ទីក្រុងប៉ារីស ៖ តាមច្បាប់ថ្មី ប្រទេសបារាំងនឹងហាមប្រាមការជក់បារីនៅតាមឆ្នេរសមុទ្រ សួនច្បារ ឧទ្យានសាធារណៈ និងចំណតរង់ចាំរថយន្តក្រុង ដោយត្រូវអនុវត្តចាប់ពីថ្ងៃទី២៩ ខែមិថុនា ឆ្នាំ២០២៥…
ទីក្រុងប៉ារីស ៖ តាមច្បាប់ថ្មី ប្រទេសបារាំងនឹងហាមប្រាមការជក់បារីនៅតាមឆ្នេរសមុទ្រ សួនច្បារ ឧទ្យានសាធារណៈ និងចំណតរង់ចាំរថយន្តក្រុង ដោយត្រូវអនុវត្តចាប់ពីថ្ងៃទី២៩ ខែមិថុនា ឆ្នាំ២០២៥ តទៅ។
ក្រិត្យដែលបានចេញផ្សាយក្នុងសារាចរណ៍ផ្លូវការរដ្ឋាភិបាលបារាំង កាលពីថ្ងៃទី២៨ ខែមិថុនា ឆ្នាំ២០២៥ កន្លងទៅ ក៏ហាមប្រាមការជក់បារីនៅខាងក្រៅបណ្ណាល័យ អាងហែលទឹក និងសាលារៀន នៅក្នុងគោលបំណងការពារកុមារពីផលប៉ះពាល់ដោយសារផ្សែងបារី។ ប៉ុន្តែទោះជាយ៉ាងណាក៏ដោយ ក្រឹត្យនេះមិនបានលើកឡើងអំពីបារីអេឡិចត្រូនិកនោះទេ។ សម្រាប់ជនណាបំពានលើបម្រាមនេះ នឹងត្រូវប្រឈមនឹងការផាកពិន័យទឹកប្រាក់ចំនួន១៣៥អឺរ៉ូ ឬស្មើ ១៦០ដុល្លារអាមេរិក ហើយករណីធ្ងន់ធ្ងរនឹងត្រូវផាកពិន័យដល់៧០០អឺរ៉ូ ឬស្មើ ៨២០ដុល្លារ។
ទោះជាយ៉ាងណាក៏ដោយ ចំពោះការខកចិត្តរបស់សកម្មជនប្រឆាំងថ្នាំជក់មួយចំនួនទៅនឹងបម្រាមនេះ ដោយមិនគ្របដណ្តប់លើកន្លែងលក់ស្រា (បារ) និងភោជនីយដ្ឋាន ដែលជនជាតិបារាំងជាច្រើននៅតែជក់បារីដោយរីករាយដដែល។ ពួកគេក៏មិនសប្បាយចិត្តផងដែរ ដែលបម្រាមនេះមិនអនុវត្តចំពោះបារីអេឡិចត្រូនិក។
លោកស្រី Catherine Vautrin រដ្ឋមន្ត្រីសុខាភិបាលបារាំង ធ្លាប់បានលើកឡើងកាលពីខែឧសភាកន្លងទៅថា «ថ្នាំជក់ត្រូវតែបាត់ពីកន្លែងដែលមានកុមារ ដោយបានគូសបញ្ជាក់ពីសិទ្ធិកុមារក្នុងការដកដង្ហើមជាមួយខ្យល់បរិសុទ្ធ។ លោកស្រីបានបន្ថែមថា ទាំងនេះគឺជាជំហានមួយទៀត ឆ្ពោះទៅរកជំនាន់ដែលគ្មានថ្នាំជក់ ដែលប្រទេសបារាំងកំពុងកំណត់គោលដៅ ចាប់ពីឆ្នាំ២០៣២។
គួរបញ្ជាក់ថា មនុស្សប្រហែល ៧៥ ០០០នាក់ ត្រូវបានប៉ាន់ប្រមាណថាស្លាប់ដោយសារតែផលវិបាកទាក់ទងនឹងថ្នាំជក់ជារៀងរាល់ឆ្នាំ នៅក្នុងប្រទេសបារាំង ហើយតាមរបាយការណ៍ពី OFDT បានបង្ហាញថា សង្គមជាតិខាតបង់ប្រាក់១៥៦ពាន់លានអឺរ៉ូក្នុងមួយឆ្នាំ ដោយរាប់បញ្ចូលកត្តាទាំងជីវិតបាត់បង់ គុណភាពជីវិត ផលិតភាព ការការពារ ការអនុវត្តច្បាប់ និងការថែទាំសុខភាព។ យោងតាមការស្ទង់មតិកាលពីពេលថ្មីៗនេះ ក៏បានបង្ហាញថា ប្រជាជនបារាំង៦នាក់ក្នុងចំណោម១០នាក់ ឬស្មើនឹង ៦២% ពេញចិត្តចំពោះការហាមប្រាមការជក់បារីនៅកន្លែងសាធារណៈ៕ ដកស្រង់ ៖ AFP និង The Guardian
ចែករំលែកព័តមាននេះ