ទីក្រុងកៀវ៖ រុស្ស៊ីបើកការវាយប្រហារជាថ្មីទៅលើទីក្រុងតូច-ធំនានាទូទាំងប្រទេសអ៊ុយក្រែនបណ្ដាលឱ្យស្លាប់យ៉ាងតិច៤នាក់ និងរបួសជាង៣០នាក់។ នេះបើយោងតាមការបង្ហើបឱ្យដឹងពីអាជ្ញាធរមូលដ្ឋាននៅនឹងកន្លែងកើតហេតុ។ ទីតាំងដែលជាផ្ទាំងស៊ីបនៃការវាយប្រហារខ្លាំងក្លាជាងគេមានដូចជាតំបន់ស៊ូមី (Sumy), អូដេសា (Odesa) និងខឺសុន (Kherson)។…
ទីក្រុងកៀវ៖ រុស្ស៊ីបើកការវាយប្រហារជាថ្មីទៅលើទីក្រុងតូច-ធំនានាទូទាំងប្រទេសអ៊ុយក្រែនបណ្ដាលឱ្យស្លាប់យ៉ាងតិច៤នាក់ និងរបួសជាង៣០នាក់។ នេះបើយោងតាមការបង្ហើបឱ្យដឹងពីអាជ្ញាធរមូលដ្ឋាននៅនឹងកន្លែងកើតហេតុ។ ទីតាំងដែលជាផ្ទាំងស៊ីបនៃការវាយប្រហារខ្លាំងក្លាជាងគេមានដូចជាតំបន់ស៊ូមី (Sumy), អូដេសា (Odesa) និងខឺសុន (Kherson)។
មនុស្ស២នាក់ស្លាប់នៅតំបន់ស៊ូមី និងនៅអូដេសា។ នេះបើយោងតាមការបង្ហោះសាររបស់ភ្នាក់ងារសង្គ្រោះបន្ទាន់អ៊ុយក្រែន។ បុរសម្នាក់ស្លាប់នៅតំបន់ខឺសុន។ នៅក្នុងចំណោមអ្នករបួសទាំងនោះ ភាគច្រើនរស់នៅតំបន់ខាគីវ និងឌីនីប្រូ។ កាលពីយប់មិញ រុស្ស៊ីបញ្ជូនដ្រូនជាច្រើនគ្រឿងវាយប្រហារទីក្រុងកៀវបណ្ដាលឱ្យខូចខាតអគារជាច្រើនខ្នង ប៉ុន្តែគ្មានមនុស្សស្លាប់ទេ។
នៅខាគីវ អាជ្ញាធរអះអាងថាកុមារយ៉ាងតិច៣នាក់រងរបួសនៅពេលរុស្ស៊ីវាយប្រហារផ្ទះល្វែង និងសាលាមត្តេយ្យ១កន្លែង។ គួរកត់សម្គាល់ថាទីក្រុងខាគីវរងការវាយប្រហារខ្លាំងក្លាជាងកន្លែងណាៗទាំងអស់ចាប់តាំងពីសង្គ្រាមផ្ទុះឡើងកាលពីឆ្នាំ២០២២។ គេឃើញភ្លើងឆេះយ៉ាងសន្ធោសន្ធៅនៅលើអគារកម្ពស់ច្រើនជាន់នៅខាគីវ។ អភិបាលតំបន់ខាគីវបញ្ជាក់ថាអ្នករបួសភាគច្រើនរស់នៅសង្កាត់សេវឆឹនគីវស្គី (Shevchenkivskyi)។
តាមពិត មិនមែនតែអ៊ុយក្រែនទេដែលរងការវាយប្រហារនោះ។ រុស្ស៊ីក៏រងការវាយប្រហារពីអ៊ុយក្រែនវិញដែរកាលពីយប់មិញ។ ក្រសួងការពារជាតិរុស្ស៊ីថ្លែងថាយោធារបស់ខ្លួនបាញ់ធ្លាក់ដ្រូនរបស់អ៊ុយក្រែន៩១គ្រឿងដែលបញ្ជូនទៅវាយប្រហារទីក្រុងតូចធំរបស់រុស្ស៊ីរួមទាំងរដ្ឋធានីម៉ូស្គូផងដែរ។ កងការពារដែនអាកាសរុស្ស៊ីថ្លែងថាខ្លួនបាញ់ធ្លាក់ដ្រូន៨គ្រឿងដែលហោះទៅវាយប្រហារទីក្រុងម៉ូស្គូ។
រុស្ស៊ីថាដ្រូនរបស់អ៊ុយក្រែនហោះទៅវាយប្រហារទីតាំងជាច្រើនកន្លែងដូចជានៅសមុទ្រខ្មៅ តំបន់គ្រីម៉េ និងតំបន់កៀកៗនឹងព្រំដែនរុស្ស៊ី-អ៊ុយក្រែន។ ប្រព័ន្ធការពារដែនអាកាសរុស្ស៊ីអាចបាញ់ទម្លាក់ភាគច្រើន។ ប៉ុន្តែដ្រូនបីគ្រឿងអាចលួចវាយឆ្មក់អគារនៅតំបន់ឡេនីនក្រាត (Legningrad) បានសម្រេច។ អាកាសចរណ៍ស៊ីវិលរុស្ស៊ីរាយការណ៍ថាមានការផ្អាកដំណើរការព្រលានយន្តហោះនៅទីក្រុងចំនួន២ និងពន្យារពេលជើងហោះហើររាប់សិបខ្សែ៕
ចែករំលែកព័តមាននេះ