រាជធានីភ្នំពេញ ៖ វគ្គបណ្ដុះបណ្ដាលគ្រូកីឡាបាល់ទះកម្រិតCដែលជាគម្រោងរបស់គណៈកម្មាធិការជាតិអូឡាំពិកកម្បុជា និងមានការចូលរួមពីសហព័ន្ធកីឡាបាល់ទះអន្តរជាតិ(FIVB)បានបិទបញ្ចប់ជាស្ថាពរកាលពីរសៀលថ្ងៃទី៥ ខែកក្កដា ឆ្នាំ២០២៥ នៅទីស្នាក់ការគណៈកម្មាធិការជាតិអូឡាំពិកកម្ពុជា។
វគ្គបណ្ដុះបណ្ដាលនេះមានសិក្ខាកាមចំនួន២៥នាក់មកពីសហព័ន្ធនានាចំណុះឱ្យសហព័ន្ធកីឡាបាល់ទះកម្ពុជានៅទូទាំងប្រទេស និងមានគ្រូឧទ្ទេសមកពីសហព័ន្ធកីឡាបាល់ទះអន្តរជាតិគឺលោកបណ្ឌិត Cusan Jarotta ។ នេះគឺជាលើកទី១ហើយដែលសហព័ន្ធកីឡាបាល់ទះកម្ពុជា មានឱកាសរៀបចំវគ្គបណ្ដុះបណ្ដាលគ្រូបង្វឹកកីឡាបាល់ទះថ្នាក់អន្តរជាតិនេះឡើង។
ឯកឧត្តមប៊ុយ សុភ័ណ្ឌ ទីប្រឹក្សាគណៈកម្មាធិការជាតិអូឡាំពិកកម្ពុជា បានវាយតម្លៃខ្ពស់ចំពោះការខិតខំប្រឹងប្រែងរបស់សិក្ខាកាមទាំងអស់ ក្នុងការស្រូបយកចំណេះដឹងថ្មីៗ ពីគ្រូឧទ្ទេសកម្រិតអន្តរជាតិរបស់ FIVB ពាក់ព័ន្ធនឹងគោលការណ៍គ្រឹះ នៃការបង្វឹកកីឡាបាល់ទះនេះ។ មិនតែប៉ុណ្ណោះឯកឧត្តមបានលើកឡើងថាវគ្គបណ្ដុះបណ្ដាលនេះនឹងរួមចំណែកយ៉ាងសំខាន់ក្នុងការអភិវឌ្ឍកីឡាបាល់ទះនៅកម្ពុជា ។
សង្ឃឹមថា សិក្ខាកាមទាំងអស់នឹងយកចំណេះដឹងដែលបានសិក្សាទៅប្រើប្រាស់ ដើម្បីអភិវឌ្ឍធនធានអត្តពលិកឈានឆ្ពោះទៅទទួលបានជោគជ័យសម្រាប់ការប្រកួតកីឡាកម្រិតជាតិនិងអន្តរ
ជាតិ ជាពិសេសចូលរួមជាមួយសហព័ន្ធ ដើម្បីអភិវឌ្ឍធនធានអត្តពលិកយុវជនថ្នាល ដើម្បីត្រៀមប្រកួតកីឡាយុវជនអាស៊ីហ្គេម ឆ្នាំ ២០២៥នៅព្រះរាជាណាចក្រកម្ពុជា។
លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា បានលើកឡើងថា ការអភិវឌ្ឍសមត្ថភាពយុវជនថ្នាលគឺជារឿងដែលចាំបាច់បំផុតដើម្បីស្នងតំណែងកីឡាកររៀមច្បងរបស់យើងដែលបច្ចុប្បន្នមួយចំនួនមានអាយុច្រើនត្រៀមចូលនិវត្តន៍បណ្ដើរៗទៅហើយ ។
លោកសង្ឃឹមថា នៅឆ្នាំក្រោយ សហព័ន្ធកីឡាបាល់ទះកម្ពុជានឹងទទួលបានការគាំទ្របន្ថែមទៀតពីគណៈកម្មាធិការជាតិអូឡាំពិកកម្ពុជា ក្នុងការបើកវគ្គបណ្ដុះបណ្ដាលគ្រូបង្វឹកថ្នាក់អន្តរជាតិនេះឡើងមួយកម្រិតទៀតមិនខាន ៕
ចែករំលែកព័តមាននេះ