រាជធានីភ្នំពេញ ៖ សិស្សស្រីម្នាក់ បានជិះម៉ូតូតាមផ្លូវបេតុងវត្តតាំកងសាង ពេលមេឃកំពុងភ្លៀង ហើយផ្លូវនោះ ក៏មានផ្លូវដែក នៅចំកណ្ដាលទៀតផង លុះពេលកង់មុខម៉ូតូរបស់នាងកិនចំផ្លូវដែកខាងលើ បណ្ដាលឲ្យរអិលក្រឡាច់ដួលខ្ទាតនាងទៅគន្លងផ្លូវម្ខាងទៀត…
រាជធានីភ្នំពេញ ៖ សិស្សស្រីម្នាក់ បានជិះម៉ូតូតាមផ្លូវបេតុងវត្តតាំកងសាង ពេលមេឃកំពុងភ្លៀង ហើយផ្លូវនោះ ក៏មានផ្លូវដែក នៅចំកណ្ដាលទៀតផង លុះពេលកង់មុខម៉ូតូរបស់នាងកិនចំផ្លូវដែកខាងលើ បណ្ដាលឲ្យរអិលក្រឡាច់ដួលខ្ទាតនាងទៅគន្លងផ្លូវម្ខាងទៀត ស្របពេលនោះ ក៏មានរថយន្តដឹកទឹកសុទ្ធ១គ្រឿងបើកបរក្នុងទិសដៅបញ្ច្រាស់ទិសគ្នា ក្នុងល្បឿនលឿនទៅដល់កិន បណ្ដាលឲ្យស្លាប់ភ្លាមៗនៅនឹងកន្លែងតែម្ដង។ បន្ទាប់មករថយន្តខាងលើបានបើករត់គេច ហើយសមត្ថកិច្ច និងប្រជាពលរដ្ឋដេញតាមទាន់ ប៉ុន្តែអ្នកបើកបរបានចុះរត់បាត់នៅសល់តែព្រូម្នាក់ប៉ុណ្ណោះ ក៏ត្រូវនគរបាលឃាត់ខ្លួននាំទៅសួរនាំ ។
ឧប្បត្តិហេតុនោះបានកើតឡើងកាលពីវេលាម៉ោង៤និង៥០នាទីល្ងាចថ្ងៃទី០៣ ខែកក្កដា ឆ្នាំ២០២៥ នៅតាមផ្លូវលេខ១០៥K(ផ្លូវវត្តតាំងកសាង) ស្ថិតនៅក្នុងភូមិចំការឪឡឹក សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។
ស្ត្រីរងគ្រោះឈ្មោះគីម មួយ អាយុ១៩ឆ្នាំ ជាសិស្សសាលាពុទ្ធិសាស្ត្រ ស្នាក់នៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។ ដោយឡែករថយន្តម៉ាកហុីយ៉ាន់ដាយ ពណ៍ខៀវ ពាក់ស្លាកលេខ ភ្នំពេញ2G-5664 ជារថយន្តដឹកទឹកសុទ្ធម៉ាក «ពេញធិក» ហើយអ្នកបើកបរបានរត់គេចខ្លួនបាត់ នៅសល់ព្រូត្រូវនគរបាលឃាត់ខ្លួន ។
អ្នកភូមិខាងលើបាននិយាយថា នៅមុនពេលកើតហេតុ ស្ត្រីរងគ្រោះបានជិះម៉ូតូ១គ្រឿងម៉ាងហុងដាស្កូបពីពណ៍ស ពាក់ស្លាកលេខភ្នំពេញ1JH-3661 ធ្វើដំណើរតាមផ្លូវលេខ១០៥K ក្នុងទិសដៅពីជើងទៅត្បូង ។ ខណៈនោះមេឃកំពុងធ្លាក់ភ្លៀងខ្លាំងទៀតផង លុះពេលទៅដល់ត្រង់ចំណុចកើតហេតុកង់មុខម៉ូតូបានកិនលើផ្លូវដែកដែលសង់បង្កប់កណ្ដាលផ្លូវបេតុងនោះ បណ្ដាលឲ្យរអិលក្រឡាច់ដួលខ្ទាតនាងទៅគន្លងផ្លូវម្ខាងទៀត ។
អ្នកភូមិបាននិយាយបន្តទៀតថា ស្របពេលនោះរថយន្តដឹកទឹកសុទ្ធ១គ្រឿង ខាងលើបើកបរក្នុងទិសដៅបញ្ច្រាស់ទិសគ្នា ពីត្បូងទៅជើងក្នុងល្បឿនលឿនទៅដល់កិន បណ្ដាលឲ្យបែកក្បាលស្លាប់ភ្លាមៗនៅនឹងកន្លែងតែម្ដង ។ បន្ទាប់មករថយន្តនោះបានបើករត់គេច ហើយត្រូវបាននគរបាលនិងប្រជាពលរដ្ឋដេញតាម រហូតដល់ភូមិដំណាក់ សង្កាត់គោកឃ្លាង ខណ្ឌសែនសុខ អ្នកបើកបរក៏បានចុះរត់គេចខ្លួនបាត់ចោលរថយន្តនិងព្រូម្នាក់ ហើយត្រូវនគរបាលឃាត់ខ្លួន ។
ក្រោយពេលកើតហេតុកម្លាំងនគរបាលការិយាល័យចរាចរណ៍ផ្លូវគោក នៃស្នងការដ្ឋានរាជធានីភ្នំពេញចុះទៅធ្វើការវាស់វែង និងនាំយកម៉ូតូនិងរថយន្ត ព្រមទាំងព្រូទៅកាន់ការិយាល័យរង់ចាំការដោះស្រាយនៅពេលក្រោយ ។
បើតាមប្រជាពលរដ្ឋបាននិយាយថា កាលពីអតីតផ្លូវបេតុងលេខ១០៥K(ផ្លូវវត្តតាំងកសាង) នេះពុំមានផ្លូវដែកនៅចំកណ្ដាលដូចជាពេលបច្ចុប្បន្ននេះទេ ប៉ុន្តែកាលពីប៉ុន្មានឆ្នាំមុននេះស្រាប់តែមានក្រុមហ៊ុនមួយសាងសង់ផ្លូវដែកបៅចំកណ្ដាល ដើម្បីឲ្យរថភ្លើងដឹកភ្ញៀវចេញ-ចូល អាកាសយានដ្ឋានអន្តរជាតិភ្នំពេញ ។ កាលនោះក៏មានការរិះគន់ពីសំណាក់មហាជនទូទៅផងដែរ ប៉ុន្តែក្រុមហ៊ុនមួយនោះនៅតែជំនះសាងសង់ផ្លូវដែកនេះរហូតទាល់តែរួចរាល់ ប៉ុន្តែក្រោយសាងសង់រួចដំណើរការបានតែមួយរយៈពេលប៉ុណ្ណោះ ក៏ឈប់ដំណើរការទៅវិញ ។
ប្រភពដដែលបាននិយាយទៀតថា ប៉ុន្តែផ្លូវដែកនេះនៅតែស្ថិតនៅកណ្ដាលផ្លូវបេតុងនោះដដែល មិនត្រូវបានគេគាស់ចេញវិញនោះទេ ហើយចាប់តាំងពីសាងសង់ផ្លូវដែកនោះរួចរហូតមកមានគ្រោះថ្នាក់ដួលម៉ូតូជាហូរហែជាពិសេសពេលភ្លៀង ។ ពេលនេះពួកគាត់ដែលជាប្រជាពលរដ្ឋ ស្នើរសុំឲ្យអាជ្ញាធរជាពិសេសក្រុមហ៊ុនដែលជាម្ចាស់ផ្លូវដែកខាងលើមេត្តាគាស់ដកយកផ្លូវដែកនេះចេញពីផ្លូវបេតុងខាងលើនេះវិញទៅ ឬក៏ចាក់បេតុងលុបពីលើឲ្យជិត ដើម្បីបញ្ចៀសគ្រោះថ្នាក់បែបនេះជាបន្តទៀត ៕
ចែករំលែកព័តមាននេះ