មានការប្រែប្រួលអ្វីខ្លះ ក្រោយលោក ត្រាំ ប្រកាសពន្ធថ្មីលើប្រទេសដៃគូពាណិជ្ជកម្មចំនួន ១៤?
សហរដ្ឋអាមេរិក ៖ ប្រធានធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី៧ ខែកក្កដា…
សហរដ្ឋអាមេរិក ៖ ប្រធានធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី៧ ខែកក្កដា ឆ្នាំ២០២៥ បានបង្ហាញផែនការពាណិជ្ជកម្មថ្មី ពាក់ព័ន្ធនឹងអត្រាពន្ធគយរបស់លោក ប៉ុន្តែទន្ទឹមជាមួយគ្នានោះ លោកក៏បានពន្យារពេលការដំឡើងពន្ធដើមជាពន្ធកម្រិតខ្ពស់លើទំនិញពីបណ្តាដៃគូសំខាន់ៗរហូតដល់ថ្ងៃទី១ ខែសីហា ឆ្នាំ២០២៥ ដែលនេះគឺជាការពន្យារពេល៣សប្តាហ៍បន្ថែមទៀតពីលើការពន្យារពេលពីមុន ដែលនឹងផុតកំណត់នៅថ្ងៃទី៩ ខែកក្កដា ឆ្នាំ២០២៥ ចំពេលពិភពលោកកំពុងច្របូកច្របល់យ៉ាងខ្លាំងលើយុទ្ធសាស្ត្រសេដ្ឋកិច្ចដ៏ចម្រូងចម្រាសរបស់លោក។
ការបង្ហោះលិខិតចម្លងទៅកាន់មេដឹកនាំពិភពលោកលើបណ្តាញសង្គម លោក ត្រាំ បានប្រកាសអំពីការកែប្រែអត្រាពន្ធថ្មីរបស់សហរដ្ឋអាមេរិក ដែលចូលជាធរមាននៅថ្ងៃទី១ ខែសីហា ឆ្នាំ២០២៥ លើប្រទេសចំនួន ១៤ ដូចខាងក្រោម ៖
-មីយ៉ាន់ម៉ា ពន្ធថ្មី ៤០% ទម្លាក់ ៤% ពីអត្រាចាស់
-ឡាវ ពន្ធថ្មី ៤០% ទម្លាក់ ៨% ពីអត្រាចាស់
-កម្ពុជា ពន្ធថ្មី ៣៦% ទម្លាក់ ១៣% ពីអត្រាចាស់
-ថៃ ៣៦% ដូចអត្រាចាស់
-ស៊ែប៊ី ពន្ធថ្មី ៣៥% ទម្លាក់ ២% ពីអត្រាចាស់
-បង់ក្លាដែស ពន្ធថ្មី ៣៥% ទម្លាក់ ២% ពីអត្រាចាស់
-ឥណ្ឌូណេស៊ី ៣២% ដូចនឹងអត្រាចាស់
-អាហ្វ្រិកខាងត្បូង ៣០% ដូចអត្រាចាស់
-បូស្នី និងហឺហ្សីហ្គូវីណា ពន្ធថ្មី ៣០% ទម្លាក់ ៥% ពីអត្រាចាស់
-ទុយនេស៊ី ពន្ធថ្មី ២៥% ទម្លាក់ ៣% ពីអត្រាចាស់
-កាហ្សាក់ស្ថាន ពន្ធថ្មី ២៥% ទម្លាក់ ២% ពីអត្រាចាស់
-ម៉ាឡេស៊ី ពន្ធថ្មី ២៥% ដំឡើង ១% ពីអត្រាចាស់
-កូរ៉េខាងត្បូង ២៥% ដូចអត្រាចាស់
-ជប៉ុន ពន្ធថ្មី ២៥% ដំឡើង ១% ពីអត្រាចាស់
ក្នុងថ្ងៃជាមួយគ្នានោះ លោក ត្រាំ ក៏បានចុះហត្ថលេខាលើបទបញ្ជាប្រតិបត្តិពន្យារពេល៣សប្តាហ៍ទៀតដល់ថ្ងៃទី១ ខែសីហា ពោលបន្ថែមពីលើការពន្យារពេលពីមុនរយៈពេល៩០ថ្ងៃ មុនពេលពន្ធកម្រិតខ្ពស់ដែលលោកបានប្រកាសជាលើកដំបូង កាលពីថ្ងៃទី២ ខែមេសា ឆ្នាំ២០២៥ ចូលជាធរមាន ដើម្បីទុកពេលឱ្យដៃគូពាណិជ្ជកម្មរបស់អាមេរិកធ្វើការចរចាសម្រេចបានកិច្ចព្រមព្រៀងជាមួយគ្នា។
យ៉ាងណាមិញ អ្នកនាំពាក្យសេតវិមាន លោកស្រី Karoline Leavitt បានបញ្ជាក់នៅក្នុងសន្និសីទសារព័ត៌មានថា អត្រាពន្ធនឹងមានការប្រែបន្ថែមទៀត ដោយលិខិតជាច្រើនផ្សេងទៀតនឹងត្រូវផ្ញើទៅកាន់ប្រទេសជាដៃគូពាណិជ្ជកកម្មអាមេរិកនៅចុងសប្តាហ៍នេះ៕ ប្រភព ៖ The Guardian និង CNBC
ចែករំលែកព័តមាននេះ