ជំងឺពងបែកដៃ ជើង និងក្នុងមាត់ បានកំពុងតែផ្ទុះខ្លាំងគួរសមនៅក្នុងប្រទេសថៃ រហូតដល់រដ្ឋាភិបាលថៃបានចេញសេចក្តីណែនាំស្តីពីសុខភាពសាធារណៈព្រមានឪពុកម្តាយនានា នៅក្នុងប្រទេសឱ្យប្រុងប្រយ័ត្ន ។ ដូច្នេះយើងសង្ឃឹមថា បងប្អូនដែលកម្មករ និងកម្មការិនីដែលទើបវិលត្រឡប់មកពីថៃវិញ…
ជំងឺពងបែកដៃ ជើង និងក្នុងមាត់ បានកំពុងតែផ្ទុះខ្លាំងគួរសមនៅក្នុងប្រទេសថៃ រហូតដល់រដ្ឋាភិបាលថៃបានចេញសេចក្តីណែនាំស្តីពីសុខភាពសាធារណៈព្រមានឪពុកម្តាយនានា នៅក្នុងប្រទេសឱ្យប្រុងប្រយ័ត្ន ។ ដូច្នេះយើងសង្ឃឹមថា បងប្អូនដែលកម្មករ និងកម្មការិនីដែលទើបវិលត្រឡប់មកពីថៃវិញ សូមប្រុងប្រយ័ត្នផង ។
តាមសារព័ត៌មាន the Nation បានឲ្យដឹងថា ជំងឺនេះ គឺជាជំងឺឆ្លងដែលរាលដាលយ៉ាងឆាប់រហ័ស ក្នុងចំណោមកុមារតូចៗក្នុងរដូវវស្សា ដែលមានលក្ខខណ្ឌអាកាសធាតុត្រជាក់និងសើម ហើយត្រូវបានក្រសួងសុខាភិបាលសាធារណៈថៃ បានរកឃើញការកើនឡើងគួរឱ្យកត់សម្គាល់ ។
នៅពេលនេះ ក្រសួងសុខាភិបាលនៅក្នុងស្រុកនេះបានសង្កត់ធ្ងន់ និងលើកទឹកចិត្តឲ្យ មាតាបិតា ត្រូវតែធានានូវអនាម័យ និងការត្រួតពិនិត្យសុខភាពឱ្យបានត្រឹមត្រូវសម្រាប់កូនៗរបស់ពួកគេ ជាពិសេសកុមារ គឺងាយរងគ្រោះបំផុត ។
ជំងឺនេះ គឺជាប្រភេទជំងឺដែលអាចឆ្លង និងកើតលើមនុស្សគ្រប់វ័យ គ្រាន់តែមនុស្សពេញវ័យ គឺរាងកម្របន្តិចក៏ដោយចុះ ។ ស្ថិតិបានឲ្យដឹងថា រវាងថ្ងៃទី១ ខែមករា ដល់ថ្ងៃទី២៥ ខែមិថុនា ឆ្នាំ២០២៥ ប្រទេសថៃបានកត់ត្រាករណីជំងឺពងបែកដៃ ជើង និងក្នុងមាត់ផ្ទុះ មានចំនួនដល់ទៅជាង២ម៉ឺនករណី នៅក្នុងនោះកុមារអាយុពី០ដល់៤ឆ្នាំ មានជិតជាង១ម៉ឺន៥ពាន់ករណី អាយុពី៥ទៅ៩ឆ្នាំ មាន៤ពាន់៦រយករណី និងពីអាយុ១០ទៅ១៤ឆ្នាំ គឺមានជាង៥០០ករណី។
ជំងឺនេះ បានកំពុងតែផ្ទុះឡើង គឺស្របពេលដែលកម្ពុជា និងថៃ បានកំពុងតែមានបញ្ហាតានតឹងនៅព្រំដែន ហើយរាជរដ្ឋាភិបាលបានអំពាវនាវឲ្យបងប្អូនកម្មករ និងកម្មការិនីដែលកំពុងតែធ្វើការនៅថៃវិលមកមាតុប្រទេសវិញ ។
នៅក្នុងស្ថានភាពបែបនេះ យើងគួរតែយកចិត្តទុកដាក់លើសុខភាពពួកគេ ហើយនៅក្នុង ករណីដែលពួកគេមិនមានជំងឺក៏ដោយ ក៏គួរតែយកចិត្តទុកដាក់ជួយអប់រំ ឬជូនដំណឹងឲ្យពួកគេលើកកម្ពស់ការប្រុងប្រយ័ត្ន ជាពិសេស គឺលើបញ្ហាអនាម័យនៅមុនពេលជួបកូន ឬក្មួយ ឬក្មេងៗដែលតូចៗនៅតាមសហគមន៍ដែលជាស្រុកកំណើតរបស់ពួកគេ ។
បងប្អូនកម្មករ និងកម្មការិនី នៅក្នុងករណីដែបងប្អូនមានរោគសញ្ញាគ្រុនក្តៅ មានដំបៅឈឺនៅក្នុងមាន និងមានពងកន្ទួលលើបាតដៃ បាតជើង និងកំប៉េះគូទ គឺរឹតតែប្រុងប្រយ័ត្ន រឿងអនាម័យ ហើយកុំទៅស្និទ្ធស្នាលនឹងក្មេងៗមួយរយៈសិន ។ បងប្អូនជាមនុស្សពេញកម្លាំងមិនអីនោះទេ ប៉ុន្តែសម្រាប់ទារក ឬកុមារាកុមារីតូចៗ ពួកគេអាចនឹងគ្រោះថ្នាក់ ។ ជំងឺនេះ គឺវាបណ្តាលមកពីរីវុស មួយចំនួន ដូចជា coxsackieviruses និង Enterovirus ៧១ (EV71) ។
ជំងឺនេះវាអាចជាសះស្បើយដោយខ្លួនឯង ប៉ុន្តែសម្រាប់កុមារ គឺវាគ្រោះថ្នាក់ខ្លាំង ហើយវាអាចវិវត្តន៍ទៅជាជំងឺរលាកស្រោមខួក្បាល និងពេលខ្លះអាចបង្កឲ្យមានផលវិបាកធ្ងន់ធ្ងរ ដូចជា បញ្ហាសរសៃប្រសាទ បេះដូង សរសៃឈា.ម និងបញ្ហាផ្លូវដង្ហើម ដែលអាចបង្កឲ្យស្លា.ប់បាន ។
មេរោគនេះ វាអាចកើតចេញជារោគសញ្ញាក្រោយពេលឆ្លងពី៣ទៅ៧ថ្ងៃ ហើយរោគសញ្ញា ដំបូង គឺជំងឺពងបែក ដែលមាននៅដៃ នៅជើង និងនៅក្នុងមាត់ ក្តៅខ្លួន អស់កម្លាំង ឈឺបំពង់ក ហើយមិនសូវហូបអី ។ បងប្អូនត្រូវដឹងថា ជំងឺនេះវាអាចចម្លងពីមនុស្សម្នាក់ទៅមនុស្សម្នាក់ទៀត ដោយការប៉ះពាល់ផ្ទាល់ជាមួយនឹងវត្ថុរាវនៃផ្លូវដង្ហើមដូចជាទឹកមាត់ កំហាក និងសំបោរ ទឹករងៃ ដែលចេញពីពងបែក លាម.កនៃអ្នកជំងឺ ។
សរុបទៅយើងសង្ឃឹមថា ក្រុមគ្រូពេទ្យ និងមន្ត្រី ដែលនៅរង់ចាំទទួលបងប្អូនខ្មែរត្រឡប់មកវិញ គឺសូមជួយជូនដំណឹងរឿងជំងឺជំងឺពងបែកដៃ ជើង និងក្នុងមាត់ ហើយរំលឹកពួកគេឲ្យប្រុងប្រយ័ត្នខ្លួន នៅពេលដែលចូលទៅផ្ទះ ។ សូមពង្រឹងអនាម័យ ដោយដៃឧស្សាហ៍លាងសម្អាតនិងសាប៊ូ មុនពេលកាន់អ្វីហូបចុក ហើយជៀសវាងការចែករំលែករបស់របរផ្ទាល់ខ្លួន ដូចជា កែវ ពែង ស្លាបព្រា និងកន្សែង ជាមួយនឹងកុមារ ក៏ដូចជាអ្នកដទៃ៕
ចែករំលែកព័តមាននេះ