ទីក្រុងកៀវ៖ មនុស្សបីនាក់ស្លាប់ និង៣៥នាក់រងរបួសនៅក្នុងហេតុការណ៍វាយប្រហារពីសំណាក់ដ្រូនរបស់អ៊ុយក្រែនទៅលើរោងចក្ររបស់រុស្ស៊ីនៅទីក្រុងអ៊ីហ្សេវ (Izhevsk)។ នេះបើយោងតាមអភិបាលតំបន់ លោកអាឡិចសាន់ដឺ ប្រេឆាឡូស (Alexander Brechalov) ដែលបង្ហោះសារនៅលើតេឡេក្រាម។…
ទីក្រុងកៀវ៖ មនុស្សបីនាក់ស្លាប់ និង៣៥នាក់រងរបួសនៅក្នុងហេតុការណ៍វាយប្រហារពីសំណាក់ដ្រូនរបស់អ៊ុយក្រែនទៅលើរោងចក្ររបស់រុស្ស៊ីនៅទីក្រុងអ៊ីហ្សេវ (Izhevsk)។ នេះបើយោងតាមអភិបាលតំបន់ លោកអាឡិចសាន់ដឺ ប្រេឆាឡូស (Alexander Brechalov) ដែលបង្ហោះសារនៅលើតេឡេក្រាម។ លោកប្រេឆេឡូសមិនបានប្រាប់ថាទីតាំងដែលរងការវាយប្រហារនោះឈ្មោះអ្វីទេ។
ប៉ុន្តែមន្ត្រីសន្តិសុខរបស់អ៊ុយក្រែនម្នាក់ប្រាប់ទីភ្នាក់ងារព័ត៌មានរ៉យទ័រអ៊ុយក្រែនបញ្ជូនដ្រូនដែលអាចចេញប្រតិបត្តិការសឹកបានឆ្ងាយយ៉ាងតិច២គ្រឿងទៅវាយប្រហាររោងចក្រឃូប៉ូល (Kupol) បណ្ដាលឱ្យមានភ្លើងឆេះយ៉ាងសន្ធោសន្ធៅ។ រោងចក្រនេះផលិតដ្រូន និងប្រព័ន្ធការពារដែនអាកាស។ តាមរយៈរូបវីឌីអូឃ្លីបរបស់សាក្សីនៅនឹងកន្លែងកើតហេតុបង្ហោះនៅលើបណ្ដាញសង្គម គេឃើញថាទីតាំងដែលរងការវាយប្រហារនោះផ្ទុះឆេះ និងបញ្ចេញផ្សែងហុយផ្អោងទៅលើអាកាស។
លោកប្រេឆាឡូសថ្លែងថាលោកបានជូនដំណឹងទៅលោកពូទីនរួចហើយអំពីហេតុការណ៍វាយប្រហារនេះ។ ឃូប៉ូលជាសហគ្រាសស្រាវជ្រាវ និងអភិវឌ្ឍ និងជាផ្នែកមួយនៃក្រុមហ៊ុនរបស់រដ្ឋរុស្ស៊ី។ រីឯទីក្រុងអ៊ីហ្សេវក៏ជាទីកន្លែងផលិតគ្រឿងបរិក្ខារយោធាដ៏ល្បីលំដាប់ពិភពលោកផងដែរ។ យោងតាមសារព័ត៌មានដឹ ម៉ូស្គូ ថាមស៍ (The Moscow Times) លោកប្រេឆាឡូសថ្លែងថាមនុស្សរាប់សិបនាក់ស្ថិតក្នុងស្ថានភាពរបួសធ្ងន់ធ្ងរ។ គ្រូពេទ្យកំពុងខិតខំអស់ពីសមត្ថភាពដើម្បីជួយសង្គ្រោះពួកគេ។
វិមានក្រឹមឡាំងបញ្ជាក់ថាលោកពូទីនបានទទួលដំណឹងនេះរួចហើយ ហើយលោកសូមចូលរួមមរណទុក្ខជាមួយក្រុមគ្រួសារសពដែលបានស្លាប់នៅក្នុងការវាយប្រហារលើកនេះ។ ម៉ូស្គូថាមស៍ដកស្រង់សម្ដីរបស់លោកអានឌ្រី កូវ៉ាឡឹនកូ (Andriy Kovalenko) ជាប្រធានក្រុមប្រឆាំងព័ត៌មានក្លែងក្លាយ។ លោកទទួលស្គាល់ថានេះជាព័ត៌មានពិតដែលថាអ៊ុយក្រែនវាយប្រហាររោងចក្រឃូប៉ូលដែលផលិតដ្រូនអត្តឃាតហោះទៅវាយប្រហារទីក្រុងតូចធំរបស់អ៊ុយក្រែនសា្លប់ជនស៊ីវិលរាល់ថ្ងៃ។
ក្រសួងការពារជាតិរុស្ស៊ីមិនទាន់ធ្វើអត្ថាធិប្បាយលើសំណុំរឿងវាយប្រហារទៅលើទីក្រុងអ៊ីហ្សេវទេ។ ក្រសួងគ្រាន់តែនិយាយដោយសង្ខេបថាយោធារបស់ខ្លួនបាញ់ទម្លាក់ដ្រូនរបស់អ៊ុយក្រែន៦០គ្រឿងកាលពីយប់មិញ។ ដ្រូនទាំងនេះហោះទៅវាយប្រហារទីតាំង៦កន្លែង, តំបន់គ្រីម៉េ, សមុទ្រខ្មៅ និងសមុទ្រអាហ្សូស (Azov)៕
ចែករំលែកព័តមាននេះ