ខេត្តកំពង់ឆ្នាំង ៖ ប្រធានគណបញ្ជាការឯកភាព បង្ក្រាបបទល្មើសនេសាទបឹងទន្លេសាប ដោយធ្វើការបង្ក្រាបឡានដឹកលៀសខុសច្បាប់មួយគ្រឿង មានលៀស២០តោន ដែលមានគោលដៅ គឺត្រូវដឹកទៅប្រទេសវៀតណាម ។ នេះបើយោងតាមផេក…
ខេត្តកំពង់ឆ្នាំង ៖ ប្រធានគណបញ្ជាការឯកភាព បង្ក្រាបបទល្មើសនេសាទបឹងទន្លេសាប ដោយធ្វើការបង្ក្រាបឡានដឹកលៀសខុសច្បាប់មួយគ្រឿង មានលៀស២០តោន ដែលមានគោលដៅ គឺត្រូវដឹកទៅប្រទេសវៀតណាម ។ នេះបើយោងតាមផេក គណៈបញ្ជាការបង្ក្រាបបទល្មើសនេសាទខុសច្បាប់បឹងទន្លេសាប បានប្រកាសនាថ្ងៃទី០៣ ខែវិច្ឆិកានេះ ។
ជាក់ស្តែងប្រតិបត្តិការនេះ ធ្វើឡើងនៅវេលាម៉ោង០៤:២២ល្ងាច ថ្ងៃទី០២ ខែវិច្ឆកា ឆ្នាំ២០២៥ ក្រោមបទបញ្ជារបស់ ឯកឧត្តម ឧត្តមសេនីយ៍ទោ សេង ធារិន ប្រធានគណៈបញ្ជាការឯកភាព បង្គ្រាបបទល្មើសនេសាទបឹងទន្លេសាប និងបទបញ្ជារបស់ថ្នាក់លើ កងកម្លាំងបង្ក្រាបបទល្មើសនេសាទ របស់យោធភូមិភាគទី៥ បានដឹកនាំដោយលោកវរសេនីយ៍ទោ ស វិបុល ដឹកនាំកម្លាំងចំនួន១០នាក់ បានសហការជាមួយ និងកម្លាំងតំបន់ប្រតិបត្តិការសឹករងខេត្តកំពង់ឆ្នាំង ចំនួន១០នាក់ ដឹកនាំដោយលោកវរសេនីយ៍ឯក ប៊ីរស្មីចន្នី មេបញ្ជាការរងតំបន់ប្រតិបត្តិការសឹករងកំពង់ឆ្នាំង បានធ្វើការបង្ក្រាបឡានដឹកលៀសខុសច្បាប់ ចំនួន០១គ្រឿង មានលៀសចំនួន២០តោន ឡានម៉ាក Hiundy (ហ៊ីយិនដាយ) ស្លាកលេខ ភ្នំពេញ 3H. 0196 បើកបរដោយឈ្មោះ ចាន់ ធី.ភេទប្រុស អាយុ៤៨ឆ្នាំ មានទីលំនៅភូមិភ្នៀត ឃុំផ្សា ស្រុកបរិបូរណ៌ ខេត្តកំពង់ឆ្នាំង បានធ្វើការដឹកជញ្ជូនលៀស ជាប្រភេទលៀសចំណី ដឹងពីចំណុចកំពង់ឃ្នាស ស្រុកក្រគរ ខេត្តពោធិ៍សាត់ ដោយគោលដៅ គឺត្រូវដឹកទៅប្រទេសវៀតណាម ។ ក្នុងនោះក៏មានកម្លាំងរដ្ឋបាលជលផលចូលរួមសហការបង្ក្រាបផងដែរ ។
គូបញ្ជាក់ផងដែរថា គោលដៅដែលកងកម្លាំងឃាត់បាន គឺនៅភូមិស្វាយបេការ៉ង ឃុំអន្សាចំបក់ ស្រុកក្រគរ ខេត្តពោធិ៍សាត់ បន្ទាប់មកកម្លាំងយើង ក៏បាននាំមកស្នាក់ការរបស់យោធភូមិ ភាគទី៥ ទិសឆ្នុកទ្រូ ដើម្បីអនុវត្តទៅតាមនិតិវិធីច្បាប់ ។
ចំណែកលៀស ដែលជាប្រភេទលៀសចំណីល្អិតៗ កងកម្លាំងសហការចម្រុះ ដែលមានមន្ត្រីរដ្ឋបាលជលផលចូលរួមបានធ្វើការប្រលែងចាក់ចូលក្នុងទន្លេសាបវិញ នៅភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង ៕
ចែករំលែកព័តមាននេះ