ទីក្រុងកៀវ៖ កាលពីយប់មិញ អ៊ុយក្រែនអះអាងថារុស្ស៊ីវាយប្រហារមកលើខ្លួនខ្លាំងជាងពេលណាៗទាំងអស់ជាហេតុធ្វើឱ្យគេលែងសូវមានសង្ឃឹមថាសង្គ្រាមអាចនឹងបិទបញ្ចប់នៅក្នុងពេលឆាប់ៗនេះ។ រុស្ស៊ីវាយប្រហារអ៊ុយក្រែនដោយអាវុធសរុប៥៣៧គ្រឿង។ ក្នុងនោះដ្រូនពិត និងដ្រូនបញ្ឆោត៤៧៧គ្រឿង និងមីស៊ីល៦០គ្រាប់។ ទ័ពអាកាសអ៊ុយក្រែនថ្លែងថាពួកគេបាញ់ទម្លាក់ដ្រូនរុស្ស៊ី២៤៩គ្រឿង។ រីឯ២២៦គ្រឿងទៀតហោះវង្វេងវង្វាន់គ្មានទិសដៅពិតប្រាកដបន្ទាប់ពីត្រូវអគ្គិសនីឆក់។
មូលហេតុដែលគេចាត់ទុកថានេះជាការវាយប្រហារដែនអាកាសដ៏ធំបំផុតព្រោះរុស្ស៊ីប្រើប្រាស់មីស៊ីលច្រើនប្រភេទ និងប្រើប្រាស់ដ្រូនក៏ច្រើនផងដែរ។ នេះបើយោងតាមលោកយូរី អ៊ីណាត (Yuiy Ihnat) ជាប្រធានផ្នែកទំនាក់ទំនងនៃកងទ័ពអាកាសអ៊ុយក្រែន។ រុស្ស៊ីដាក់ផែនការវាយទីតាំងជាច្រើនកន្លែងរួមទាំងអ៊ុយក្រែនភាគខាងលិចដែលស្ថិតនៅឆ្ងាយពីសមរភូមិមុខ។
ប៉ូឡូញ និងក្រុមសម្ព័ន្ធមិត្តបានចល័តយន្តហោះចម្បាំងរបស់ខ្លួនទាំងប្រញាប់ប្រញាល់ដើម្បីការពារសុវត្ថិភាពដែនអាកាសរបស់ខ្លួន។ នៅតំបន់ខឺសុន ដ្រូនរបស់រុស្ស៊ីបាញ់ប្រហារស្លាប់ជនស៊ីវិលម្នាក់។ ចំណែកនៅតំបន់ខាគីវ ដ្រូនរបស់រុស្ស៊ីហោះទៅបុកឡានមួយគ្រឿងបណ្ដាលឱ្យស្លាប់ជនស៊ីវិលម្នាក់។ នេះបើយោងតាមការអះអាងរបស់អភិបាលតំបន់ទាំងពីរ។
នៅទីក្រុងឆឺខាស៊ី (Cherkasy) មនុស្ស៦នាក់រងរបួស។ ក្នុងនោះមានកុមារម្នាក់។ ចំណែកនៅតំបន់ល្វីវ (Lviv) ដែលស្ថិតនៅចុងប៉ូចខាងលិចអ៊ុយក្រែន។ ដ្រូនមួយគ្រឿងបាញ់ផ្ដាច់ភ្លើងអគ្គិសនីបណ្ដាលឱ្យឆេះរោងចក្រយ៉ាងសន្ធោសន្ធៅនៅទីក្រុងដ្រូហូប៊ីច (Drohobych)។ យន្តហោះអែហ្វ១៦ (F-16) ១គ្រឿងរបស់អ៊ុយក្រែនដែលជាជំនួយរបស់ក្រុមសម្ព័ន្ធមិត្តបានធ្លាក់នៅពេលបាញ់គ្នាជាមួយក្រុមបច្ចាមិត្តនៅលើអាកាស។ អាកាសយានិកក៏បានស្លាប់នៅក្នុងហេតុការណ៍នោះផងដែរ។
រុស្ស៊ីក៏ទទួលរងការវាយប្រហារពីអ៊ុយក្រែនផងដែរ។ ក្រសួងការពារជាតិរុស្ស៊ីអះអាងថាយោធារបស់ខ្លួនបាញ់ធ្លាក់ដ្រូនរបស់អ៊ុយក្រែនបីគ្រឿងកាលពីយប់មិញ។ អ៊ុយក្រែនក៏វាយប្រហារទីក្រុងប្រ៊ីយ៉ង់នៅរុស្ស៊ីខាងលិចបណ្ដាលឱ្យរបួសមនុស្ស២នាក់។ រុស្ស៊ីបាញ់ធ្លាក់ដ្រូន៧គ្រឿងដែលហោះទៅវាយប្រហារតំបន់នោះ។ ដំណាលគ្នានោះ កងទ័ពរុស្ស៊ីវាយយកបានភូមិណូវ៉ូយូក្រេនកា (Novoukrainka) នៅតំបន់ដូញែត៕
ចែករំលែកព័តមាននេះ