រាជធានីភ្នំពេញ៖ ក្រោយពីមាននិស្សិតស្រីម្នាក់ជិះម៉ូតូរអិលក្រឡាច់ បណ្ដាលឲ្យដួលហើយត្រូវរថយន្តដឹកទឹកសុទ្ធកិនបែកក្បាលស្លាប់នោះ ផ្លូវរថភ្លើងដែលស្ថិតនៅចំកណ្ដាលផ្លូវលេខ១០៥K ហៅផ្លូវវត្តតាំងកសាងនោះ ត្រូវបានចាក់អ៊ុតកៅស៊ូលុបហើយ នៅព្រឹកថ្ងៃទី០៤ ខែកក្កដា ឆ្នាំ២០២៥ ដោយមន្ទីរសាធារណៈការ…
រាជធានីភ្នំពេញ៖ ក្រោយពីមាននិស្សិតស្រីម្នាក់ជិះម៉ូតូរអិលក្រឡាច់ បណ្ដាលឲ្យដួលហើយត្រូវរថយន្តដឹកទឹកសុទ្ធកិនបែកក្បាលស្លាប់នោះ ផ្លូវរថភ្លើងដែលស្ថិតនៅចំកណ្ដាលផ្លូវលេខ១០៥K ហៅផ្លូវវត្តតាំងកសាងនោះ ត្រូវបានចាក់អ៊ុតកៅស៊ូលុបហើយ នៅព្រឹកថ្ងៃទី០៤ ខែកក្កដា ឆ្នាំ២០២៥ ដោយមន្ទីរសាធារណៈការ និងដឹកជញ្ជូនរាជធានីភ្នំពេញ និងក្រុមហ៊ុនរ៉ូយ៉ាល់រេលវ៉េ ។ គួររំលឹកថា សិស្សស្រីម្នាក់ជិះម៉ូតូក្រឡាច់ផ្លូវដែក ដួលស្របពេលរថយន្តដឹកទឹកសុទ្ធទៅដល់កិនស្លា.ប់
ប្រជាពលរដ្ឋបាននិយាយថា ផ្លូវលេខ១០៥K ហៅផ្លូវចូលវត្តតាំងកសាងនេះ តភ្ជាប់ពីមហាវិថីសហព័ន្ធរុស្សុីភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ ទៅដល់ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ ហើយតាំងពីដើមមកផ្លូវនេះគ្មានផ្លូវដែកនៅចំកណ្ដាលដូចបច្ចុប្បន្ននេះទេ ។ ប៉ុន្តែនៅប៉ុន្មានឆ្នាំមុននេះក្រុមហ៊ុនរ៉ូយ៉ាល់រេលវ៉េ បានសាងសង់ផ្លូវដែក១ខ្សែនៅចំកណ្ដាល ប្រវែងប្រមាណជាង១ពាន់ម៉ែត្រ ដោយតភ្ជាប់ពីចំណុចផ្លូវរថភ្លើងជិតវត្តតាំងកសាងខាងត្បូង ទៅកាន់អាកាសយានដ្ឋានអន្តរជាតិភ្នំពេញ ។
ប្រជាពលរដ្ឋបាននិយាយបន្តថា ការស្ថាបនាផ្លូវដែកនេះគឺដើម្បីឲ្យរថភ្លើងបើកដឹកភ្ញៀវចេញ និងចូលពីអាកាសយានដ្ឋានអន្តរាជាតិភ្នំពេញ ទីកាន់រាជធានីភ្នំពេញ និងពីរាជធានីភ្នំពេញទៅកាន់អាកាសយានដ្ឋានអន្តរាជាតិភ្នំពេញ ។ ពេលចាប់ផ្ដើមការសាងសង់ផ្លូវដែកនឹះដំបូង មិនមានការពេញចិត្តពីមហាជននោះទេ ព្រោះមើលទៅមិនសមទំនង ហើយមានការប៉ះពាល់ដល់អ្នកដំណើរខ្លាំងណាស់ ប៉ុន្តែទោះជាយ៉ាងនៅតែសាងសង់រហូតដល់រួចរាល់ជាស្ថាពរ ។
ប្រជាពលរដ្ឋបាននិយាយបន្ថែមទៀតថា ក្រោយសាងសង់រួចមានគ្រោះថ្នាក់ដួលម៉ូតូជាបន្តបន្ទាប់ ហើយក៏មានគ្រោះថ្នាក់រវាងរថយន្តនិងរថភ្លើងផងដែរ ចំណែករថភ្លើងបានដំណើរការដឹកភ្លៀវបានមួយរយៈប៉ុណ្ណោះ ក៏លែងដំណើរការទៅវិញ ដោយពុំដឹងថាមានបញ្ហាអ្វីនោះទេ ។ ប៉ុន្តែទោះជាលែងដំណើរការទៅហើយក្ដី ក៏ផ្លូវដែកនេះមិនត្រូវបានគាស់ចេញវិញឡើយ គឺទុកចោលនៅកណ្ដាលឲ្លូវនោះរហូតដល់សព្វថ្ងៃ ហើយក៏ចេះតែមានគ្រោះថ្នាក់ដួលម៉ូតូជាបន្តបន្ទាប់រហូតមកដែរ ជាពិសេសនៅពេលមានភ្លៀងធ្លាក់ធ្វើឲ្យផ្លូវដែកនោះរអិលខ្លាំងណាស់ ។
ប្រជាពលរដ្ឋបានបញ្ជាក់ប្រាប់ទៀតថា ជាចុងក្រោយគឺនៅម៉ោង៤និង៤០នាទីល្ងាចថ្ងៃទី០៣ ខែកក្កដា ឆ្នាំ២០២៥ មាននិស្សិតស្រីម្នាក់ បានជិះម៉ូតូតាមផ្លូវនោះ ខណៈដែលមេឃកំពុងធ្លាក់ភ្លៀងខ្លាំង បណ្ដាលឲ្យរអិលក្រឡាច់ផ្លូវដែកនោះដួលម៉ូតូ ហើយត្រូវរថយន្តកិនបែកក្បាលស្លាប់ភ្លាមៗ នៅត្រង់ចំណុចមុខផ្សាតាំងកសាង ភូមិចំការឪឡឹក សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។
ក្រោយពីកើតឧប្បត្តិហេតុនេះហើយ មហាជនបានធ្វើការរិះគន់ខ្លាំងៗ អំពីការដែលឈប់ប្រើប្រាសផ្លូវរថភ្លើងនេះយូរហើយមិនព្រមដកដែកនោះចេញទៀត មហាជនក៏បានស្នើរសុំឲ្យអាជ្ញាធរនិងក្រុមហ៊ុនខាងលើដកផ្លូវដែកនេះចេញពីផ្លូវវិញជាបន្ទាន់ ដើម្បីបញ្ចៀសកុំឲ្យមានគ្រោះថ្នាក់ចរាចរណ៍ជាបន្តទៀត ។ ទើបនៅព្រឹកថ្ងៃទី៤ ខែកក្កដានេះ មន្ទីរសាធារណៈការ និងដឹកជញ្ជូនរាជធានីភ្នំពេញ និងក្រុមហ៊ុនរ៉ូយ៉ាល់រេលវ៉េ បានអ៊ុតកៅស៊ូលុបផ្លូវដែកនោះហើយកម្មករក្រុមហ៊ុនរ៉ូយ៉ាល់រេលវ៉េ អះអាងថាក្រុមហ៊ុននិងគាស់យកផ្លូវដែកនោះចេញវិញនៅពេលខាងមុខហើយ ៕
ចែករំលែកព័តមាននេះ