ទីក្រុងវ៉ាស៊ីនតោន៖ លោកត្រាំថ្លែងថាលោកខកចិត្តយ៉ាងខ្លាំងដែលការសន្ទនាគ្នាជាមួយលោកពូទីនកាលពីយប់មិញបានលទ្ធផលមកគឺសូន្យ។ លោកត្រាំចាប់ផ្ដើមទទួលស្គាល់ថាលោកពូទីនមិនមែនជាមនុស្សងាយស្រួលនិយាយគ្នានោះទេ។ លោកចាប់ផ្ដើមមានអារម្មណ៍ថាលោកពូទីនតាមមើលទៅប្រហែលជាមិនចង់បញ្ចប់សង្គ្រាមនេះទេ។ កិច្ចខិតខំប្រឹងប្រែងរបស់លោកត្រាំដើម្បីបិទបញ្ចប់សង្គ្រាមអ៊ុយក្រែនតាមមធ្យោបាយការទូតហាក់ដូចជានៅទ្រឹងមួយកន្លែង។
នៅដំណាក់កាលចុងក្រោយនេះ មានសំឡេងអំពាវនាវពីគ្រប់ទិសទី រួមទាំងពីសំណាក់មន្ត្រីជាន់ខ្ពស់របស់គណបក្សសាធារណរដ្ឋផងដែរ ឱ្យលោកត្រាំព្យាយាមដាក់សម្ពាធទៅលើលោកពូទីន។ បើមិនអីចឹងទេ លោកពូទីននៅតែចរចាបណ្ដែតៗ លេងៗ មិនដឹងថ្ងៃណាទើបអាចរកឃើញដំណោះស្រាយនោះទេ។ ហេងស៊យរហូតលោកត្រាំចប់អាណត្តិបួនឆ្នាំក៏អ៊ុយក្រែនមិនទាន់ស្គាល់ពន្លឺនៃសន្តិភាពដែរ។ បន្ទាប់ពីសន្ទនាគ្នាជាមួយលោកពូទីនរួច លោកត្រាំត្រៀមនិយាយជាមួយលោកហ្សេឡិនស្គីទៀតនៅថ្ងៃសុក្រនេះ។
ត្រាំថ្លែងថាលោកខកចិត្តណាស់នឹងការសន្ទនាគ្នាជាមួយលោកពូទីនយប់មិញ។ ប្រៀបដូចជាលោកពូទីនគ្មានវត្តមាននៅក្នុងការសន្ទនាគ្នាដូច្នោះដែរ។ ត្រាំគិតថាពូទីនប្រហែលជាមិនចង់បញ្ចប់សង្គ្រាមទេ។ បើដូច្នេះមែន វានឹងក្លាយជារឿងដ៏អាក្រក់ពេកហើយ។ បើយោងតាមលោកយូរី អ៊ូសាកូស (Yuri Ushakov) ដែលជាជំនួយការរបស់លោកពូទីន នៅក្នុងការសន្ទនាគ្នារយៈពេលជិត១ម៉ោងនោះ លោកទាំង២មិនបាននិយាយអំពីការដែលអាមេរិកផ្អាកផ្ដល់ជំនួយយោធាទៅឱ្យអ៊ុយក្រែននោះទេ។
អ៊ុយក្រែនឥឡូវនេះកំពុងតែយ៉ាប់ និងទន់ដៃទន់ជើងហើយ ព្រោះអស់ជំនួយរបស់អាមេរិកទៅមិនដឹងសង្ឃឹមអ្វីទេ។ លោកហ្សេឡិនស្គីថ្លែងប្រាប់អ្នកសារព័ត៌មាននៅប្រទេសដាណឺម៉ាកថាលោកត្រៀមជួបសន្ទនាគ្នាតាមទូរស័ព្ទជាមួយលោកត្រាំឆាប់ៗនេះដើម្បីចង់ដឹងឱ្យបានច្បាស់អំពីការផ្អាកផ្ដល់ជំនួយយោធា។ លោកត្រាំថ្លែងនៅរដ្ឋអាយយ៉ូវ៉ា (Iowa) ថាលោកមិនមែនផ្ដាច់ជំនួយទាំងស្រុងទេ។ ប៉ុន្តែលោកចង់ដាក់ការស្ដីបន្ទោសទៅលោកបៃដិនដែលសម្រុកផ្ដល់ជំនួយយោធាច្រើនពេក៕
ចែករំលែកព័តមាននេះ