កីឡាករហ្ស៊ីណឺឌីន ហ្ស៊ីដាន អតីតខ្សែបម្រើអាយុ៣៩ឆ្នាំរបស់ក្រុមជម្រើសជាតិបារាំងដែលលេងឱ្យក្លឹប Real Madrid ក្នុងរវាងឆ្នាំ២០០១-២០០៦ បានទទួលតួនាទីជាទីប្រឹក្សាផ្ទាល់របស់លោកផ្លរ៉េនទីណូ ប៉េរ៉េស ប្រធានក្លឹបកាលពីឆ្នាំ២០០៩ និងជាចុងក្រោយនេះ ក៏បានបញ្ជាក់ពីរឿងផ្ទាល់ខ្លួនថា នឹងធ្វើជានាយកកីឡារបស់ក្លឹបនៅរដូវកាលក្រោយ ទោះបីជាមិនទាន់មានការបញ្ជាក់ពីក្លឹបក៏ដោយ។
លោកហ្ស៊ីដាន បានបញ្ជាក់ប្រាប់ទីភ្នាក់ងារពីហេតុការខាងលើថា៖ «ខ្ញុំនឹងចូលទទួលតំណែងជានាយកកីឡារបស់ក្លឹប ហើយពួកយើងនឹងបានឃើញមុខគ្នាពេលឆាប់ៗ ខាងមុខ ប៉ុន្តែអ្វីៗ គ្រប់យ៉ាងស្ថិតនៅលើលោកមូរីនញ៉ូ និងលោកផ្លរ៉េន ទីណូ ដែលមានសិទិ្ធសម្រេចចិត្តលើរឿងនេះ»។ Real Madrid គឺជាទិសដៅដ៏សំខាន់សម្រាប់ខ្ញុំ ដើម្បីនឹងបំពេញការងារដល់ក្លឹបឱ្យមានលក្ខណៈលេចធ្លោបន្តទៀត។
ទោះជាយ៉ាងណាក្លឹបនៅមិនទាន់ប្រកាសដំណឹងជាផ្លូវការណាមួយក្រោយពីលោកផ្លរ៉េនទីណូប៉េរ៉េសសម្រេចចិត្តបណ្តេញលោកហុក វ៉ាលដាណូ នាយកកីឡារបស់ក្លឹបកាលពីរដូវកាលមុន ព្រោះមានបញ្ហាមិនចុះសម្រុងជាមួយលោកមូរីនញ៉ូ ធ្វើឱ្យតំណែងនេះនៅទំនេរ និងមិនទាន់បានតែងតាំងបុគ្គលិកផ្សេងជំនួសនៅឡើយ៕
ចែករំលែកព័តមាននេះ