រាជធានីភ្នំពេញ ៖ រដ្ឋបាលខណ្ឌពោធិ៍សែនជ័យ និងរដ្ឋបាលសង្កាត់ចោមចៅទី៣ ដោយមានការចូលរួមពីកម្លាំងនគរបាលខណ្ឌ និងប៉ុស្តិ៍ផង បានចុះទៅធ្វើការត្រួតពិនិត្យទីតាំង«អាជីវកម្មកម្សាន្តGY9» និងបានរកឃើញថា ទីតាំងនោះគ្មានច្បាប់អនុញ្ញាតត្រឹមត្រូវឡើយ ។អាជ្ញាធរបានសម្រេចផ្អាកជាបណ្ដោះអាសន្ន…
រាជធានីភ្នំពេញ ៖ រដ្ឋបាលខណ្ឌពោធិ៍សែនជ័យ និងរដ្ឋបាលសង្កាត់ចោមចៅទី៣ ដោយមានការចូលរួមពីកម្លាំងនគរបាលខណ្ឌ និងប៉ុស្តិ៍ផង បានចុះទៅធ្វើការត្រួតពិនិត្យទីតាំង«អាជីវកម្មកម្សាន្តGY9» និងបានរកឃើញថា ទីតាំងនោះគ្មានច្បាប់អនុញ្ញាតត្រឹមត្រូវឡើយ ។អាជ្ញាធរបានសម្រេចផ្អាកជាបណ្ដោះអាសន្ន រង់ចាំឲ្យម្ចាស់សុំច្បាប់អនុញ្ញាតឱ្យបានត្រឹមត្រូវជាមុនសិន ទើបឲ្យដំណើរការបន្តទៀតនៅពេលក្រោយ ។
ទីតាំងអាជីវកម្មកម្សាន្តGY9នេះ ស្ថិតនៅផ្ទះលេខ៩ ផ្លូវលេខ១១៣K ភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ ដែលមានម្ចាស់ឈ្មោះ YU NING ជាជនជាតិចិន ។ ដោយឡែកកម្លាំងអាជ្ញាធរខាងលើ បានចុះទៅត្រួតពិនិត្យ និងផ្អាកកាលពីវេលាម៉ោង៣និង៣០នាទីរសៀល ថ្ងៃទី៣០ ខែមិថុនា ឆ្នាំ២០២៥ ។
អាជ្ញាធរបានប្រាប់ឲ្យដឹងថា ពេលកម្លាំងសមត្ថកិច្ចចុះទៅដល់ទីតាំងនោះ បានពិនិត្យឃើញមានសុទ្ធតែល្បែងទូហ្គេម នៅក្នុងនោះមានទូហ្គេមបាញ់ត្រីចំនូន២ និងទូហ្គេមផ្សេងៗ សម្រាប់ឲ្យមនុស្សចាស់ និងក្មេងលេងជាច្រើនទូទៀតផងដែរ ។ ប៉ុន្តែពុំមានច្បាប់អនុញ្ញាតឱ្យលេងហ្គេមនោះឡើយ ហើយពេលនោះ ស្ត្រីម្នាក់ឈ្មោះ ម៉េង សេងហុី តំណាងឲ្យម្ចាស់ទីតាំងខាងលើ ក៏បានយកវិញ្ញាបនបត្រ៣ច្បាប់បង្ហាញដល់អាជ្ញាធរ ។
ប្រភពដដែលបានប្រាប់ឲ្យដឹងបន្តទៀតថា៖
ទី១-វិញ្ញាបនបត្រចុះបញ្ជីពន្ធដារ(អាករលើតម្លៃបន្ថែម អ.ត.ប) ចេញដោយឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារ ។
ទី២-វិញ្ញាបនបត្របញ្ជិកាសហគ្រាសគ្រឹះស្ថាន ចេញដោយឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម ។
ទី៣-វិញ្ញាបនបត្របញ្ជិកាចុះឈ្មោះក្នុងបញ្ជីពាណិជ្ជកម្ម ក្រសួងពាណិជ្ជកម្ម ចេញដោយអគ្គនាយក ហូ សុីវយ៉ុង ។
ប្រភពខាងលើបានប្រាប់បន្ថែមថា ដោយសារមិនទាន់មានច្បាប់អនុញ្ញាតហ្គេម ហើយហ្គេមសម្រាប់ក្មេងៗចូលលេងទៀតនោះ ទើបកម្លាំងសមត្ថកិច្ចខាងលើ សម្រចផ្អាកឲ្យម្ចាស់ទីតាំងនេះសុំច្បាប់ឲ្យបានត្រឹមត្រូវជាមុនសិន ។ មិនតែប៉ុណ្ណោះ ក៏បានដាក់វិធានការ៣ចំណុចឲ្យម្ចាស់ទីតាំងអនុវត្តផងដែរ
ទី១-ត្រូវស្នើសុំច្បាប់អនុញ្ញាតប្រកបអាជីវកម្មឲ្យបានត្រឹមត្រូវ ។
ទី២-ហាមមិនអនុញ្ញាតឲ្យក្មេងចូលលេងល្បែងហ្គេមនោះទេ ។
ទី៣-ម្ចាស់ត្រូវផ្អាកអាជីវកម្មជាបណ្ដោះអាសន្នសិន ។
ខណៈនោះដែរ កម្លាំងអាជ្ញាធរខាងលើ មិនបានដកហូតយកសម្ភារៈពីទីតាំងនោះទេ ហើយក្រោយពីធ្វើកំណត់ហេតុចប់សព្វគ្រប់ អាជ្ញាធរក៏បានអានកំណត់ហេតុឲ្យស្ត្រីឈ្មោះ ម៉េង សេងហុី ដែលជាតំណាងឲ្យម្ចាស់ទីតាំងជនជាតិចិននោះស្ដាប់ ដើម្បីអនុវត្តតាម ៕
ចែករំលែកព័តមាននេះ