រាជធានីភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាបានថ្លែងថា សម្រាប់ការប្រឡងសញ្ញាបត្រមធ្យមសិក្សាទុតិយភូមិសម័យប្រឡង២៨ សីហា…
រាជធានីភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាបានថ្លែងថា សម្រាប់ការប្រឡងសញ្ញាបត្រមធ្យមសិក្សាទុតិយភូមិសម័យប្រឡង២៨ សីហា ២០២៥ ខាងមុខ ចំពោះបេក្ខជននៃខេត្តឧត្តរមានជ័យ និងខេត្តព្រះវិហារ ដែលជាខេត្តទទួលរងនូវផលប៉ះពាល់ពីការឈ្លានពានរបស់ថៃនឹងទទួលបាននូវវិធានការគាំទ្រជាពិសេសពីក្រសួងអប់រំ យុវជន និងកីឡា បន្ថែមពីលើអ្វីដែលក្រសួងបានរៀបចំរួចហើយនោះ ។
ការលើកឡើងរបស់រដ្ឋមន្ត្រីក្រសួងអប់រំ យុវជន និងកីឡាយ៉ាងដូច្នេះធ្វើឡើង ក្នុងសន្និសីទសារព័ត៌មានស្តីពីការប្រឡងសញ្ញាបត្រមធ្យមសិក្សាទុតិយភូមិសម័យប្រឡង៖ ២៨ សីហា ២០២៥ នៅទីស្តីការក្រសួង នារសៀលថ្ងៃទី២២ ខែសីហា ឆ្នាំ២០២៥ ។
ឯកឧត្តមបណ្ឌិតសភាចារ្យ ហង់ជួន ណារ៉ុន បានគូសបញ្ជាក់ថា ដោយសារជម្លោះប្រដាប់អាវុធរវាងកម្ពុជា និងថៃ នាពេលថ្មីៗកន្លងមកនេះ សម្រាប់ខេត្តឧត្តរមានជ័យ និងខេត្តព្រះវិហារឆ្នាំនេះ គឺមិនអាចរៀបចំការប្រឡងសញ្ញាបត្រមធ្យមសិក្សាទុតិយភូមិដូចរៀងរាល់ឆ្នាំបានទេ ដោយខេត្តព្រះវិហារនឹងត្រូវប្រឡងនៅទីរួមខេត្តព្រះវិហារ ដែលមានចម្ងាយជាង១០០គីឡូម៉ែត្រពីព្រំដែនកម្ពុជា-ថៃ មានបេក្ខជនចូលរួមប្រឡងចំនួន១៩១៣នាក់ ។
ចំណែកបេក្ខជនខេត្តឧត្តរមានជ័យមានដែលមានចំនួន១៧៧២នាក់នឹងត្រូវប្រឡងនៅស្រុកពួក ខេត្តសៀមរាប ក្នុងនោះ សម្រាប់បេក្ខជននៃខេត្តព្រះវិហារនឹងទទួលបានការឧបត្ថម្ភពីក្រសួងអប់រំ យុវជន និងកីឡាសម្រាប់ការស្នាក់នៅ និងការហូបចុកម្នាក់ៗ៥ម៉ឺនរៀល និងមីចំនួន៦កញ្ចប់ សម្រាប់រយៈពេល២ថ្ងៃ ។
ដោយឡែក ចំពោះបេក្ខជនខេត្តឧត្តរមានជ័យនឹងទទួលបានការឧបត្ថម្ភម្នាក់ៗ១០ម៉ឺនរៀល និងមី៦កញ្ចប់សម្រាប់រយៈពេល២ថ្ងៃ ហើយថា ចំពោះបេក្ខជននៃខេត្តទាំងពីរនេះ ក្រសួងបានយកចិត្តទុកដាក់ជាទីបំផុត ព្រោះពួកគេពុំសូវបានរៀនសូត្រពេញលេញដូចបណ្តាខេត្តក្រុងដទៃទៀតទេ ។
សូមជម្រាបជូនថា សម្រាប់ការប្រឡងសញ្ញាបត្រមធ្យមសិក្សាទុតិយភូមិឆ្នាំនេះ មានបេក្ខជនចុះឈ្មោះចំនួន១៤៦០០០នាក់ ក្នុងនោះ ស្រីចំនួន៨១០០០នាក់ ។ បេក្ខជនថ្នាក់វិទ្យាសាស្ត្រមានចំនួនជាង៩០០០០នាក់ និងថ្នាក់វិទ្យាសាស្ត្រសង្គមចំនួនជាង១០០០០០នាក់ ។
ក្រសួងអប់រំ យុវជន និងកីឡា បានអំពាវនាវដល់បេក្ខជនទាំងអស់ឱ្យគោរពបទប្បញ្ញត្តិនៃការប្រឡងឱ្យបានត្រឹមត្រូវ ជាពិសេស មិនត្រូវលាក់ទុកជាប់នឹងខ្លួននូវឧបករណ៍អេឡិចត្រូនិកគ្រប់ប្រភេទចូលក្នុងមណ្ឌលប្រឡង ឬបន្ទប់ប្រឡងជាដាច់ខាត។ ក្នុងករណីរកឃើញថាបានប្រព្រឹត្តសកម្មភាពផ្ទុយនឹងបទប្បញ្ញត្តិ និងកម្រិតវិន័យបេក្ខជននឹងត្រូវបានកំណត់ឱ្យធ្លាក់ជាស្វ័យប្រវត្តិ ៕
ចែករំលែកព័តមាននេះ