លោក ត្រាំ ព្រមា.នដាក់ពន្ធបន្ថែម១០%លើប្រទេសដែលចង់ដើរតាមគោលនយោបាយប្រឆាំងអាមេរិករបស់ BRICS
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី៦ ខែកក្កដា…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី៦ ខែកក្កដា ឆ្នាំ២០២៥ បានព្រមានថា សហរដ្ឋអាមេរិកនឹងដាក់ពន្ធបន្ថែម១០%ទៀតលើប្រទេសណាមួយដែលដើរតាមគោលនយោបាយប្រឆាំងនឹងអាមេរិករបស់ក្រុមប្រទេសកំពុងអភិវឌ្ឍន៍ BRICS។ នេះបើតាមប្រភពពីទីភ្នាក់សារព័ត៌មាន Reuters បានចេញផ្សាយ។
ការព្រមានលោក ត្រាំ កើតឡើងបន្ទាប់ពីមេដឹកនាំកំពូលរបស់ប្រទេសសមាជិក BRICS បានចាប់ផ្តើមកិច្ចប្រជុំកំពូលក្នុងប្រទេសប្រេស៊ីល កាលពីថ្ងៃទី៦ ខែកក្កដា ឆ្នាំ២០២៥។ កិច្ចប្រជុំនៅទីក្រុងរីយ៉ូដឺចេណេរ៉ូ (Rio de Janeiro) ដែលត្រូវបានចេញផ្សាយកាលពីរសៀលថ្ងៃអាទិត្យ ក្រុម BRICS បានព្រមានថា ការកើនឡើងពន្ធគយបានគំរាមកំហែងដល់ពាណិជ្ជកម្មពិភពលោក តាមរយៈការរិះគន់គោលនយោបាយពន្ធគយ ប៉ុន្តែមិនបានបញ្ចេញឈ្មោះសហរដ្ឋអាមេរិក និងលោក ត្រាំ ក្នុងការលើកឡើងរបស់ខ្លួននោះទេ។
យ៉ាងណាមិញ ប៉ុន្មានម៉ោងក្រោយមក លោក ត្រាំ ក៏បានព្រមានវិញថា លោកនឹងដាក់ទណ្ឌកម្មលើបណ្តាប្រទេសណាមួយដែលចង់ចូលរួមជាមួយក្រុម BRICS ។ លោកបានសរសេរក្នុងការបង្ហោះលើបណ្តាញសង្គម Truth Social យ៉ាងដូច្នេះថា « ប្រទេសណាមួយដែលចង់យកខ្លួនទៅបៀតនឹងគោលនយោបាយប្រឆាំងអាមេរិករបស់ BRICS នឹងត្រូវបានគិតពន្ធបន្ថែម១០% ព្រោះវានឹងគ្មានការលើកលែងចំពោះគោលនយោបាយនេះទេ។ សូមអរគុណចំពោះការយកចិត្តទុកដាក់របស់អ្នកចំពោះបញ្ហានេះ!»។
ទោះយ៉ាងណាក៏ដោយ លោក ត្រាំ មិនបានបញ្ជាក់ ឬបញ្ចេញឯកសារយោងណាមួយអំពីគោលនយោបាយប្រឆាំងនឹងអាមេរិករបស់ក្រុម BRICS ក្នុងតំណែងរបស់លោកនោះទេ។ បច្ចុប្បន្នរដ្ឋបាលរបស់លោកកំពុងស្វែងរកការបញ្ចប់កិច្ចព្រមព្រៀងពាណិជ្ជកម្មជាច្រើនជាមួយបណ្តាប្រទេសដៃគូពាណិជ្ជកម្មឱ្យបានមុនថ្ងៃទី១ ខែសីហា ឆ្នាំ២០២៥ ដែលជាការពន្យារពេល៣សប្តាហ៍បន្ថែមទៀតពីលើការពន្យារពេលពីមុន ដែលនឹងផុតកំណត់នៅថ្ងៃទី៩ ខែកក្កដា ឆ្នាំ២០២៥។ បណ្តាប្រទេសដែលមិនអាចឈានដល់កិច្ចព្រមព្រៀងពាណិជ្ជកម្មជាមួយអាមេរិក នឹងត្រូវគិតពន្ធដើមជាពន្ធកម្រិតខ្ពស់ ដែលត្រូវបានប្រកាសដោយលោក ត្រាំ កាលពីថ្ងៃទី២ ខែមេសា ឆ្នាំ២០២៥ កន្លងទៅ។
សូមរំលឹកជូនថា BRICS គឺជាប្លុកអន្តររដ្ឋាភិបាលមួយ ដែលត្រូវបានបង្កើតឡើងដោយមេដឹកនាំប្រេស៊ីល រុស្ស៊ី ឥណ្ឌា និងចិន នៅក្នុងកិច្ចប្រជុំកំពូលលើកដំបូងក្នុងឆ្នាំ២០០៩។ ប្លុកមួយនេះក្រោយមកបានបន្ថែមអាហ្វ្រិកខាងត្បូង ហើយកាលពីឆ្នាំមុនរួមមាន អេហ្ស៊ីប អេត្យូពី ឥណ្ឌូណេស៊ី អ៊ីរ៉ង់ និងអារ៉ាប់រួមជាសមាជិកផផងដែរ។
ប្រទេសអារ៉ាប៊ីសាអូឌីតនៅមិនទាន់ក្លាយជាសមាជិកផ្លូវការនៅឡើយទេ ទោះទទួលបានការអញ្ជើញក្តី ខណៈដែលប្រទេសចំនួន៣០ផ្សេងទៀតបានបង្ហាញពីចំណាប់អារម្មណ៍ក្នុងការចូលរួមក្រុម BRICS ទាំងជាសមាជិកពេញសិទ្ធិ ឬជាដៃគូ៕ ប្រភព ៖ Reuters
ចែករំលែកព័តមាននេះ