ខេត្តពោធិ៍សាត់ ៖ ប្រជាពលរដ្ឋចំនួន៧គ្រួសារ ក្នុងនោះនៅក្រុងពោធិ៍សាត់៤គ្រួសារ និងនៅស្រុកក្រគរ៣គ្រួសារ ដែលរងគ្រោះដោយខ្យល់ព្យុះរលំផ្ទះ បានទទួលអំណោយពីសាខាកាកបាទក្រហមកម្ពុជាខេត្ត កាលពីព្រឹកថ្ងៃទី៨ កក្កដា ២០១១។ អំណោយត្រូវបានផ្តល់ជូនក្នុងមួយគ្រួសារៗមានអង្ករ២៥ គីឡូក្រាម តង់១ កន្ទេល
ខេត្តពោធិ៍សាត់ ៖ ប្រជាពលរដ្ឋចំនួន៧គ្រួសារ ក្នុងនោះនៅក្រុងពោធិ៍សាត់៤គ្រួសារ និងនៅស្រុកក្រគរ៣គ្រួសារ ដែលរងគ្រោះដោយខ្យល់ព្យុះរលំផ្ទះ បានទទួលអំណោយពីសាខាកាកបាទក្រហមកម្ពុជាខេត្ត កាលពីព្រឹកថ្ងៃទី៨ កក្កដា ២០១១។ អំណោយត្រូវបានផ្តល់ជូនក្នុងមួយគ្រួសារៗមានអង្ករ២៥គីឡូក្រាម តង់១ កន្ទេល១ មុង១ សារុង១ ក្រមា១ ភួយ១ ចានស្រាក់១សម្រាប់ និងថវិកា៤០.០០០រៀល ។
លោកសួន រិនឌី អភិបាលរងខេត្តនិងជាប្រធានគណៈកម្មាធិការសាខាកាកបាទក្រហមកម្ពុជាខេត្ត ដែលអញ្ជើញជាអធិបតីភាពក្នុងពិធីផ្តល់អំណោយនោះ បានពាំនាំប្រសាសន៍ផ្តាំផ្ញើសាកសួរសុខទុក្ខពីសំណាក់លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលលោកជំទាវតែងតែគិតគូរ និងយកចិត្តទុកដាក់ចំពោះប្រជាពលរដ្ឋក្រីក្រ និងរងគ្រោះគ្រប់ពេលវេលាគ្រប់ទីកន្លែងក្នុងព្រះរាជាណាចក្រកម្ពុជា ។ លោកបានសម្តែងការអាណិតអាសូរចំពោះបងប្អូនដែលជួបគ្រោះធម្មជាតិខ្យល់ព្យុះរលំផ្ទះ បាត់បង់ជម្រក ខូចខាតសម្ភារ និងជួបគ្រោះថ្នាក់មួយចំនួន ទៀត ។ នេះជាគ្រោះធម្មជាតិដែលតែងកើតមានជារៀងរាល់ឆ្នាំ ប៉ុន្តែទោះជាយ៉ាងណា ប្រទេសកម្ពុជាយើងមិនទាន់ជួបគ្រោះរញ្ជួយដី រលកយក្ស ឬបន្ទុះភ្នំភ្លើងបង្កមហន្តរាយធ្ងន់ធ្ងរ ដូចបណ្តាប្រទេសមួយចំនួនលើសាកលោកទេ ។ លោកអភិបាលរងខេត្តមានប្រសាសន៍ថា អំណោយនេះតិចតួចពិតមែន ប៉ុន្តែអាចជួយដោះទ័លបងប្អូនបានមួយកម្រិត ខណៈពេលស្បៀងនិងសម្ភាររបស់បងប្អូនខូចខាតដោយខ្យល់ព្យុះមិនទាន់អាចរកមកវិញបានភ្លាមៗសម្រាប់ហូបចុកនិងប្រើប្រាស់ ។
គួររំលឹកថា កាលពីថ្ងៃទី៦ កក្កដា វេលាម៉ោង៤និង៣០នាទីរសៀល នៅក្រុងពោធិ៍សាត់ មានភ្លៀងធ្លាក់មួយមេធំធ្វើឱ្យលិចផ្លូវក្នុងទីប្រជុំជនមួយចំនួន បង្កការលំបាកដល់ការធ្វើដំណើររបស់ប្រជាពលរដ្ឋ ។ មិនតែប៉ុណ្ណោះ មានខ្យល់ព្យុះកំណាចបោកបក់មកពីទិសខាងលិចនិងខាងត្បូងបណ្តាលឱ្យរលំផ្ទះ របើកដំបូល រលំដើមឈើ បង្គោលភ្លើង និងរន្ទះបាញ់មនុស្សរងរបួសមួយចំនួនផងដែរ ។ ដោយឡែក នៅថ្ងៃទី៧ និងទី៨ កក្កដា តាមបណ្តាស្រុកក៏កើតមានខ្យល់ព្យុះដូចគ្នា ប៉ុន្តែការសរុបស្ថិតិខូចខាតនិងរងគ្រោះមិនទាន់ច្បាស់នៅឡើយទេ ៕
ចែករំលែកព័តមាននេះ