ទីក្រុងកៀវ៖ អ៊ុយក្រែនបើកយុទ្ធនាការវាយប្រហារដោយដ្រូនទៅលើរោងជាង១កន្លែងរបស់រុស្ស៊ីដែលប្រើសម្រាប់ចតយន្តហោះចម្បាំង សម្រាប់ទុកដាក់គ្រាប់បែក និងគ្រឿងបរិក្ខារយោធា។ នេះបើយោងតាមការបញ្ជាក់របស់អគ្គសេនាធិការដ្ឋានកងទ័ពអ៊ុយក្រែន។ មូលដ្ឋានទ័ពអាកាសបូរីសសុកលីប (Borisoglebsk) នៃតំបន់វ៉ូរ៉ូណេស (Voronezh Oblast)…
ទីក្រុងកៀវ៖ អ៊ុយក្រែនបើកយុទ្ធនាការវាយប្រហារដោយដ្រូនទៅលើរោងជាង១កន្លែងរបស់រុស្ស៊ីដែលប្រើសម្រាប់ចតយន្តហោះចម្បាំង សម្រាប់ទុកដាក់គ្រាប់បែក និងគ្រឿងបរិក្ខារយោធា។ នេះបើយោងតាមការបញ្ជាក់របស់អគ្គសេនាធិការដ្ឋានកងទ័ពអ៊ុយក្រែន។ មូលដ្ឋានទ័ពអាកាសបូរីសសុកលីប (Borisoglebsk) នៃតំបន់វ៉ូរ៉ូណេស (Voronezh Oblast) រងការវាយប្រហារកាលពីយប់មិញ។ តាមរយៈរូបថតដែលគេបង្ហោះនៅលើបណ្ដាញសង្គម គេឃើញថាមានភ្លើងឆេះយ៉ាងសន្ធោសន្ធៅនៅនឹងកន្លែងកើតហេតុ។
នៅពេលរងការវាយប្រហារកាន់តែខ្លាំងឡើងៗ អ៊ុយក្រែនយល់ថាខ្លួនត្រូវតែខិតខំបន្ថយកម្លាំងរបស់រុស្ស៊ីខ្លះ។ ដូច្នេះត្រូវតែវាយឆ្មក់ទីតាំងនានារបស់រុស្ស៊ីវិញតួយ៉ាងដូចជាមូលដ្ឋានទ័ពអាកាសនៅវ៉ូរ៉ូនេស និងទីតាំងដទៃទៀត។ ទីក្រុងកៀវថ្លែងថាខ្លួនដាក់ផែនការវាយប្រហារមូលដ្ឋានទ័ពអាកាសបូរីសសុកលីបដែលដាក់តាំងយន្តហោះចម្បាំងល្អៗដូចជាម៉ាកអែសយូ៣៤ (Su-34), អែសយូ៣៥ (Su-35) និងអែសយូ៣០អែសអឹម (Su-30SM)។ យន្តហោះទាំងនេះត្រូវរុស្ស៊ីប្រើប្រាស់ដើម្បីវាយអ៊ុយក្រែន។
ប្រជាជនរុស្ស៊ីរស់នៅតំបន់វ៉ូរ៉ូនេសប្រាប់ថាពួកគេស្ដាប់ឮសំឡេងផ្ទុះគ្រាប់ប្រហែលដប់ដងនៅអំឡុងម៉ោង២រំលងអធ្រាត្រ។ អ៊ុយក្រែនច្រើនបើកការវាយប្រហារនៅពេលរាត្រីដោយយកស្ទីលតាមរុស្ស៊ីដែរ។ កាលពីយប់មិញ គេស្ដាប់ឮសំឡេងផ្ទុះ និងភ្លើងឆេះនៅក្នុងតំបន់ចំនួន៦។ ប៉ុន្តែរុស្ស៊ីអះអាងថានោះជាការផ្ទុះដែលបង្កឡើងដោយប្រព័ន្ធការពារដែនអាកាសរបស់ខ្លួនបាញ់ទម្លាក់តែប៉ុណ្ណោះ។ ពោលគឺមិនមែនជាការខូចខាតដែលបង្កឡើងដោយការវាយប្រហាររបស់អ៊ុយក្រែននោះទេ។
អភិបាលតំបន់វ៉ូរ៉ូនេសថ្លែងថារុស្ស៊ីបាញ់ធ្លាក់ដ្រូនរបស់អ៊ុយក្រែនជាច្រើនគ្រឿង។ ចំណែកនៅតំបន់ស្មូឡឹង (Smolensk) រុស្ស៊ីបាញ់ធ្លាក់ដ្រូន៣គ្រឿង។ ក្រសួងការពារជាតិរុស្ស៊ីថ្លែងថារយៈពេលជាងបីម៉ោង យោធារបស់ខ្លួនបាញ់ធ្លាក់ដ្រូន៤២គ្រឿងនៅក្បែរព្រំដែនដូចជានៅបែលហ្គោរ៉ូត (Belgorod), ប្រ៊ីយ៉ង់ (Bryansk) និងខឺស (Kursk)។ គេក៏ស្ដាប់ឮសំឡេងផ្ទុះនៅទីក្រុងឆេបូកសារី (Cheboksary) ផងដែរ។ វីឌីអូដែលគេបង្ហោះនៅលើបណ្ដាញសង្គមបង្ហាញរូបភ្លើងឆាបឆេះនៅតំបន់ឧស្សាហកម្មមួយកន្លែងដែលផលិតគ្រឿងអគ្គិសនីសម្រាប់បំពាក់លើបរិក្ខារយោធា។
នៅក្នុងបញ្ហាអ៊ុយក្រែន ការប្រើប្រាស់នយោបាយការទូតហាក់ដូចជាគ្មានប្រសិទ្ធភាព។ ត្រាំ និងពូទីននិយាយទូរស័ព្ទជាមួយគ្នាបីបួនដងហើយហាក់ដូចជាដដែលៗដូចចាក់ទឹកលើក្បាលទា។ លោកពូទីនចង់បង្ហាញជំហររបស់គាត់រឹងដូចដែកថែបដែលគ្មានអ្វីមកបន្ទន់ចិត្តរបស់គាត់បានឡើយ។ គាត់ប្រាប់ត្រាំថារុស្ស៊ីនឹងមិនដកថយជាដាច់ខាតរហូតដល់សម្រេចគោលដៅរបស់ខ្លួន។ នៅក្នុងស្ថានភាពនេះ អ៊ុយក្រែនត្រូវតែបង្ខំចិត្តកាន់អាវុធប្រយុទ្ធនឹងមហាអំណាចយោធា១នេះ។ ជាពិសេស វាយបកវិញដោយប្រើប្រាស់ដ្រូន។ ខាងលើនេះជាការដកស្រង់ប្រភពពីទស្សនាវដ្ដីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ