ខេត្តបាត់ដំបង ៖ «ទីផ្សារសត្វកណ្ដុរអាំងនៅតែរក្សាបាននូវតំលៃស្ថេរដដែល តែមួយរយៈចុងក្រោយនេះ ធ្លាក់ចុះអតិថិជនច្រើន ដែលមិនធ្លាប់ ។ ខ្ញុំធ្លាប់លក់មួយថ្ងៃអស់ចន្លោះពី៦០ ទៅ៨០គីឡូក្រាម តែបច្ចុប្បន្ន…
ខេត្តបាត់ដំបង ៖ «ទីផ្សារសត្វកណ្ដុរអាំងនៅតែរក្សាបាននូវតំលៃស្ថេរដដែល តែមួយរយៈចុងក្រោយនេះ ធ្លាក់ចុះអតិថិជនច្រើន ដែលមិនធ្លាប់ ។ ខ្ញុំធ្លាប់លក់មួយថ្ងៃអស់ចន្លោះពី៦០ ទៅ៨០គីឡូក្រាម តែបច្ចុប្បន្ន លក់អស់ត្រឹមតែជាង១០គីឡូក្រាមតែប៉ុណ្ណោះ» ។ នេះជាការលើកឡើងរបស់អ្នកលក់សត្វកណ្ដុរអាំងដីល្បីជាង២០ឆ្នាំកន្លងទៅនេះ នៅលើកំណាត់ផ្លូវជាតិលេខ៥ ក្នុងភូមិអូរតាគី ឃុំអូរតាគី ស្រុកថ្មគោល ។
នៅវេលាចាប់ពីម៉ោងជាង១០ព្រឹកតទៅ ជាពេលវេលាដែលមនុស្សម្នាធ្វើដំណើរយ៉ាងមមារញឹកលើដងផ្លូវជាតិលេខ៥ ឆ្លងកាត់ក្លិនផ្សែងដ៏ឈ្ងុយជាប់ច្រមុះ ដែលបង្ហើរចេញពីចង្ក្រានអាំងកណ្ដុរនៅ «អូរតាគី» តែហាក់មិនធ្វើឲ្យពួកគេចាប់អារម្មណ៍ដូចពេលមុនៗឡើយ បើទោះជាក្នុងចំណោមអ្នកដំណើរមួយចំនួនធ្លាប់ចុះទិញវិចខ្ចប់កណ្ដុរអាំងគ្រប់ជើងយកទៅទទួលទានក្ដី ។
មានប្រវត្តិអាំងសត្វកណ្ដុរលក់ជាង២០ឆ្នាំកន្លងមក នៅភូមិអូរតាគី លោក ថន កែវ បាននិយាយប្រាប់កោះសន្តិភាព កាលពីព្រឹកថ្ងៃទី០៣ កក្កដា ដូច្នេះ ថា «បច្ចុប្បន្ននេះ ទីផ្សារកណ្ដុរអាំងនៅរក្សាបានតំលៃដដែល តែធ្លាក់ចុះអតិថិជនខ្លាំង ដែលមិនធ្លាប់មានពីមុនៗមក» ។
គាត់គ្រវីក្បាលនៅក្បែរចង្ក្រានអាំងសត្វកណ្ដុរដ៏ធំរបស់គាត់ ជាមួយនឹងការបង្ហាញនូវស្នាមញញឹមស្ងួតលាយឡំនឹងសំណើចក្អាកក្អាយខ្លះៗ មុនពេលឆ្លើយនឹងសំណួរកោះសន្តិភាព៖ តើសត្វកណ្ដុរអាំងលក់ដាច់ទេសព្វថ្ងៃនេះ? ស្ទើរមិនទាន់ចប់សំណួរផង គាត់បានផ្ដល់ចម្លើយបែបត្អូញត្អែរថា «ស្ងាត់ណាស់បងអើយ..! កណ្ដុរនៅតែមានលក់ តែភ្ញៀវធ្លាក់ចុះខ្លាំង ប្រហែលដោយសារបញ្ហាសេដ្ឋកិច្ច ។ ធ្លាប់តែលក់មួយថ្ងៃៗអស់ចន្លោះពី៦០ ទៅ៨០គីឡូក្រាម តែសព្វថ្ងៃនេះ លក់អស់ត្រឹមតែជាង១០គីឡូក្រាមប៉ុណ្ណោះ» ។
តាមការមើលឃើញជាក់ស្ដែង កាលពីថ្ងៃទី០៣ កក្កដា រយៈពេលប្រហែលមួយម៉ោង ទើបគេឃើញអតិថិជនឈប់រថយន្តចុះទិញម្ដង ។ ខុសពីពេលមុនៗ ដែលសំបូរអ្នកដំណើរឈប់យានយន្តចោមរោមទិញកណ្ដុរអាំងដ៏ឈ្ងុយឆ្ងាញ់ ។ សព្វថ្ងៃ នៅភូមិអូរតាគី មានអ្នកអាំងកណ្ដុរលក់ត្រឹមតែ០៤កន្លែងប៉ុណ្ណោះ ។ នេះបើតាមលោក ថន កែវ អ្នកអាំងកណ្ដុរលក់ចាស់វស្សាជាងគេបាននិយាយប្រាប់ ។
ប្រវត្តិនៃសត្វកណ្ដុរអាំងនៅភូមិអូរតាគីហាក់ល្បីល្បាញ និងមានភាពទាក់ទាញភ្ញៀវខ្លាំងបំផុតក្នុងអំឡុង មុនពេលមេរោគ «កូវីដ១៩» បានផ្ទុះឡើង ។ គ្រាហ៍នោះ មិនត្រឹមតែភ្ញៀវជាតិទេ ដែលនិយមទទួលទានសត្វកណ្ដុរអាំងនៅ «ផ្សារកណ្ដុរអាំងអូរតាគី» សូម្បីតែជនបរទេសគ្រប់សញ្ជាតិដែលធ្វើដំណើរឆ្លងកាត់ ក៏ត្រូវឈប់ «ភ្លក្សរសជាតិកណ្ដុរអាំង»ដែរ ។
លោក ថន កែវ វ័យ៤៨ឆ្នាំ និងភរិយារបស់គាត់ឈ្មោះ អុល ស្រីលក្ខណ៏ វ័យ៤៧ឆ្នាំ ជាស្ថាបនិក «អាំងសត្វកណ្ដុរលក់មុនគេ» នៅភូមិអូរតាគី ឃុំអូរតាគី ស្រុកថ្មគោល ។ នេះបើនិយាយពីប្រវត្តិអ្នកលក់កណ្ដុរអាំងនៅ«អូរតាគី» ។
លោក ថន កែវ បានបញ្ជាក់ពីប្រវត្តិនេះដូច្នេះថា «ខ្ញុំជាអ្នកចាប់ផ្ដើមលក់សត្វកណ្ដុរអាំងនេះមុនគេនៅភូមិអូរតាគី ។ ដំបូងខ្ញុំលក់ត្រឹមតែមួយថាសៗប៉ុណ្ណោះ ។ ប៉ុន្តែនៅពេលខ្ញុំលក់ដាច់កាន់តែច្រើនពីមួយថ្ងៃទៅមួយថ្ងៃ ខ្ញុំក៏ចាប់ផ្ដើមពង្រីកទាំងចង្ក្រានអាំងកណ្ដុរ បង្កើនទាំងចំនួនសត្វកណ្ដុរអាំង រហូតបង្កើតជាហាង ឬខ្យូសសម្រាប់អតិថិជនអង្គុយលេង ឬទទូលទានអាហារតែម្ដង ។
ហើយបើគិតមកដល់សព្វថ្ងៃនេះ ខ្ញុំនិងភរិយាបានប្រកបមុខរបរអាំងកណ្ដុរលក់ រយៈពេលជាង២០ឆ្នាំកន្លងមកហើយ» ។
ដោយឡែក អ្នកស្រី អុល ស្រីលក្ខណ៍ ដែលកំពុងមមារញឹកលើកកណ្ដុរដាក់អាំងលើចង្ក្រាន ក៏បានរំលឹកពីប្រវត្តិនៃមុខរបរអាំងកណ្ដុរនេះដែរថា «អតិថិជននិយមទទួលទានកណ្ដុរអាំងទើបតែធ្លាក់ចុះខ្លាំង នាប៉ុន្មានខែចុងក្រោយនេះប៉ុណ្ណោះ ។ ធ្លាប់តែលក់អស់មួយថ្ងៃចន្លោះពី៦០ ទៅ៨០គីឡូក្រាម តែពេលនេះ បែរជាធ្លាក់មកនៅត្រឹមតែជាង១០គីឡូក្រាម ។ ខ្ញុំហាក់មិនដឹងពីមូលហេតុអ្វី ដែលនាំឲ្យអតិថិជនធ្លាក់ចុះដូច្នេះទេ? ខ្ញុំគ្រាន់តែដឹងថា តម្លៃកណ្ដុរអាំងនៅតែដដែល តែបាត់បង់អតិថិជន» ។
បើតាមអ្នកស្រី អុល ស្រីលក្ខណ៍ បានបញ្ជាក់ថា តំលៃកណ្ដុរអាំងមានចាប់ពី១,០០០រៀល រហូតដល់១០,០០០រៀលក្នុងមួយក្បាល ទៅតាមទំហំតូច ឬធំ ។ ហើយមានតែចំនួន០៤តូបប៉ុណ្ណោះ ដែលបានបន្តអាំងកណ្ដុរលក់សព្វថ្ងៃនេះ ខណៈអ្នកទិញកាន់តែមានចំនួនថយចុះ ៕
ចែករំលែកព័តមាននេះ