ទីក្រុងបាងកក៖ ក្រសួងមហាផ្ទៃថៃចេញមកធានាអះអាងប្រាប់បងប្អូនប្រជាពលរដ្ឋថារដ្ឋាភិបាលបានត្រៀមលក្ខណៈសម្បត្តិរួចរាល់អស់ហើយដើម្បីទប់ទល់នឹងលទ្ធភាពនៃការកើតមានរលកយក្សស៊ូណាមីនៅលើផ្ទៃសមុទ្រថៃ។ ពោលគឺត្រៀមខ្លួន២៤ម៉ោងលើ២៤ម៉ោងទៅលើការសង្កេតការណ៍, ការចេញសេចក្ដីប្រកាសអាសន្ន, ការហ្វឹកហាត់ទប់ទល់ និងជួយសង្គ្រោះ និងវិធានការដទៃទៀត។ ការប្រកាសដូច្នេះបន្ទាប់ពីគេបារម្ភថាអាចនឹងមានបាតុភូតរញ្ជួយដីបាតសមុទ្រ។
ក្រសួងមហាផ្ទៃចេញមុខប្រកាសយ៉ាងដូច្នេះនៅពេលមានភាពជ្រួលច្របល់កាន់តែខ្លាំងឡើងៗនៅក្នុងចំណោមប្រជាជនថៃ។ ពួកគេបារម្ភថាអាចនឹងមានរលកយក្សនៅឈូងសមុទ្រថៃ និងសមុទ្រអាន់ដាម៉ាន់ (Andaman Sea)។ ហេតុនេះ ក្រសួងបញ្ជាក់ថាប្រទេសថៃបានដាក់ពង្រាយប្រព័ន្ធតាមដាន និងប្រព័ន្ធប្រកាសអាសន្នរួចរាល់១០០%។ អនុរដ្ឋមន្ត្រីក្រសួងមហាផ្ទៃ លោកស្រីធីរ៉ារ៉ាត់ថ្លែងថាបងប្អូនប្រជាពលរដ្ឋបង្កើនការប្រុងប្រយ័ត្នជាការល្អហើយ។ ប៉ុន្តែមិនចាំបាច់ភ័យស្លន់ស្លោទេ។
លោកស្រីទើបតែកោះប្រជុំស្ថាប័នអន្តរក្រសួងដែលទទួលភារកិច្ចខាងឃ្លាំមើលបាតុភូតរញ្ជួយដី, រលកយក្សស៊ូណាមី និងការជម្លៀសមនុស្សនៅក្នុងគ្រាអាសន្ន។ កិច្ចប្រជុំនេះរៀបចំឡើងបន្ទាប់ពីសារព័ត៌មានក្នុងស្រុកចុះផ្សាយថាមានបាតុភូតមិនប្រក្រតីកើតមាននៅមហាសមុទ្រឥណ្ឌា និងប៉ាស៊ីហ្វិច។ នៅពេលឮដំណឹងអីចឹងៗធ្វើឱ្យមនុស្សភ័យស្លន់ស្លោ។ ទាំងគេទាំងយើងអ្នកណាក៏ភ័យដែរព្រោះថៃធ្លាប់ហែលឆ្លងបទពិសោធស៊ូណាមីកាលពីថ្ងៃបុណ្យគ្រីសស្មាស់ឆ្នាំ២០០៤ស្លាប់អស់មិនតិចនាក់ទេ។
អ្នកតំណាងក្រសួងឧតុនិយមបញ្ជាក់ថាក្រុមការងាររបស់ខ្លួនបន្តតាមដានចលនារបស់ផែនដីជាប់ជាប្រចាំ។ ក្រសួងអាចផ្ទៀងផ្ទាត់ការពិតជាមួយស្ថាប័នអន្តរជាតិដទៃទៀត។ ថ្មីៗនេះ មានចលនារញ្ជួយនៅក្បែរប្រជុំកោះនីកូបា (Nicobar) ពិតមែន។ ប៉ុន្តែនោះជាចលនារញ្ជួយសើៗលំៗតែប៉ុណ្ណោះ ហើយមិនបង្កជារលកយក្សស៊ូណាមីនៅសមុទ្រអាន់ដាម៉ាន់ទេ។ចំណែកបាតុភូតរញ្ជួយនៅសមុទ្រជប៉ុននោះក៏គ្មានផលប៉ះពាល់ចំពោះសមុទ្រថៃដែរព្រោះវានៅឃ្លាតឆ្ងាយពីគ្នា។ ខាងលើនេះជាការដកស្រង់ប្រភពពីសារព័ត៌មានដឹណេសឹន (The Nation)៕
ចែករំលែកព័តមាននេះ