ទីក្រុងតៃប៉ិ៖ ខ្យល់ព្យុះទីហ្វុងដាណាស់ (Danas) បានបោកបក់យ៉ាងខ្លាំងក្លាទៅលើកោះតៃវ៉ាន់ភាគខាងត្បូងបង្កជាភ្លៀងធ្លាក់យ៉ាងខ្លាំងក្លាជាទីបំផុតតាំងពីព្រឹកព្រលឹមថ្ងៃចន្ទនេះ។ រហូតមកដល់ពេលនេះ គេរកឃើញជនរងគ្រោះដែលស្លាប់២នាក់ និងរបួស៣៣០នាក់។ ហាងលក់ទំនិញ និងសាលារៀនជាច្រើនកន្លែងត្រូវតែបង្ខំចិត្តបិទទ្វារជាបណ្ដោះអាសន្ន។ តាមពិត…
ទីក្រុងតៃប៉ិ៖ ខ្យល់ព្យុះទីហ្វុងដាណាស់ (Danas) បានបោកបក់យ៉ាងខ្លាំងក្លាទៅលើកោះតៃវ៉ាន់ភាគខាងត្បូងបង្កជាភ្លៀងធ្លាក់យ៉ាងខ្លាំងក្លាជាទីបំផុតតាំងពីព្រឹកព្រលឹមថ្ងៃចន្ទនេះ។ រហូតមកដល់ពេលនេះ គេរកឃើញជនរងគ្រោះដែលស្លាប់២នាក់ និងរបួស៣៣០នាក់។ ហាងលក់ទំនិញ និងសាលារៀនជាច្រើនកន្លែងត្រូវតែបង្ខំចិត្តបិទទ្វារជាបណ្ដោះអាសន្ន។
តាមពិត កោះតៃវ៉ាន់ឧស្សាហ៍មានខ្យល់ព្យុះបក់បោកវាជារឿងធម្មតាទៅហើយ។ ប៉ុន្តែខ្យល់ព្យុះកាលពីពេលកន្លងមកច្រើនបក់នៅតំបន់ភ្នំ និងតំបន់ដែលមិនសូវមានមនុស្សរស់នៅទល់មុខមហាសមុទ្រប៉ាស៊ីហ្វិច។ ចំណែកខ្យល់ព្យុះដាណាស់ដែលខាងឧតុនិយមចាត់ទុកជាព្យុះធំលំដាប់ទី២នោះបានបក់ទៅរកច្រកសមុទ្រតៃវ៉ាន់បន្ទាប់ពីបក់ទៅដល់ដីគោកនៅមាត់សមុទ្រភាគនិរតីកាលពីថ្ងៃអាទិត្យ។
ប្រធានាធិបតីតៃវ៉ាន់ លោកឡៃឈីងតេ (Lai Ching-te) បានបង្ហោះសារនៅលើហ្វេសប៊ុកជំរុញឲ្យប្រជាជនត្រៀមខ្លួនទប់ទល់នឹងខ្យល់ព្យុះនេះ។ ភ្លើងអគ្គិសនីដែលផ្គត់ផ្គង់ផ្ទះរបស់អ្នកស្រុកជាងកន្លះលានខ្នងត្រូវកាត់ផ្ដាច់។ ជើងហោះហើរក្នុងស្រុក និងជើងហោះហើរអន្តរជាតិជាង៣រយខ្សែត្រូវលុបចោល។ នេះបើយោងតាមរបាយការណ៍របស់អាជ្ញាធរកោះតៃវ៉ាន់។
ការដឹកធ្វើដំណើរតាមរថភ្លើងល្បឿនលឿនរវាងភាគខាងជើង និងភាគខាងត្បូងក៏ត្រូវកាត់បន្ថយផងដែរ។ ទីភ្នាក់ងារអគ្គិភ័យថ្លែងថាជនរងគ្រោះម្នាក់ស្លាប់ដោយសារដើមឈើបាក់សង្កត់ពីលើនៅពេលគាត់កំពុងបើកបរនៅតាមផ្លូវ។ ជនរងគ្រោះម្នាក់ទៀតស្លាប់ដោយសារប្រព័ន្ធអុកស៊ីហ្សែនរអាក់រអួលបន្ទាប់ពីដាច់ភ្លើងអគ្គិសនី។ កម្លាំងខ្យល់បក់ជាអតិបរមារហូតដល់២២០គីឡូម៉ែត្រ/ម៉ោងត្រូវគេកត់សម្គាល់នៅខណ្ឌយុនលីន (Yunlin)។ ដើមឈើ និងផ្លាកសញ្ញានៅតាមផ្លូវជាង៧រយដើមត្រូវខ្យល់បក់ប៉ើងខ្ទេចខ្ទីអស់។
សម្រាប់ពេលនេះ គេមិនទាន់ទទួលដំណឹងថាសួនឧស្សាហកម្មថៃណាន (Tainan) រងផលប៉ះពាល់នៅឡើយទេ។ ទីនេះជាកន្លែងប្រមូលផ្ដុំនៃក្រុមហ៊ុនបច្ចេកវិទ្យាធំៗ។ មន្ត្រីឃ្លាំមើលស្ថានការណ៍លំហសមុទ្រនៅខេត្តសឺជាំង ប្រទេសចិន បានបង្កើនកម្រិតអាសន្ននៃខ្យល់ព្យុះនេះដល់កម្រិតទី២។ នេះបើយោងតាមការផ្សាយរបស់ទូរទស្សន៍ចិនស៊ីស៊ីធីវី (CCTV)។ គិតត្រឹមម៉ោង១០ព្រឹក នាវាដឹកអ្នកដំណើរ១២១ជើង និងនាវាចម្លង (ឬស្រឡាង) ៦៤ជើងត្រូវផ្អាកដំណើរការនៅទូទាំងខេត្តសឺជាំង។
អាជ្ញាធរក៏បានផ្អាកសកម្មភាពនៅការដ្ឋានសំណង់១៨១កន្លែងផងដែរ។ គេរំពឹងថាខ្យល់ព្យុះដាណាស់នឹងរំកិលខ្លួនបន្តិចម្ដងៗទៅរកតំបន់មាត់សមុទ្រដែលស្ថិតនៅចន្លោះទីក្រុងថៃចូវ (Taizhou) នៃខេត្តសឺជាំង និងទីក្រុងហ្វ៊ូចូវ (Fuzhou) នៃខេត្តហ្វ៊ូចៀន (Fujian)។ រហូតដល់ល្ងាចថ្ងៃអង្គារសប្ដាហ៍នេះទើបខ្យល់ព្យុះដាណាស់បក់ទៅដល់តំបន់ដីគោកនៃប្រទេសចិន៕
ចែករំលែកព័តមាននេះ