនសង្ស័យបាន កម្លាំងនគរបាលខាងលើដកហូតម៉ូតូម៉ាកហុងដាឌ្រីសេ១២៥ ពណ៌ខ្មៅ ស៊េរីឆ្នាំ២០២៤ ពាក់ស្លាកកលេខ1KQ-7043 ១គ្រឿង, ទូរស័ព្ទដៃម៉ាកVivo ០១គ្រឿង ដែលជារបស់ជនសង្ស័យឈ្មោះណោត សីហា ហៅហា ។ ម៉ូតូម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០២៥ ពាក់ស្លាកលេខ1LB-0166 ដែលជារបស់ជនសង្ស័យឈ្មោះ ចក់ ស៊ីម៉ី និងម៉ូតូ០១គ្រឿងទៀតម៉ាកស៊ុយហ្ស៊ុយគីនិច ពណ៌ស លាយក្រហម ស៊េរីឆ្នាំ២០២៥ គ្មានស្លាកលេខ ដែលជារបស់ជនសង្ស័យឈ្មោះ គង់ សម្បត្តិ ។
នគរបាលបានបញ្ជាក់ប្រាប់ឲ្យដឹងបន្តទៀតថា កាលពីថ្ងៃទី២០ ខែកក្កដា ឆ្នាំ២០២៥ វេលាម៉ោង០២និង៤០នាទី រសៀល ជនរងគ្រោះបានជិះម៉ូតូ ចេញពីផ្ទះមិត្តភក្តិស្ថិតនៅភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ ដើម្បីទៅផ្ទះស្ថិតនៅភូមិត្រពាំងចក សង្កាត់ព្រៃវែង ខណ្ឌដង្កោ ។ លុះពេលដល់ត្រង់ចំណុចកើតហេតុ ស្រាប់តែជនសង្ស័យ និងបក្ខពួកមានគ្នាប្រហែល៣០នាក់ និងជិះម៉ូតូប្រហែល២០គ្រឿង បានដេញតាមធ្វើសកម្មភាពធាក់ផ្តួលម៉ូតូរបស់ជនរងគ្រោះ ។
នគរខាងលើបានប្រាប់ឲ្យដឹងបន្តទៀតថា ខណៈនោះបានបណ្ដាលឲ្យដួល ហើយជនសង្ស័យបានស្រែកគំរាមកាប់សម្លាប់ជនរងគ្រោះថែមទៀត ទើបយុវជនរងគ្រោះក្រោករត់ចេញពីម៉ូតូ បន្ទាប់មកក៏ត្រូវក្រុមជនសង្ស័យលើកម៉ូតូជិះគេចខ្លួនបាត់ស្រមោល ។ ក្រោយពេលកើតហេតុជនរងគ្រោះ ក៏បានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលព្រៃវែង ដើម្បីឲ្យជួយស្រាវជ្រាវ ឃាត់ខ្លួនជនសង្ស័យចាប់ខ្លួនក្រុមចោរប្លន់ខាងលើ ។
លុះ១១ថ្ងៃក្រោយមក គឺនៅវេលាម៉ោង៣រសៀលថ្ងៃទី៣១ ខែកក្កដា ឆ្នាំ២០២៥ គរបាលបានឃាត់ខ្លួនជនសង្ស័យចំនួន៤នាក់ខាងលើ រួចនាំយកទៅធ្វើការសាកសួរ និងចាត់ការតាមច្បាប់ ព្រមទាំងធ្វើការស្រាវជ្រាវបន្តដើម្បីចាប់ខ្លួនបក្ខពួកដែលនៅសេសសល់ ៕
ចែករំលែកព័តមាននេះ